Umenye neza uwo uriwe ntacyakongera kugutera ubwoba

1 yohana 4:4 "Bana bato, muri ab’Imana kandi ba bandi mwarabanesheje, kuko uri muri mwe aruta uri mu b’isi."

Yesu ashimwe kandi ashimwe, muri uyu murongo harimo ibintu bibiri by’ingenzi cyane, ngo muri ab’Imana, kandi ngo uri muri mwe aruta uri mu b’isi, yego, twe turi ab’Imana kandi uri muri twe aruta uri mu b’isi. Twebwe igisekuru cyacu cyarahindutse nyuma yo kwizera Yesu kristo, pawulo arabivuga

2 Abakorinto 5:17 "Umuntu wese iyo ari muri kristo aba ari icyaremwe gishya, ibya kera biba bishize. dore byose biba bihindutse bishya."

Cya gihe twakiriye Yesu twabaye ibyaremwe bishya tubyarwa ubwa kabiri, niyo mpamvu turi ab’Imana ntabwo turi aba satani, kuko Yesu yagaragaje ko abantu batamwemera aba ari aba satani!

Yohana 8:44 "Mukomoka kuri so satani, kandi ibyo so ararikira ni byo namwe mushaka gukora. uwo yahereye kera kose ari umwicanyi, kandi ntiyahagaze mu by’ukuri kuko ukuri kutari muri we. navuga ibinyoma, aravuga ibye ubwe kuko ari umunyabinyoma, kandi ni se w’ibinyoma."

Yesu agaragaje ko hari aba satani, kuko bashakaga gukora nk’ibyo satani akora rero ni aba satani, na Yohana yarabivuze!

1 Yohana 3:12 "Tutamera nka kayini wari uw’umubi, akica murumuna we. mbese icyatumye amwica ni iki? ni uko ingeso ze zari mbi, naho iza murumuna we zikaba nziza."

Ngo kayini yari uw’umubi (satani), rero muri iyi si, iyi turimo aho utuye hari aba satani, bakora nk’ibyo satani akora,ariko twe Yohana yatubwiye ngo muri ab’Imana, kuba turi ab’Imana nicyo cyatumye Imana iba muri twe, yego Imana itura muri twe, bigatuma tunesha buri kintu cyose, Yohana yavuze ngo uri muri mwe, aruta uri mu b’isi cyangwa mu ba satani, nicyo gituma ukwiriye kubaho unesha kandi ntukagire ubwoba kuko uri kumwe n’imbaraga zinesha byose!

1 Samweli 17:45 “Dawidi abwira umufilisitiya ati “wanteranye inkota n’icumu n’agacumu, ariko jyewe nguteye mu izina ry’Uwiteka nyiringabo, Imana y’ingabo za isirayeli wasuzuguye.”

Mwenedata, wabonyeko Dawidi yari azi neza imana iba muri we? ku rugamba Dawidi yamenyeko Imana iba muri Dawidi ibasha gutsinda goliyati, Dawidi yakoreraga Imana y’ukuri ariko goliya yakoreraga bali, rero uri muri Dawidi yagombaga gutsinda uri muri goliyati, si Dawidi na goliyati bagiye kurwana, oya, ahubwo ni ababarimo( uwiteka na goliyati) !

2 Ingoma 32:7 “Nimukomere mushikame, ntimutinye kandi ntimukurwe umutima n’umwami wa ashūri cyangwa ingabo ze zose ziri kumwe na we, kuko iyo turi kumwe ikomeye iruta abari kumwe na we.”

Hezekiya atewe n’ingabo za ashuri, Senakeribu afite ingabo nyinshi, Hezekiya nta mbaraga zigaragara afite zahangana na Senakeribu umwami wa ashuri ariko hezekiya yibutseko hari imana ikorana na bo iruta amaboko ari kumwe na Senakeribu, ahita abwira abaturage ngo uri kumwe natwe arakomeye aruta abari kumwe na we, amen!

Mwenedata, uri muri wowe aruta izindi mbaraga zose zakurwanya zikorera mu isi, Imana ituye muri wowe iruta kure ibibazo by’ubukungu, iruta indwara z’ibyorezo, iruta imbaraga z’abakonikoni…,iyi si dutuyemo irimo ab’umubi n’abandi b’imana, ariko twebwe turi ab’imana kandi uri muri twe aruta uri mu b’umubi!

Yesu aguhe umugisha