Waba hari icyo uzi ku biremwa by’abamarayika? (Igice 1)

Kuva mu iremwa ry’isi, Imana yaremye ibintu byinshi ikoresheje ijambo ryayo hanyuma irema umuntu mu ishusho yayo kugirango ategeke isi ndetse imuha ubwemge butandukanye n’ubw’inyamaswa. Mu biremwa Imana yaremye ibyo twumva tutararebesha amaso n’ibyo tubona byose bigaragaza gukomera kw’Imana. Muri ibyo byose Imana yaremye hari ibyamayoberane bitandukanye kandi bigoye kwiyumvisha mu bwenge bwa muntu cyereka Imana ubwayo ibikweretse. Muri byo harimo ibiremwa by’abamarayika nibyo twifuje kuganiraho kugirango tumenye imikorere yabyo n’impamvu byaremwe. Benshi bibaza ku bamarayika ariko udasomye bibiliya ntiwasha kumenya abo aribo n’imikorere yabo.

Ibiremwa bya kimarayika kuri twe ni ikintu kidasanzwe mu buryo bw’igitangaza. Benshi muri twe bagiye babona inyungu ziturutse ku b’abamarayika mu buryo bwombi ari ubwo turebesha amaso cyangwa se butagaragara. Abenshi bagura amashusho y’abamarayika mu maguriro asanzwe cyangwa se mu maguriro yabugenewe acuruza ibintu bishushanyije cyangwa bijyanye n’imyizerere ya gikristo.
Benshi batekereza abamarayika nk’ibiremwa bitagaragara bifite amababa n’imyenda y’imyeru. Bamwe bizerako abamalayika baba bafite ikamba ku mutwe kandi baguruka. Kenshi abanyabugeni bakunze gushushanya abamarayika mu ishusho y’abagore, nyamara ibyanditswe byera bigaha abamarayika amazina y’abagabo urugero nka Gaburiyeli na Mikayeli.
Biramenyerewe kubona ifoto y’abamarayika bato ariko ibyanditswe byera bivugako abamarayika ari ibiremwa bikuru. Mu myaka yatambutse ibitabo byinshi byagiye byandikwa bivuga ku bamarayika. Hari iguriro rimwe ricuruza ibitabo bya gikiristo ribonekamo ibitabo bigera kuri 368 byagiye byandikwamo inyandiko zisobanura abamalayika.
Abantu bamwe basenga baramya abamarayika kubera kubatinya cyane , ariko Imana yo yabujije abantu kuramya abamarayika. "Ntihakagire umuntu ubavutsa ingororano zanyu, azibavukishije kwihindura nk’uwicisha bugufi no gusenga abamarayika..." Abakolosayi 2:18
Abamarayika ni bande ? bakora iki ? Ese baje gute? Bafite bushobozi ki? Intego yabo ni iyihe ? Ejo hazaza habo hazamera gute? Intego y’iri somo ni ugusubiza ibi bibazo.

Abamarayika ni ibiremwa

Ijuru ntabwo ari hejuru mu bicu, si ho abamarayika bicara bagacuranga inanga. Mu gitabo cy’Ibyahishuwe mu bice bine(4) haduha ishusho y’icyumba cy’ubwami bw’ijuru n’ibihakorerwa, aho abamarayika bane baba n’ibindi bizima makumyabiri na bine (24). Kandi muri cyo cyumba hasi hameze nk’inyanja y’ibirahure. Mu ijuru ntabwo abamarayika baba bicaye ahubwo barakora amanywa n’ijoro.

Mu 2 Abakorinto 12:2-4 hatubwira ko hari amajuru atatu. Tugendeye ku muco w’Abayuda, ijuru rya mbere ni ikirere, irya kabiri uba urenze ikirere aho tutareba n’amaso, irya gatatu ni aho Imana iba.
Iryo juru rya gatatu niryo abantu bose bahurira bavuga ijuru nyajuru, aho ni ho Imana iba. Imana yaremye ikintu kiri mu ijuru ryayo, irema ibigaragara n’ibitagaragara. Ibintu byose ari ibiri mu ijuru no mu isi , ibigaragara n’ibitagara byose byaremwe n’Imana. (Abokolosayi1 :16)
"Mwirinde mudasuzugura umwe muri aba bana bato. Ndababwira yuko abamarayika babo bo mu ijuru bahora bareba mu maso ha Data mu ijuru " Matayo 18:10
Iyi mirongo ibiri itwereka neza ko Imana yaremye buri kimwe cyose, harimo n’A
bamarayika bo mu ijuru. Abamarayika si Imana ntabwo ari n’abantu bapfuye hanyuma bakazuka. Nta nubwo ari abantu bazacirwa imanza mu buzima babayayemo.
Abamarayika ni ibiremwa by’umwuka

Ese Abamarayika ni iki ? Abamarayika ni ibiremwa by’umwuka bitagaragara nibwo butumwa dusanga mu Abaheburayo1:7,14(ihindura abamarayika bayo imiyaga n’abagaragu bayo ibahindura ibirimi by’umuriro. 14 Mbese abamarayika bose si imyuka iyikorera, itumwa gukora umurimo wo gufasha abazaragwa agakiza? )
Kubw’amahirwe bashobora kwiyereka abantu. Hari ubwo umuhanuzi Balamu atigeze abona marayika ariko Imana ituma indogobe yari imuhetse ibona marayika. Ubwo indogobe yabonaga marayika yaryamye hasi , ibyo bibabaza cyane Balamu akubita indogobe hanyuma Uwiteka ahumura amaso ya Balamu abona marayika afite inkota mu kiganza, ahagaze mu nzira apfukama imbere ye. Marayika w’Uwiteka abaza Balamu impamvu yakubise indogobe incuro eshatu(3) Kubara 22:27, 31:32.
Iyo abamarayika bagaragaye bigaragaza mu ishusho y’umuntu
" Umuntu w’Imana yaje aho nari ndi, kandi mu maso he hasaga n’aha marayika w’Imana .(Abacamanza13:6). Birashobokako bamwe muri twe baba baraganiriye cyangwa tukabona marayika. Ntimukirengagize gucumbikira abashyitsi, kuko bamwe bacumbikiye abamarayika batabizi (Abaheburayo 13:2).

Tuzakomeza ni gice cya kabiri kuri iyi nkuru"Ese hari icyo waba uzi ku biremwa by’abamarayika" Aho tuzasubiza ikibazo kibazo giti" Ese Abamarayika baremwe ryari? Ni ubuhe bwoko bw’abamarayika bwaremwe ? Tuzavuga no kubindi bizatuma dusobanukirwa n’ibiremwa bitangaje by’abamarayika.

Uwiteka abahe imigisha

Ismael [email protected]