Ujya usubiza iki, iyo ubajijwe ibibazo nk’ibyabajijwe Mukirisito. (Igice 1 )?

Mukristo arangirwa inzira

Umwanditsi w’iki gitabo yitwaga Yohana Bunyan. Yavukiye mu Bwongereza mu mwaka wa 1628. Se yari umucuzi, kandi nawe yize uwo mwuga. Yize imyaka mike gusa mu ishuri ry’abana, yiga gusoma no kwandika gusa. Yari afite ubwenge bwinshi bwa kavukire, ariko nta buryo yabonye bwo kwiga byinshi. N’ubwo yari azi kwandika no gusoma, imyandikire ye iteka yarimo amakosa menshi. Akiri umusore, Yohana yakundaga gukora ibyaha cyane, ariko yabikoraga umutima umurega, azi ko Imana izabimubaza.

Impamvu yo kwifashisha ibibazo Yohana Bunyan yabajijwe, ni uko usanga akenshi amakosa bantu bagwamo ahura nta gishyashya. Urugendo rw’ibyo Yohana Bunyan yanditse, umukirisito wese ararukora kugeza ku munsi wa nyuma w’ubuzima. Gusa ikibabaje ni uko abenshi bagiye batsindwa batararusoza.

Abafilipi 3: 12-14 “Si uko maze guhabwa cyangwa ngo mbe maze gutunganywa rwose, ahubwo ndakurikira kugira ngo ahari mfate icyo Kristo yamfatiye. Bene Data, sinibwira yuko maze kugifata, ariko kimwe cyo nibagirwa ibiri inyuma, ngasingira ibiri imbere, ndamaranira kugera aho dutanguranwa, ngo mpabwe ingororano zo guhamagara kw’Imana muri Kristo Yesu kwavuye mu ijuru.” Ibi bitwerekako dukwiye iteka gukora dufite intego yo kuzabona ingororano zo guhamagara kw’Imana.

Ibyo utsinda hari abo byananiye kandi ibyo utsindwa hari abandi babishoboye ndetse babihererwa ibihembo. Bimwe mu bintu byahangayikisha benshi mu gihe babiha umwanya bakabitekerezaho, ni ukunanirwa ibyabandi bashoboye, gutsindirwa ahabandi batsindiye kandi gukora neza ibyo abandi bakoze bitagombera amafaranga ! Bidasaba amashuri ngo wige uminuze ! Bidasaba uburanga ! Bidasaba imiryango ikize ! Bidasaba urubyaro ! Bidasaba imodoka !

Imana ikoresha ikibazo ishaka kumenya amahitamo yawe kuko ntabwo yatuma ukora ikintu atagizemo uruhare, nta gitugu igira, niyo mpamvu uzajya wumva ijwi mu mutima wawe, ugenda mu nzira cyangwa uryamye, uhazagaze cyangwa uri mukazi uzumva ijwi ! Uzumva ijwi rikubaza ibyo urimo uvuga ! Uzumva ijwi rikubaza aho uri !.

Uziko nyuma yuko Adamu na Eva bamara gukora icyaha bakarya ku mbuto z’igiti babujijwe bumvise imirindi bihisha mu maso y’Imana hanyuma bumva ijwi “Uwiteka Imana ihamagara uwo mugabo, iramubaza iti “Uri he? (Itangiriro 3:9)

Birababaje ko kuba umuntu ataziko ijisho ry’Imana ribona nta hantu na hamwe umuntu yaryigobeka ! Maze Daniyeli we yavuzeko iha abazi kwitegereza kumenya kandi ihishura ibihishwe, ubwo se Imana iha ububasha abantu bakamenya ibihishwe yo yananirwa kureba ibintu biri ahatagerwa? Imana izi byose, ishobora byose kandi ibera hose icyarimwe !

Muziko ikiganiro cya mbere cyabanjirijwe no gukora icyaha, cyabanjirijwe n’ikibazo ! “Ibaza uwo mugore iti “Ni ukuri koko Imana yaravuze iti ‘Ntimuzarye ku giti cyose cyo muri iyi ngobyi’?” Itangiriro 3: 1

Nta kintu na kimwe uzakora utabanje kumva ijwi rikubaza, kandi nugera aho ubazwa ujye umenyako uri mu nzira ebyiri, ushobora gutsindwa cyangwa ugatsinda ukitwa umugabo, watsindwa ukitwa ikigwari. Kugeza uyu munsi system yo kubaza niyo ikoreshwa ngo bamenyeko ibyo ugiye gukora ubishaka cyangwa ubifitiye ubushobozi kabone naho waba ufite igipapuro cy,ibyemeza.

Yesu yarafite ubushobozi bwo gusoma ibiri ku mitima y’intumwa ze, rimwe yarababwiye ati “mwitonde mutagwa mu moshya” ikindi gihe ababwirako umugambanira bari kumwe” ariko yirengagiza ukuri azi neza abaza Petero inshuro eshatu ati “Petero urankunda” mu bintu byoroheye Petero ni ugusubiza ati “Yego” Niwumva ijwi rikubaza ujye umenyako uri mu mayira abiri kandi bigoye guhitamo iyukuri kabone nubwo waba utabibona.

Muri iyi nkuru turashaka kuvuga ku bibazo Mukirisito yabajijwe twumve niba nawe warabibajijwe , nusanga icyo utarabazwa umenyeko uzakibazwa, ese uzasubiza iki ?

1.Urahitamo kureka iki? Kureka ibyaha byawe ukazajya mu ijuru, cyangwa kubikomeza ukazajya muri Gehinomu?: Mu gitabo cy’umugenzi haratubwira hati :“Agira ubwoba bwinshi; maze ariheba, yibwira ko atagishobora gukizwa.” Wowe iyo uhuye ni iki kibazo wiyumva ute ? Yohana yahuye n’abagore batatu bavuga ubuhamya bwabo bwo kubababrirwa na Yesu, yunvako bihannye ibyaha ariko ntiyahita akizwa. Kuko gukizwa ari urugendo ntiwakizwa uwo munsi burundu niyo mpamvu bigusaba guhora ugerageza.

2.Ngire nte?: Hano mu gitabo bavuga umugabo waruhagaze afite igitabo mu ntoki kandi ahetse umutwaro umuremereye cyane, maze yibaza iki kibazo ati “Ngire nte?”. Ese nawe ujya uhura ni iki kibazo ? Dore igisubizo Bibiliya itanga. “Petero arabasubiza ati “Nimwihane, umuntu wese muri mwe abatizwe mu izina rya Yesu Kristo ngo mubone kubabarirwa ibyaha byanyu, kandi namwe muzahabwa iyi mpano y’Umwuka Wera, Ibyakozwe 2:38); maze arabasohokana arababaza ati “Batware nkwiriye gukora nte ngo nkire? 1Baramusubiza bati “Izere Umwami Yesu, urakira ubwawe n’abo mu rugo rwawe.”( Ibyakozwe 16:30-31)

3.Uratakishwa n’iki? : Iki kibazo yakibajijwe na MUBWIRIZABUMWA, aramusubiza ati: “Mutware, nabwirijwe n’iki gitabo mfite mu ntoke, yuko naciriweho iteka ryo gupfa, kandi ubwa nyuma nkaba mbikiwe kujya mu rubanza (Abaheb 9:27). Ese nawe hari ubwo ujya ugeraho ugahangayikishwa nuko hari icyakwambura ubugingo ukazarimbuka ? Ibi bihe bibaye bitakubaho waba wirengangije intambara urwana yo kugirango uzabone ubugingo buhoraho, hari imbaraga zishaka kwica ubugingo kandi na Yesu yavuzeko dukwiye gutinya ikica ubugingo kurusha ibyica umubiri kuko n’ubundi umubiri uzapfa. Mukirisito yatakishijwe nuko yumvaga adashaka gupfa (byiteka si urupfu bw’umubiri). Waba wowe ushaka gupfa niba utajya utaka iyo ubonye ibishaka kukwica ? Umukirisito wese w’ukuri agera muri ibi bihe kuko mu isi si aho kudamararira , kuva kera ubwami bw’Imana buratwaranirwa intwarane zibugishamo imbaraga, jya utaka ariko utakire Imana iguhe na MUBWIRIZABUMWA.

4.Ni iki gituma udashaka gupfa, ko ubu bugingo bufite ibyago byinshi?: Iki kibazo MUBWIRIZABUTUMWA yakimubajije, Mukirisito amaze kumusubizako adashaka gupfa. Mukirisito aramusubiza ati: “Ni uko ntinya yuko uyu mutwaro mpetse mu mugongo uzanzika, ukangeza hasi y’ikuzimu, nkagwa ahatanyiteguriwe muri Gehinomu (Yesaya 30:33). Gupfana ibyaha ni agahinda kuko biganisha muri gihenomu. Niyo mpamvu umuntu akwiye kwezwa buri munsi uko bwije nuko bukeye. Urupfu ntawarusubizayo rwaje ariko ku mukirisito urupfu rw’iteka ni umubabaro.

5.Ubwo umeze utyo, ni iki kiguhagaritse aho?: Yamubajije iki kibazo nyuma yo kumubona ahagaze yabuze icyerekezo ,Mubwirizabutumwa amuha umuzingo w’igitabo cy’uruhu, wanditsweho ngo “Nimuhunge umujinya uzatera”. (Mat 3:7). Hari ubwo umuntu ahagarara mu manegeka aho adasenga, ntanakizwe aho niho Mukirisito yari ahagaze. Hari ubwo uzaba uri ahantu atagenewe ukazajya uhora wumva kenshi ijwi mu mutima rigusaba kuhava kuko ntacyo uhakora cyungura ubwami bw’Imana. Hari ubwo umuntu akizwa hanyuma agasubira mu byo yahozemo , mu kabyiniro no mu kabari ariko hari ijwi ridashobora kuguha amahoro kabone nubwo umuntu yaryirengagiza. Hari utangira urugenda yageramo hagati akabura umuyobora akaba azi neza ko inyuma yavuye ari mu rupfu ariko nabwo imbere aho yerekeza nta cyerekezo cyaho abona, ikiza ni uguhunga, kuko ba ntawe uzireguzako atahuye na MUBWIRIZABUTUMWA,ku ma radio,ku ma televiziyo,mu byumba by,amasengesho,mu nsengero,mu bitaramo,mu mihanda n,ahandi.

Tuzakomeza ubutaha tubereka ibibazo Mukirisito yabajijwe , ni ibisubizo byagiye biboneka. Turebere hamwe uko umukirisito nawe ufite urugendo ruva mu isi rujya mu ijuru uko akwiye kwitwara, kugirango azashyike amahoro.