Wari uziko ibyemezo bibi bizana ibibazo?

Imwe mu mpamvu ituma ibintu bihinduka nabi mu buzima bwacu ni uko abantu badafata ibyemezo bizima. Dufate urugero rwa Dawidi wafashe ibyemezo bibi bikamuzanira akaga ubwo yasambanyaga Batisheba.

Mu gitabo cya kabiri cya Samweli igice cya 11, hatugaragariza uburyo Dawidi yafashe icyemezo kibi cyo kwanga gutabarana n’ingabo nk’uko yari asanzwe abigenza. “nuko umwaka utashye mu gihe abami batabariraga, Dawidi atuma Yowabu n’abagaragu be n’Abisirayeli bose, barimbura Abamoni kandi bagota n’i Raba ariko Dawidi we yisigariye i Yerusalemu”

Dore ibyemezo bitatu kandi bibi Dawidi yafashe nyuma bikamuzanira gukora icyaha:
Icyemezo cya mbere, Dawidi yanze kujyana n’ingabo ku rugamba. Icyemezo cya kabiri, igihe yabonaga Batisheba arimo kwiyuhagira, yarahindukiye aramwitegereza neza, icyemezo cya gatatu, ubwo yamaraga kubona ko Batisheba afite umugabo, yarabyirengagije ntiyabitekerezaho.

Ibi byemezo bibi Dawidi yafashe byamuteye gukora icyaha cyo gusambanya umugore w’abandi, ibi byateye Dawidi ingaruka mbi n’umubabaro ukabije.
Igihe Dawidi yari amaze gukora ibyangwa n’Uwiteka, yashatse gusibanganya ibimenyetso kugirango hatazagira umuntu ubimenya, abonye ko bidashobotse akora ikindi cyaha cya kabiri yicisha Uliya, umugabo wa Batisheba. Ibi byarakaje uwiteka cyane.

Mu buzima bwa buri munsi, dukwiye kwirinda ibibazo byinshi duhura nabyo twirinda gufata ibyemezo bibi. Aho tubona ko byadukururira akaga tugahakana. Burya Imana ntishobora gutererana abayiyambaza.

Kuva uyu munsi birakwiye guhindukiza amaso yacu n’amatwi yacu n’umubiri wacu wose tukava mu nzira mbi, itwoshya gufata imyanzuro mibi bikarangira twicuza ko twakoze nabi akenshi bituviramo ingaruka mbi.
Source: topchretien.com