Umumaro utangaje w’ubuki ku mubiri w’umuntu.

Ubuki ni ikiribwa gikorwa n’inzuki kandi kigizwe n’isukari inzuki zivana mu bihingwa bitandukanye,Uhereye kera kose, ubuki bwakoreshwaga nk’ikiribwa, ku rundi ruhande bugakoreshwa nk’umuti w’indwara zitandukanye zibasira umubiri w’umuntu.
Iyo ubuki bukoreshejwe mu cyimbo cy’isukari ikorerwa mu nganda, bugirira umubiri akamaro gakomeye cyane kuko buba bwifitiye isukari y’umwimerere 100%.

Dore umumaro w’ingenzi ubuki bufitiye umubiri wacu:

Ubuki bugabanya umuvuduko w’amaraso ukabije.

Kurya ubuki kenshi bifasha mu igabanyuka ry’umuvuduko ukabije w’amaraso kuko bwiganjemo antioxydants zishinzwe kugabanya umuvuduko w’amaraso, uyu muvuduko iyo wabaye mwinshi utera indwara y’umutima.

Ubuki buvura ubushye kandi bukomora ibikomere

Kuva kera kose ubuki bwakoreshwaga n’abantu bo muri Egiputa mu kuvura ibikomere kugeza magingo aya burakoreshwa mu bihugu bitandukanye. Iyo ubusize ahantu wakomeretse burakuvura kimwe n’izindi ndwara zitandukanye z’uruhu.

Ubuki ni umuti w’ inkora ku bana.

Gukorora ni ikibazo rusange ku bana kuko giterwa n’icyo bita infections. Izo infections zibuza umwana gusinzira kandi n’ababyeyi ntibasinzira umwana atameze neza. Mu gihe cy’inkorora, ubuki ni amahitamo meza ku bana bari hejuru y’umwaka umwe.

Ubuki buvura indwara zibasira uruhu.

Ku Bantu bagira ibibazo bitandukanye byerekeranye n’uruhu: gushishuka, kubaburwa n’izuba, ibiheri n’ibindi, ibi byose iyo ufashe ubuki ukabusiga aho urwaye buragufasha cyane.

Ubuki buvura ubugendakanwa

Ubugendakanwa ni indwara ituma mu kanwa hacika ibisebe. Iyo ufashe ubuki ugakuba mu kanwa ahari ibisebe biba umuti mwiza cyane kandi uburwayi bukira mu gihe gito.

Ubuki ni ikiribwa kiryoha

Ubuki ni icyo kurya cyuje uburyohe ntagereranywa kandi cyuzuyemo intungamubiri z’amako yose kuko mu gihe cyo guhova, inzuki zijya mu bimera bitandukanye, amafu y’ubwoko bwose, ibinyobwa bitandukanye ugasanga ubuki burushijeho kugira ubudahangarwa.

Nta gushidikanya rero ubuki ni ingirakamaro mu mubiri w’umuntu, ni byiza kubukoresha mu gihe ari ngombwa mu rwego rwo kugira amagara mazima.
Source: fitday.com