Ubuzima bufite intego (umunsi 8,igice 1)

Rick Warren ni umupasiteri w’umunyamerika akaba n’umwanditsi w’ibitabo uzwi ku isi yose

Uyu munsi ni uwa munani , ariko kubera ko isomo ry’umunsi wa munani ari rirerire tuzaritanga mu bice bibiri iki gice ni icya mbere ku isomo ry’umunsi wa munani rifite umutwe witwa « Waremewe kunezeza Imana »

Ni wowe waremye byose. Igituma biriho kandi icyatumye biremwa ni ukugira ngo biguhimbaze. (Ibyahishuwe 4:11)

Kuko uwiteka anezererwa abantu be. Zaburi 149:4

Waremewe kunezeza Imana. Igihe wavukaga mu isi, Imana yari ihari n’ubwo itaboneshwa amaso,isekera ko wavutse. Yashakaga ko ubaho kandi kuvuka kwawe kwayiteye umunezero mwishi. Imana ntabwo yari ikeneye kukurema,ariko yahisemo kukurema kugira ngo ikunezererwe. Uriho igufiteho inyungu, ngo uyiheshe icyubahiro,usohoze imigambi yayo, uyitere umunezero. Kuzanira Imana umunezero,kuberaho kuyishimisha ni yo ntego ya mbere y’ubuzima bwawe. Nusobanukirwa neza iri hame,ntabwo uzongera kugira ikibazo cya kumva ntacyo umaze mu buzima. Icyo ni cyo cyereka agaciro kawe.Niba ukomeye bigeze aho Imana igutoraniriza kuzabana nayo iteka ryose,ni akahe gaciro karenze ako ushobora kubona? Uri umwana w’Imana kandi uyitera umunezero kuruta ikindi kintu icyo ari cyo cyose yaremye. Bibiliya iravuga ngo “Kubera urukundo rwayo yagambiriye muri Kristo Yesu kuduhindura abana bayo,kubw’ineza n’ubushake bwayo.” Imwe mu mpano Imana yaguhaye ni ugushobora kunezerwa. Yaguteranije mu buryo buguha gusabana n’ibigukikije ndetse iguha n’amarangamutima kugira ngo ushobore kunezerwa. Yifuza ko uryoherwa n’ubuzima aho kubucamo ubwihanganira gusa. Igituma ushobora kwishimira ibinezeza ni uko Imana yakuremye mu ishusho yayo. Kenshi twibagirwa ko n’Imana igira amarangamutima! Imana irishima kandi ikababara cyane. Bibiliya itubwira ko Imana ijya igira agahinda, ikagira ifuhe ndetse ikarakara,ikagira imbabazi, impuhwe,intimba, ikishima ikagira umunezero, igasusuruka kandi ikanyurwa. Imana irakunda, ikishima, ikanezerwa, ,igahimbarwa, ndetse igaseka!

Kunezeza Imana byitwa “Kuramya” Bibiliya iravuga ngo ‘’Uwiteka anezererwa abamwubaha, anezerwa abategereza imbabazi ze”(Zaburi 147:11)

Icyo ukora cyose cyinezeza Imana ,gihinduka igikorwa cyo kuramya. Nk’ibuye rya diyama,rigira impande nyinshi. Byatwara ibitabo byinshi umuntu ashatse gusobanura mu buryo burambuye kuramya icyo ari cyo, ariko muri iki gice turareba iby’ibanze. Abahanga mu mico y’abantu bavuga ko kuramya ari ikintu usangana imico yose, ni ubukene Imana yashyize muri kameremuntu bumutera guhora ashaka kuvugana n’Imana. Kuramya ni kimwe mu bintu byangombwa nko kurya no kunywa. Iyo umuntu abayeho ataramya Imana, iteka yishakira ikindi ayisimbuza,kabone n’iyo cyaba we ubwe. Icyatumye Imana iturema ityo ni uko nayo ishaka abayiramya. Yesu yaravuze ngo’’ Imana Data abayiramya’’ yohan 4:23 Bitewe n’uburere mu by’iyobokamana,ushobora kuba ukeneye gusobanukirwa kurushaho ‘’kuramya’’icyo ari cyo. Ushobora kuba wibwira ko mvuga ya materaniro yo mu nsengero arimo kuririmba,gusenga no kumva inyigisho. Cyangwa se ushobora kwibwira ko nshaka kuvuga ya mihango irimo gucana za buji cyangwa se ugahita wumva amateraniro yo gukiza indwara, ibitangaza ndetse no kwikubita hasi. Kuramya bishobora kubamo ibyo byose, ariko kuramya birenze kure ibyo bigaragara inyuma. Kuramya ni uburyo bwo kubaho.

Kuramya birenze cyane umurimo wo kuririmba.

Kubantu benshi, kuramya bivuga kuririmba Barakubwira ngo ‘’Mu itorero ryacu,amateraniro atangizwa no kuramya, hakabona kuza inyigisho’’ Uko ni ukudasobanukirwa gukomeye. Kuko buri kintu cyose gikorerwa mu rusengero aba ari bumwe mu buryo bwo kuramya:gusenga,gusoma ijambo ry’Imana,kuririmba,kwatura ibyaha,guceceka,gutuza, kumva inyigisho, kwandika ibyo bigisha,gutanga ituro,kubatizwa,igaburo ryera, kuzuza ikarita yo kwemera Kristo, ndetse no gusuhuza abandi mwasenganye. Ubundi mu by’ukuri,kuramya byatangiye mbere y’uko abantu batangira kuririmba. Adamu yaramyaga Imana mu murima wa Edeni,ariko kuririmba ntaho tubibona kugeza mu gice cya kane cy’igitabo cy’Itangiriro nyuma yo kuvuka kwa Yubali. Niba kuramya ari ukuririmba,abatahawe impano y’amajwi meza ntibazigira baramya Imana!Kuramya birenze kure cyane indirimbo. Kudasobanukirwa kuruseho ni igihe abantu bitiranya kuramya n’ubwoko bumwe bw’indirimbo. Ukumva umuntu avuga ngo’’Twabanje turirimba indirimbo imwe isanzwe,hanyuma dukurikizaho indi ndirimbo yo guhimbaza no kuramya’’ Cyangwa ukumva undi aravuze ngo’’Nkunda indirimbo zihuta zo guhimbaza ariko nezezwa kurutaho n’izigenda buhoro zo kuramya’’Ukurikije aya magambo,iyo indirimbo yihuta cyangwa irimo ibyuma birangurura, yitwa ‘’guhimbaza’’Ariko yaba igenda buhoro,ituje kandi ikora ku mutima, wenda bacuranga gitari ,ikitwa’’ kuramya’’.

Ubwo ni bumwe mu buryo bwakwiriye henshi bwo gukoresha nabi ijambo ‘’kuramya’’. Kuramya ntaho bihuriye n’ubwoko bw’indirimbo,urusaku cyangwa umuvuduko wayo. Imana ikunda indirimbo z’uburyo bwose kuko ni yo yahanze kuririmba_indirimbo zihuta n’izigenda buhoro,izivuga cyane n’izivuga buhoro,iza kera n’ishya. Wowe ushobora kuba utazikunda zose ariko Imana irazikunda! Iyo ziririmbiwe Imana mu kuri no mu Mwuka,zihinduka kuramya.

Abakiristo bakunze kutumvikana ku ndirimbo bakoresha mu kuramya Imana,buri muntu akarengera ubwoko bw’indirimbo akunda asobanura ko ari bwo bujyanye na Bibiliya cyangwa ko ari bwo burushaho guhesha Imana icyubahiro. Ariko mu by’ukuri, nta bwoko bwa muzika bushingira kuri Bibiliya! Nta manota y’indirimbo dusanga muri Bibiliya, n’iyuma bakoresha icyo gihe nta ntabwo tukigira!

Tuzakomeza ubutaha n’ikindi gice gikurikiyeho