Yona ,umuhanuzi wamizwe n’urufi twamwigiraho iki?

Yona, umuhanuzi wagerageje guhunga Imana,akanga amabwiriza Imana yari yamuhaye yo kujya kuburira I Nineve ngo bihane bahindukirire Imana, aratuma twiga neza ukuntu dukwiye kubabazwa n’ibyaha bya bagenzi bacu , kandi tugafata umwanya wo kubabwiriza ubutumwa bwiza no kubasengera kugirango bahindukire bave mu nzira zabo mbi.

Mu gihe urukundo dukunda bagenzi bacu rugira aho rugarukira ,urukundo rw’Imana rwo ntirugira iherezo.

Imana yategetse Yona kujya I Nineve kubaburira kuko ibyaha byabo byari byageze imbere y’Uwiteka. Yona yanze kuyumvira ngo ajye kubaburira nk’uko Ab’i Neneve bari abanyabyaha bakaba n’abagome.(Yona1:2) .Yona yamenyeko igihe azajya muri uriya murwa akababurira, bari kwicuza/kwihana , hanyuma bakarokoka umujinya w’Imana wari kubamanukira.(Yona4:2) ni uko guhitamo guhungira I Tarushishi.

Mu gitabo cy’umuhanuzi Nahumu,hatwereka uko ubugome bw’abantu b’i Nineve bwari bumeze:

“Umurwa uvusha amaraso uzabona ishyano! Wuzuwemo ibinyoma n’ubwambuzi, ntabwo basiba kunyanga. Urusaku rw’ikiboko, urusaku rwo guhinda kw’inziga, imirindi y’amafarashi agenda aca isibo, ikiriri cy’amagare y’intambara asimbuka, ugendera ku ifarashi akisuka mu rugamba, n’inkota irabya indimi, n’icumu rirabagirana, n’abishwe ishyano ryose, intumbi nyinshi zigerekeranye, n’abapfuye ntibabarika. Barasitara ku ntumbi zabo, ibyo byose byatewe n’ubusambanyi bukabije bwa maraya wakundwaga, umurozikazi w’umuhanga ugura amoko ubusambanyi bwe , akagurisha n’imiryango uburozi bwe.”(Nahumu3:1-4)

Yona akimenya ko ab’i Nineve ari babi, ntiyashatse kujya kubaburira. Birashoboka ko natwe uyu munsi tutita kujya ahantu aho ari ho hose hari ibibi,abantu bakora ibyaha, bityo tukanga kujya kubabwira ubutumwa bwiza ngo bihane.

Ariko imbabazi z’Imana zisumba kure urukundo dukunda abantu, Imana yo yari ifitiye imbabazi abantu b’I Nineve:
“Jyewe se sinari nkwiriye kubabazwa n’i Nineve uwo murwa munini, urimo abantu agahumbi n’inzovu ebyeri basaga nabatazi gutandukanya indyo n’imoso, hakabamo n’amatungo menshi?” (Jonah4:11)

Nta mpamvu n’imwe ikwiye kukubuza gukora icyo Imana yagutegetse

Yona nyuma yo kumva itegeko ry’Imana, yahise ahungira I Tarushishi kure y’umurwa w’i Nineve. Yagerageje guhunga Imana,kugira ngo yumve yakwibonera umudendezo.
Ku rundi ruhande, Imana yateje ibyago.Yohereje umuyaga mwinshi mu nyanja ,haba ishuheri ikomeye inkuge yenda kumeneka, maze ubuzima bw’abayirimo bujya mu kaga. Inyanja yari gutuza, iyo gusa bajugunya Yona mu nyanja(Yona1:15). Bamujugunye mu nyanja ,Yona amirwa n’urufi.

Turebeye ku byabaye ku buzima bwa Yona, biratwereka ko ntaho wahungira Imana , ngo uhunge umugambi wayo, ngo ugerageze kwikorera ibyo ushaka bitari ugusohoza isezerano ryayo. Iyo tutubashye icyo Imana idusabye gukora, bituzanira ingorane ku buzima bwacu, zikagera no kuri bagenzi bacu kandi batabigizemo uruhare.

Kumvira ,ugakora icyo Imana ishaka bizana impinduka .

Nyuma yo kurukwa n’urufi,Yona yongera kugera ku butaka. N’ubundi icyo Imana yamutegetse nticyahindutse ,kwari ukujya I Nineve kubaburira.( Yona2:10, 3:4)

Ubuhanuzi bwa Yona bwari buteye ubwoba. “Hasigaye iminsi mirongo ine Nineve hakarimbuka .”(Yona3:4) Nyuma yo guhanura kwe habaye ikintu gitangaje, maze kuva ku mwami n’abantu be bose n’amatungo bicujije ibyaha, ndetse biyiriza ubusa, baririra Uwiteka:

“Ijambo rigera ku mwami w’ I Nineve ahaguruka ku ntebe ye y’ubwami, yiyambura umwambaro we, yambara ibigunira, yicara mu ivu.Ategekana itegeko n’abatware be b’intebe baryamamaza I Nineve bati :”Umuntu wese yekugira icyo asogongeraho, kandi amatungo y’amashyo n’imikumbi bye kurisha kandi bye kunywa amazi, ahubwo abantu n’amatungo byose byambare ibigunira, abantu batakambire Imana bakomeje, kandi bahindukire umuntu wese areke inzira ye mbi, bareke n’urugomo bagira. Nta wubizi ahari aho Imana yahindukira ikigarura, ikareka uburakari bw’inkazi yari ifite ntiturimbuke!”(Yona3:6-9)

Ukubaha Imana kwa Yona,n’ubwo yari yabanje kubyanga kwagize umumaro, Imana irigarura ibabarira Nineve. Uyu munsi natwe Yona akwiye kutwigisha kubaha icyo Imana idutegeka gukora no kugirira urukundo bagenzi bacu tubabwira kwihana kugirango bagaragare batunganye mu maso y’Imana.

Sophie @agakiza.org