Wari uzi ko satani nta ntwaro yo kugutera agira? Dore uko bigenda

Satani si umunyabwenge kuko ubwenye nyakuri buva ku Mana, ahubwo ni umuriganya, ni indyarya, ni umushukanyi, ni umubeshyi, yuzuye ubugome bwinshi arashaka abo bazafatanya kurimbuka gukomeye ategereje. Ari nabyo bituma adahwema gushakisha uko yayobya intore z’Imana.

Imana ishimwe ko Yesu yamunesheje, bityo muri we duhabwa kunesha kose. Satani ntakwiye kuduhagarika umutima ahubwo dukwiye gukomezwa n’insinzi yabonetse I Gologota. Yesu yanesheje satani ahita agena uburyo bworoshye bwo kumutsinda ku bantu be. Ni ukugandukira Imana gusa. Iyo ubibashije na satani uba warangije kumutsinda.

Yakobo: 4:7: “Nuko rero mugandukire Imana ariko murwanye Satani, na we azabahunga.”

Satani rero burya nta bikoresho by’intambara agira mu byukuri, Yesu yamuciye intege ku buryo bukomeye. Ibintu atunze kuruta ibindi ni umujinya n’ubugome.

Burya nta ntwaro agira zo kuturwanya, icyo akora ni iki? Adukubitisha izacu tutacunze neza.

Reka tubihuze n’ubuzima bwo gukorera Imana tubamo hanyuma dukuremo icyifuzo cyo gusengera.

Itangiriro 39:7-8 Hanyuma y’ibyo, nyirabuja abenguka Yosefu, aramubwira ati “Turyamane.” Maze ariyangira, abwira nyirabuja ati “Dore databuja ntagenzura ibyo mubikiye byo mu rugo, ndetse ambikije ibyo atunze byose.

Yosefu bigaragarako yari afite ubwiza bwo ku mubiri no ku mutima cyane. Ibi biasa naho ari imwe mu ntwaro yari afite izamufasha kugera ku mugambi w’Imana. Kuko yashyizwe ku isoko ahita agurwa kandi agurwa mu rugo rw’umwmi. Si buri wese wari kugurwa na Potifari umutware w’ibwami, byumvikane ko yari ahebuje ubwiza.

Nimvuga ubwiza bwo ku buranga byumvikane ko umuntu aba mwiza bitewe n’amaso amureba, ariko ubwo bwiza bugaheshwa agaciro n’ubwiza bw’imbere. Kuko iyo imbere mu mutima ari heza kabone naho utaba ushamaje ku buranga amaso areba abeza iyo akubonye abona ntawe musa. Birasa kandi n’iyo inyuma hasa neza imbere ari habi, mbega iby’imbere biganza iby’inyuma. Yosefu rero yari mwiza imbere bituma igikundiro cye kizamuka bikomeye.

None wowe uwagushyira ku isoko wagurwa? Ese niba wanagurwa, ufite ubwiza bwatuma ugurwa I bwami? Ndashima Yesu watwemeye tutari beza akatugura igiciro cy’ikirenga cyitwa amaraso ye, yadukuyeho ububi bwacu aduha ubwiza bwe nashimwe. Nuko rero yatugejeje mu bwami bw’Imana. Mu yandi magambo dufite ubwiza bwa Yesu buhagije ngo Imana itwakire natwe tuyigandukire kuko ugandukira Imana anarwanya satani, satani aramuhunga nuko kugandukira Imana bitugeza k’ukunesha satani.

Yosefu ageze kwa Potifari, ubwiza bwe bwatumye abengukwa n’umugore wa Potifari wari wuzuye irari ry’ubusambanyi. Ubwiza bwacu buragaragara satani n’abantu yabase barabibona ko turi beza, iyo ni intwaro dufite satani atifuzako tugumana, ndetse iteka atwifuzaho ibitandukanye ari nabyo tumuneshesha dusingira umugambi w’Imana kuri twe, aduciye urwaho rero ibyo dutunze nibyo yatwicisha.

Ndashima Imana ko Yosefu yanesheje akarinda intwaro ye ariko iyo arangara gato satani niyo yari kumwicisha.

Satani yiyambika ubwiza bw’inyuma akayobya umuntu bagerana hirya akamwereka aho abera mubi, ariyo mpamvu nagarutse cyane ku guhuza ubwiza bw’inyuma n’ubw’imbere. Satani yahoze ari umumarayika mu ijuru. Isuraye ye rero si mbi habe namba cyane ko akora mu buryo bw’umwuka kimwe n’abamarayika. Ntabwo rero afite ibehembe n’ibyinyo bibi nka bimwe bajya badushushanyiriza, kereka niba baba batwereka mu mutima we, naho ubundi aza asa neza cyane kuko ari mubi ntibyamukundira kuyobya abeza. Witonde cyane ibishashagirana byose si zahabu.

SATANI NTABWO YAZA ASA GUTYA NGO AGUFATE, WAMUBONA UKAGIRA UBWOBA UKIRUKA UKAMUHUNGA.

Yakwigira mwiza ashaka guhumanya ubwiza bwawe, yakwigira umukire ashaka kuyobya ukennye, yakwigira inshuti ashaka kukumaraho inshuti, afata ishusho bitewe n’icyo ashaka kugeraho, kandi ntaturuka kure aturuka hafi yawe cyane hamwe wasaga nufitiye icyizere kugira ngo akujijishe ntukeke ko haba harimo uburiganya. Niyo aturutse kure aba yabikoreye imibare akurikije ibyo ukunda.


NI IKI KINTU KIZA UKUNDA MU BUZIMA? NI NDE MWIZA UKUNDA KURUSHA ABANDI? SATANI AGUTEYE AZA MU BWIZA BURUTA UBWO WAMUKEKERA BITEWE N’ICYO AGUSHAKAHO. BA MASO GANDUKIRA IMANA KANDI UYIGISHE INAMA MURI BYOSE!

Urundi rugero ruto: Ubwiza bwa Esiteri bwamugejeje I Bwami nawe, byatumye abasha gutabara abayuda, ariko iyo ashukwa n’abamubwira ko ari mwiza batumwe na satani aba yarabaye nk’abandi bose tujya tubona. Ngira ngo niho havuye wa mugani ngo: “Ubwiza bw’umukobwa ntibumubuza kuruha” ariko ubanza utuzuye, numva twakongeraho ngo iyo ataburinze, naho iyo amenye imbaraga z’Imana zibwihishemo bumubera urufunguzo rw’imigisha!

Satani ntafite ikibazo cy’uko uhanura cyane, iyo ni intwaro Imana yaguhaye wakabaye utsindisha satani, kuko ubasha kuvugana n’Imana ukamenya ibyo itekereza ku bantu bayo, wakabaye wiheraho ukamenya icyo igutekerezaho hanyuma ukakirinda. Iyo bitagenze gutyo rero satani ahera kuri bwa buhanuzi akakuvangira cyangwa akaguteza ubwibone agatuma Imana ikurakarira akaba arakurangije.

Muririmbyi munyamuziki, ndakwibutsa ko umuziki wa Dawidi wirukanaga satani muri Sawuri, ubundi wakawufashe neza nk’intwaro yawe igufasha gukubita satani, ariko nurangara gato, satani azagukubitisha uwo muziki wawe umere nk’abandi bose abe arakurangije. Mu mwanya wo kwirukana satani ahubwo ugahamagara satani. Hari indirimbo ishobora gutuma umusambanyi yihana, ariko hari n’indi ishobora gutuma udasambana ararikira gusambana.

Ibi biragaragara cyane no mu buzima busanzwe, aho bakunda kuvuga ngo: "Abeza nibo bapfa ubusa." Baba basigura ibisa n’ibi, ibyo umuntu afite byakamubereye urwego rumugeza kure heza ugasanga nibyo byamwishe urupfu rubi rumwe abanyarwanda bita "uruhagaze."

Ikintu cyose waba utunze mu buzima bwawe cyiza ni icyo guhesha Imana icyubahiro nk’umugaragu wayo uyigandukira, iyo bikoreshejwe neza satani atsindirwa imbere yawe bitagusabye kwirwanirira kuko Imana ikurwanirira. Ariko kubikoresha mu nyungu zawe bwite zidashingiye ku cyubahiro n’ubushake bw’Imana, bisa no kubwira satani uti: “Ngwino nkwihere izi ntwaro Imana yampaye zo kukurwanya maze uzijyanire.” Satani rero abanza kuzikwicisha wowe nyirazo, hanyuma akabona no kuzicisha abandi zagombaga kurinda.

Burya umuvugaburtumwa w’umunyabinyoma, abeshya akanayobya abantu we yaramaze kuyoba kera. Satani afata intwaro adusanganye akazitwicisha iyo tutabaye maso, yarangiza akabona kuzicisha abandi twakabaye tuzirindisha.

Ntiyakubuza gushinga idini, uko uhamagara abantu kuza mu rusengero rwawe we aba acungiye hafi icyo umutima wawe ugambiriye, hanyuma iyo amaze kukuzuza irari ry’isi, icyubahiro, n’ubwibone aba yamaze kukugira umurambo, ubundi akabona kwica ahereye ruhande abagutega amatwi bose.

Mbibutse ko nkuko ntawamenya igihe umuntu asinziririra, ni nako ntawabasha kumenya igihe umuntu yapfiriye, naho mwaba mwicaranye. Twe tubona ibimenyetso by’uwapfuye cyangwa by’upfuye ariko upfa aba yagiye kare. Ni nako burya bijya kugaragara ko umuntu nta Mana ikimubamo yaragiye kera, uru ari rwo rupfu navugaga kuva haruguru.

Ni iki cyiza ufite mu mibereho yawe? Ni iyihe mpano ufite? Imana yaguhaye kumenya kuvuga rwose abantu bakishima, nutabera maso ururimi rwawe nk’intwaro yo kuneshesha satani, azayikwaka hanyuma ayikwicishe bajye bavuga ngo: “Runaka yazize ururimi rwe!”

Amaso yawe ni uko, amatwi yawe ni uko. Muvandimwe bera maso icyo wahawe utakinyagwa ukaba nka Samusoni amaze kumena ibanga ry’imbaraga ze.

Satani ni umujura ariko ntabwo atobora inzu, ahubwo yinjira mu nzu benezo barangaje nabo bakarangara. Ntabwo afite uburyo yakwinjira mu mutima wawe ngo agukoreshe, ahubwo agucunga warangaye nuko kuko nta kigukingira akinjira agatangira kuvangira ibitekerezo n’imigami yawe yose!

Ndashima Imana ko ibasha kubeshaho uwari warapfuye akongera akaba muzima. Niba hari intwaro zawe wacunze nabi zikibwa hanyuma zigakoreshwa mu kukwica no kugukomeretsa, Yesu yiteguye kongera kukomora inguma akaguha ubuzima bushya muri we kandi ukaba amahoro nka mbere kuko iyo ugeze muri we uba uri icyaremwe gishya, ibyakera byose biba bishize.

Dusenge: “Data mu izina rya Yesu, dusengeye intwaro zacu zayazwe ngo uzitugarurire kandi udusubize ubuzima muri wowe twongere kuba abagaragu bawe bakugandukira kugirango utubashishe kunesha satani. Hanyuma udushoboze kubera maso ibyo waduhaye kugira ngo ibibi byatubayeho mu bihe byashize bitazongera hanyuma tubeho turi bazima, tuzasinzire amahoro dutegereje kuzukira ubugingo buhoraho, mu izina rya Yesu. Amen!”

N [email protected]