Uwiteka afite uburyo bwe bwo gukora imirimo / Ev. Adda Darlene Kiyange

Ahubwo nzabirukana imbere yawe ni ruto ni ruto, ngeze aho uzagwirira ukazungura icyo gihugu. Kuva 23: 30

Hano, Uwiteka yari ari gusobanurira Abisirayeli uburyo bizamera nibagera mu gihugu yari yabasezeranije kugeramo bakagituramo ari cyo gihugu cya Kanani.

Imana yabanje kubihanangiriza ibabuza kuzivanga n’amahanga bazasangayo ibaha n’andi mategeko ajyana n’imibanire hagati yabo.

Uwiteka yageze ku ruhare rwe mu byo azabakorera, ati buriya rero abantu muzasangayo ntabwo muzabirukanira icyarimwe kugira ngo igihugu kitazaba umusaka kikuzura ibikoko bikabarya.

Ahubwo dore: Nzabirukana ni ruto ni ruto. Ngeze aho uzagwirira ukazungura icyo gihugu.

Mu rugendo rwo kubana n’Imana urimo uhura na byinshi. Kenshi ukibaza impamvu ya biriya na biriya.

Kubera iki Imana itaza ngo ikurireho icyarimwe ibibazo byose?

Ibyirukana "ni ruto ni ruto" kuko itegereje ko ugwira ukaba wabasha rwose kuzungura igihugu yakwemereye. Imana itegereje ko ubona kwaguka mu buryo yo izi ku buryo wabasha gufata Kanani yose.

Icyitonderwa Imana ntiyicaye gusa, oya, hari ibyo ishaka ko byubakwa cyane muri wowe. Ni ruto ni ruto. Icyo kigeragezo wagitsinda wihanganye ukagendana n’Imana.

Ihangane kandi uzirikane iri jambo ngo: "Nzabirukana imbere yawe ni ruto ni ruto ngeze aho uzagwirira..."

Ihangane n’aho uhasimbuke kandi Imana izaguha Kanani yakwemereye

Yesu aguhe umugisha!

Ev. [email protected]