Ibintu 14 biranga umushumba mwiza(Igice 1) / Pastor Desire HABYARIMANA

Iri jambo ni iryo kwizerwa ngo “Umuntu nashaka kuba umwepisikopi, aba yifuje umurimo mwiza.” Nuko umwepisikopi akwiriye kuba inyangamugayo, no kuba umugabo w’umugore umwe, abe udakunda ibisindisha wirinda, ugira gahunda mu kubaho kwe, ukunda gucumbikira abashyitsi, ufite ubwenge bwo kwigisha, utari umunywi wa vino cyangwa umunyarukoni, ahubwo abe umugwaneza utarwana, utari umukunzi w’impiya, utegeka neza abo mu rugo rwe, agatera abana be kumvira no kubaha rwose. (Mbese utazi gutegeka abo mu rugo rwe yabasha ate kurinda Itorero ry’Imana?) Kandi ntakwiriye kuba uhindutse Umukristo vuba, kugira ngo atikakaza akagwa, agacirwa ho iteka Satani yaciriwe ho. Kandi akwiriye gushimwa neza n’abo hanze, kugira ngo adahinyuka akagwa mu mutego wa Satani.( 1 Timoteyo 3:1-8)

Kuva kera abantu bakeneye abashumba, abatambyi byari ibintu bisanzwe, muri iri sezerano rishya dukenera abashumba badufasha kugera ku Mana. Abo bantu ni abantu twizera ko bateye intambwe ziruta izo twe twateye cyangwa se basobanukiwe byinshi kuruta ibyo tumaze gusobanukirwa, bafite ubunararibonye bashobora kutugeza kuburyo rwo gusenga bwiza. Iyo urebye abo bantu tubagirira ikizere kukigero cyo hejuru, rimwe na rimwe hari ubwo twibeshya tukumva ari bantu bera cyane badashobora gukora ikosa, tukibagirwako ari bantu babyawe n’abagore, bakomoka kuri Adamu, bashobora gukora amakosa nk’ayo natwe twese twakora ni nkuko tubafata. Abo bashumba bibiliya yatubwiye bakwiye kutuyobora, hari ukuntu babavuze uko bakagombye kuba bameze. Uyu mushumba cyangwa umwungeri w’Intama, akwiye kuba ari umuntu witonda cyane, kuko akwiye tutuyobora aziko azatubazwa. Abakirisito benshi bagiye bagira ibikomere bitewe nuko bagiye bafata amarangamutima yabo reka mbyite ubuzima bwabo bakizera umuntu, bakabasangiza ibigize ubuzima bwabo hanyuma yazasanga uwo yasangije ubuzima atariwe hanyuma akahavana ibikomere biteye ubwoba.

Mu byukuri uruhari bwa Pasiteri n’abashumba ntawarwirengagiza mu misengere yacu,ni urw’ingenzi cyane. Sinavugango aduhuza n’Imana kuko umwenda warukingirije ahera watabutsemo kabiri buri wese yemerewe kwigererayo ariko uruhare rwe ntawarwirengagiza. Na bibiliya na we imuha agaciro nk’umuntu wadufasha mu gusabana n’Imana, uyu muntu rero mu byahishuwe bamwita malayika w’itorero . Ni umuntu ushumbye itorero, uriyoboye nk’uzaribazwa, ni umuntu ufite agaciro gakomeye , ni umuntu wakizerwako afite izi ndangagaciro bibiliya yatubwiye.

Ibi ni 14 biranga umushumba mwiza,wasengeraho ukumva ufite umutekano w’ibyawe, ukumva ufite umutekano w’agakiza kawe, ukumva ufite umutekano w’ejo hazaza.

1.Ugomba kuba ari inyangamugayo: Mu by’ukuri kugirango ubone umuntu udafite umugayo mu kubaho kwe, biragoye kumubona ariko barahari benshi Imana iracyafite ibihumbi birindwi. Bibiliya yatubwiye ngo agomba kuba ari inyangamugayo . Iki ni kimwe mubigomba kuba biranga umuntu w’umushumba. Ese abashumba dufite bose ni inyangamugayo ? ese aho usengera umushumba wawe ni inyangamugayo ? Uziko hari igihe abantu bagira ubuhamya bubi bukamenyekana hose, kandi agakomeza kugundira iryo zina cyangwa akumva ko yakomeza kuba umushumba kandi atari inyangamugayo.

2.Agomba kuba ari umuntu udakunda ibisindisha: Rimwe na rimwe abantu bakunze kujya impaka ku cyaha cyo kunywa inzoga, bakavugango bibiliya ntabwo itubuza kunywa inzoga ariko twibukeko mu isezerano rya kera hari abantu bakora imirimo yihariye batemerwaga na rimwe kunywa inzoga: Abatambyi, abahanuzi, abanaziri usibye kunywa inzoga no gukora ku nzabibu gusa zivamo inzoga cyari ikizira kuri bo kuko bakoraga umurimo wera. Ntabwo rero umuntu ashobora kurinda iby’Imana neza yasinze ntibishoboka. Twe rero muri iki gihe turi abatambyi b’ibihe byose, kiriya gihe umuntu yakoraga umurimo w’ubutambyi ikindi gihe bakazamusimbura ariko twe turi abatambyi b’ibihe byose. Nta mwanya dufite wo kunywa inzoga mu byukuri, inzoga zirasindisha kandi ntibikwiriyeko umuntu wiyubaha akwiye kuba ari umuntu unywa inzoga .

3. Agomba kuba ari umugabo w’umugore umwe: Mu by’ukuri abashumba hari umwe mu mitego bakunda kugwamo, ni umutego ujyanye n’ubusambanyi kubera abantu bose baba babafitiye icyizere, barabizera bakababwira amabanga yose, hanyuma cya cyizere kikazavamo gukora ibyaha bitandukanye. Biba biteye isoni iyo umushumba yaguye mu byaha bimeze bityo, ntabwo bihesha Imana icyubahiro kandi nawe ntabwo bimwubahisha.

4. Agomba kuba ari umuntu wirinda: Wirinda kuki ? Bibiliya iravugango abantu bahetse ubwiru bw’Imana, uzarebe mu isezero rya Kera, ubwo Abisirayeli bavaga muri Egiputa hagati y’abatambyi na rubanda bashyiragamo metero ibihumbi bibiri. Kubera iki? Abantu bahetse isanduku ntabwo bakwiye kwivanga na rubanda , ndavuga kugaragaza intege nke zabo, ubuzima bwabo bwihariye babayeho, byasaga naho bigoye kuko basabwaga kwirinda ku gato na kanini kuko ni abantu bakora umurimo wera, bagomba no kwirinda. Hano turebeye mu buyobozi busanzwe bw’isi, ibihugu byinshi bishyira amafaranga mu bwirinzi: kurinda umutekano, kurinda abayobozi babo kuko baziko babitse amabanga kandi bifite ingaruka byagira ku bihugu byabo ibyo nibyo bituma barindwa mu buryo bwihariye. Umuntu ubitse amabanga y’Imana yakagombye kuba ari umuntu uzi kwirinda. Agomba kuba azi neza ijambo avuze rishobora gushesha umugisha bamwe, rikabera abandi umuvumo. Hari abantu bagiye bava mu matorero kubera abantu batazi kwirinda, mu byo bavuga batera urwenya, bavuga ibibonetse byose kugeza n’igihe bashobora kuvuga ibyo abakirisito babaturiye. Muri ibi bintu 14 turimo kwiga biranga umushumba mwiza hano twakagerageje guhuza twebwe abayoborwa n’abatuyobora kugirango turebe ni he umuntu yasengera akumva afite umutekano, ninde mushumba wakuyobora ukumva ufite icyizere cy’ejo hazaza.

5. Agomba kuba ari umuntu ugira gahunda mu kubaho kwe: Atari wa muntu muhana gahunda ya saa mbiri akaza saa sita. Nijyeze kumva urwenya mu bayobozi b’amatorero bavuga ngo nta muyobozi ukererwa, aho ahagereye hose nibwo gahunda iba itangiye. Mu byukuri abantu wababwiyeko gahunda izatangira sa mbiri wowe uhageze saa yine ukaza wumva ari ntakibazo ufite, abantu wabatesheje umwanya, baguciriye imanza, baremerewe mu mutima. Agomba kuba ari umuntu ugira gahunda mu kubaho kwe. Yubahiriza igihe, yubahiriza ibyo yavuze, gahunda yahanye n’abantu akayubahiriza. Hari abantu babaho ubuzima busa nuburimo akajagari kandi bashumbye abantu benshi. Ndagirango nkwibutseko uko umushumba ameze niko n’itoreron rimera.

Uko umupapa ameze murugo niko n’abana bameze mu rugo. Nta muntu utanga icyo atahawe mu byukuri. Ntabwo wavugango abakirisito bazaba beza kandi wowe utarabaye umushumba mwiza. Bibiliya yatubwiyengo agomba kuba ari umuntu ufite gahunda mu kubaho kwe: uryama ryari ? ubyuka ryari ? umunsi wawe uba upanze gute? Icyumweru cyawe kiba gipanze gute ? ukwezi kwawe gupanze gute ? umwaka wawe uba upanze ute ? Biragoye nagiye mbona bamwe mu bahanzi akemera nka gahunda eshatu kandi ku isaha imwe nkibaza ko atagira hose icyarimwe ibyo bintu azabibasha ate ? agahora aremerera abantu, bamucira imanza bakavugango na barunaka babaye nk’abandi bose, kuko ni umuntu udafite gahunda mukubaho kwe.

6. Agomba kuba ari umuntu uzi gucumbikira abashyitsi: Umushumba ni umuntu wakagombye kuba azi gucumbikira abashyitsi. Kera ndavuga abera ba kera ndavuga mu Abaheburayo 11, iyo urebye intwari zo kwizera ni itorero rya mbere akenshi babaga bari hamwe. Bibiliya iravugango bamwe babikoze bakiriye abamarayika batabizi rero pasiteri ni we muntu wa mbere wakagombye kuba azi kwakira abashyitsi, abavugabutumwa baza ku rusengero n’abatari abavugabutumwa, n’abadafite shinge na rugero, akaba ahorana imiryango ikinguye mu buryo bwo gucumbikira abashyitsi.


7. Agomba kuba afite ubwenge bwo kwigisha:
Mu burusiya , baravugango ikiyobya bwenge cya mbere gikomeye ku isi kuruta ibindi ni inyigisho hano bishatse kuvugako inyigisho iyo zibaye nziza zishobora gukiza imitima y’abantu benshi ariko iyo zibayemo ubuyobe bishobora kwica imitima y’abandi bantu benshi kandi mbabwireko inyigisho nyinshi ni ubuyobe ntabwo zihuye nukuri kwa bibiliya. Abantu bagenda bahimba utuntu tugenda dutuma bagera kunyungu zabo ariko atari ukuri kw’ijambo ry’Imana. Ntabwo ukwiye kwakira inyigisho zose uzimire bunguri, ukwiye kuba ufite ugutwi kujonjora. Ugomba kuba ufite ugutwi kumenya ese ibi bintu batwigisha ni ukuri cyangwa ntibiri ukuri ? ugomba kuba ufite bibiliya yera , bitari ibyo ushobora kuzakira ubuyobe aho abantu bacurika ibyanditswe byera kubera inyungu zabo z’akanya gato. Bagacurika ibyanditswe byera kugirango babone indamu zako kanya, Birengagije ukuri kwa bibiliya., Icyakora bo Yesu yaravuzengo , bazavugango twarigishije, twarahanuye mu izina ryawe ababwirengo ntabwo nigeze mbamenya. Bamwe bigisha inyigisho kugirango bubake amazina yabo,ibindi babikora kugirango babone indamu z’amafaranga. Hari abandi babikora mu kuri ariko sibo benshi. Abandi bigisha inyigisho z’ubuyobe kuko bayobejwe.

Biratangaje kubona umuntu abyuka mu gitondo akabyuka ashinga itorero nta bunararibonye, ntafite uwamwigishije, akenshi Bizana ubuyobe.