Umuramyi Vedaste N. Christian mu mirimo yo gutunganya umuzingo we w’indirimbo zihimbaza Imana

Umuramyi Vedaste Niyondora Christian uririmba indirindo zo kuramya no guhimbaza Imana aratangaza ko ahugiye mu gikorwa gikomeye cyo gukora umuzingo wa mbere w’indirimbo z’amajwi zizasohoka mu mpera z’uyu mwaka.
Ibi Vedaste yabitangaje mu kiganiro yagiranye na IBYISHIMO.Com dukesha iyi nkuru kuwa 15 Kanama 2018.

Uyu muririmbyi wamenyekanye mu ndirimbo zitandukanye nka Uzi Gukunda yakunzwe n’abanyarwanda batari bake yavuze ko nyuma y’igihe kirekire aririmba ariko afatanya n’abandi muri korali, ngo ubu icyo ahugiyeho ni ugukora umuzingo w’indirimbo wa mbere noneho adafatanyije na Korari.

UMVA UZI GUKUNDA YA VEDASTE

Uyu muramyi avuga ko icyamuzanye muri muzika ihimbaza Imana ngo ni ukubwiriza inkuru nziza y’agakiza, abaguye bakagarukira Imana kabone n’ubwo yaba umuntu umwe uhindutse kubw’ubutumwa Imana yamunyujijemo, ngo byamunezeza cyane.

Yagize ati: “ Intego nkuru numva mfite ni uko nabona umuntu n’iyo yaba umwe wakijijwe kubera ubutumwa bunyuramo buva ku Mana. Hanyuma ikindi ni uko nabona umuntu ni yo yaba umwe wari ucitse intege ariko akaba yakomeye muri uru rugendo kubera ubutumwa bwanyuzemo, ni yo ntego numva mfite naho ubundi ibitari ibyo numva nshobora kuba naba natandukiriye.”

Yakomeje atangaza ko mu gihe gito amaze aririmba ku giti cye, amaze gushyira hanze indirimbo 3 z’amajwi zirimo Uzi gukunda, Ubikora ute na Uri Uwera kandi ngo ibikorwa byo gukora izindi ndirimbo bikomeje ku buryo ahamya ko mu mpera z’uyu mwaka azashyira ahagaragara umuzingo w’indirimbo z’amajwi.
IZINDI NDIRIMBO VEDASTE YAMAZE GUSHYIRA AHAGARAGARA

UBIKORA UTE

URI UWERA
Mu butumwa yageneye abahanzi baririmba indirimbo zo guhimbaza Imana ngo ni uko intambwe yose Imana ibateje yajya iba iyo kuyihesha icyubahiro aho guhirimbanira inyungu zabo bwite.

Ibi abishingira ku kuba hari abahanzi baharanira kubaka izina ryabo ngo bamenyekane kuruta kugaragaza Imana ku bantu batarayimenya, cyangwa se bamara kugera aho bifuzaga bagahusha intego bahamagariwe gukora bigatuma bamwe banabivamo kubw’inyungu runaka.

Vedaste yavuze ko icyiza ari uko bakomeza kuzirikana ubugingo bwabo n’ubw’abo Imana yabatumyeho aho gukurikira inyungu kuko ibindi izabibaha ku buntu bwayo.

Mu mpera z’uku kwezi ngo arateganya gushyira hanze indi ndirimbo kuri ubu irimo kunonosorwa mu nzu itunganya umuziki mu mujyi wa Kigali.
Uyu muramyi yakunze kugaragara cyane atera indirimbo zitandukanye nka Gologota ya Korali Besalel yo mu itorero rya ADEPR MURAMBI Paruwasi ya Nyanza-Kicukiro ari na ho asanzwe ateranira.

Uretse gukora indirimbo, uyu muramyi ngo aranitegura gushyira ahagaragara igitabo yanditse akacyita “Bapfa kurera” na cyo kiri hafi kurangira gukosorwa.

Umuramyi Vedaste N. Christian yatangiye kuririmba akiri muto nyuma aza gukomereza umuhamagaro we muri korari Besalel ariko ubu amaze igihe gito atangiye kuririmba wenyine, nubwo akiririmba no muri korari.

ZIMWE MU NDIRIMBO ZAKUNZWE CYANE VEDASTE YAKUNZE KUGARAGARA MO

UBUZIMA BUSHYA ALL STARS

GOLGOTHA BY BESALEL CHOIR