Waruziko kurya umunyu mwinshi byongera ibyago byo kurwara kanseri y’igifu?

Ubusanzwe umunyu wongerwa mu biryo, kugira ngo ibiryo bigire icyanga mbese biiryohe, umunyu kandi wongerwa mu biribwa kugira ngo bitangirika, ariko iyo wabaye mwinshi mu mubiri, cyangwa ukaba muke, bishobora kuzana akaga mu mubiri.

Muri iyi nyandiko, tugiye kugaragaza ibyatangwaje n’inzobere mu gukora ubushakashatsi ku ndwara ya kanseri, ndetse naho kurya umunyu mwinshi bihurira no kurwara kanseri y’igifu, ndetse n’uburyo ushobora kuringaniza umunyu urya mu mafunguro.

Nkuko bitangazwa n’ikigo gikora ubushakashakashatsi ku ndwara ya kanseri( World Cancer Research Fund), cyatangaje ko kurya umunyu mwinshi waba: uwo watekanye n’ibiryo, uwo wongeye mu biryo ku meza se, ndetse n’umwe uba ufunganywe n’ibiryo bimwe bicuruzwa mu makarito afunze, biri mu byongera ibyago byo kurwara kanseri y’igifu, ndetse banavuga ko ibi aribyo biza ku mwanya wa kabiri mu bintu bishobora kongera ibyago byo kurwara kanseri y’igifu.

Iki kigo kandi cyakoze ubushakashatsi mu mwaka wa 2009, mu gihugu cya Amerika, kivuga ko 16% by’abarwaye kanseri y’igifu, ndetse na 14% by’abarwaye kanseri mu gihugu cy’ubwongereza, aba bose bayitewe no kuba barariye umunyu mwinshi.
Ikigo kigenzura ibijyanye n’ubuzima, ku rwego rw’isi( World Health Organisation), ubushakashatsi cyakoze, mu mwaka wa 2003, bwagaragazaga ko kurya umunyu mwinshi biri mu byongera ibyago byo kurwara iki cyago.

Abahanga mu by’ubuzima n’imirire, batangaza ko kurya ku bantu bakuze, atari byiza kurenza garama eshanu(g5) z’umunyu ku munsi , naho ku bana bo bikaba atari byiza ko barenza garama eshatu(g 3), ku munsi.

Mu buzima hariho amakosa akorwa, kandi kuyakosora bikaba byashoboka, mu rwego rwo kugabanya ibyago byo kurwara indwara zitandukanye, dore ko nkuko abanyarwanda babivuga, kwirinda biruta kwivuza, umwihariko kuri iyi ndwara ni uko ,iyo wayirwaye, kuyikira bidakunze kubaho, bitewe nuko kenshi, ujya kumenya ko wayirwaye, yaramaze kukuzahaza.

Dore uburyo bwiza wakoreha mu buryo bwo kugabanya ibyago byo kurwara kanseri, bijyanye nuko wariye umunyu mwinshi:


• Irinde kongera umunyu mu biryo mugiye gufungura mbese byageze ku meza
• Gerageza kugabanya ingano y’ibiryo urya byakorewe mu nganda, cyane cyane biriya twavuze biza bifunze mu makarito, dore ko hari n’ibiba bitagaragaza ingano y’umunyu irimo
• Gerageza kuryoshya ibiryo ukoresheje ibimera n’ibirungo bitandukanye mu cyimbo cyo kubiryoshya ushyiramo umunyu mwinshi
• Gerageza kugabanya kurya ibiryo bitoroshye, bitarimo isosi, mbese bimwe twita inkumbagare mu kinyarwanda
• Gerageza kurya imbuto n’imboga ku kigero gikwiriye
• Irinde gukoresha umunyu, mu gihe uri kurinda ibiribwa byawe kwangirika

Source: wiki.cancer.org
[email protected]