Ninde ntama yazimiye Yesu yavugaga?

“Umwana w’umuntu yaje gukiza icyari cyazimiye.]

“Mbese muratekereza mute? Umuntu ufite intama ijana, imwe muri zo iyo izimiye ntasiga izo mirongo urwenda n’icyenda, akajya ku misozi agashaka iyazimiye?
Kandi iyo ayibonye, ndababwira ukuri yuko ayishimira cyane kurusha izo mirongo urwenda n’icyenda zitazimiye.

Nuko So wo mu ijuru ntashaka ko hagira n’umwe muri aba bato urimbuka.”(Matayo18:11-18)

Umwami Yesu yavuze umuntu waba afite umukumbi w’Intama, maze imwe muri zo yazimira, akaba yasiga izisigaye akajya gushaka iyo imwe yabuze kugeza igihe ayiboneye. Yesu yakomeje avugako igihe ayibonye agira ibyishimo byinshi cyane kuruta izo zasigaye zitazimiye.

Yesu yongeyeho ko n’umutima w’Imana ariko umeze: Ko idashaka ko hagira n’umwe uza kuri Kristo wapfa.

Abenshi muri twe mu nsengero batwigishije ko icyazimiye bivuga abantu bari hanze y’itorero. Abantu batahuye na Kristo bagakomeza kuba mu cyaha , n’ubwo bishobora kuba ari byo, kandi bikaba nanone ari abantu baza kuri Yesu hanyuma bitewe n’impamvu zitandukanye bakamuvaho.

Turabonako intama yari mu mukumbi ariko yarazimiye . Aho kuyireka ngo igende ihere iribwe n’inyamaswa, ahubwo yagiye kuyishaka, asiga izindi mirongo urwenda n’icyenda, arayishakashaka kugera ubwo ayiboneye.

Intama zazimiye ni bande uyu munsi ?

Ese waba uzi beneso babaga mu nzu y’Imana bavuye mu rusengero, bakaba barasubiye mu nzira zabo za kera? Ese uzi abavandimwe bakundaga kujya mu rusengero ariko kuko hari ababakomerekereje mu rusengero bagahitamo gutazagaruka mu rusengero?

Twese hari intama zazimiye dukwiye gushakashaka: Abari abashumba baguye mu cyaha maze bakabakwena aho kubafasha kugaruka, benedata bahisemo gukomeza gukora ibyaha kandi bakaba badashaka kubireka, abari abaririmbyi babihagaritse kubera batutswe n’abari mu nsengero, abagize urusengero bari bamenyereye gutanga ariko bakagenda kuberako abantu bo mu itorero babiyegereza babakurikiyeho amafaranga yabo gusa. Urutonde ni rurerure rw’abagiye ariko abo bose bakundwa n’Imana kandi dukwiye kubagarura.

Nshuti , Imana ni Imana y’agakiza. Ni umwungeri ukomeye. Irishima iyo intama imwe yazimiye ibonetse. Haba ibyishimo kandi ni nako bimera iyo hari umwe mu bana wazimiye ugarutse .
« …..yagera mu rugo agahamagara incuti ze n’abaturanyi be akababwira ati ‘Twishimane kuko mbonye intama yanjye yari yazimiye. »( Luka15 :6)

Ni inshingano zacu kugarura abaretse Imana, tukabagarura ku butumwa bwiza bwa Yesu Kristo.

Sophie @agakiza.org