Ubwihisho bw’Imana ishobora byose.


ZABURI 91.1
Uba mu rwihisho rw’Isumbabyose,azahama mu gicucu cy’Ishoborabyose.
Urwihisho ni ahantu ushobora kujya maze igishaka kukugirira nabi kikakubura, naho mu gicucu ho ni ahantu munsi y’ikintu runaka(igiti, inyubako,..) kinini, kenshi haba hari amafu, kuburyo iyo uhari uticwa n’izuba.

Nk’uko Mose yarinzwe na nyina ariko igihe cyagera akamurekura, ariko akisanga mu rwihisho bw’Isumbabyose (Kuva 2.3),Ni ko nawe abantu bajya bakurekura ariko bakisanga bakurekuriye muri urwo rwihisho bw’isumbabyose(Zaburi 27.10);
Kandi burya, nk’uko Imana yahishe Mose mu nzu ya Farawo kandi ari we wamuhigaga (Kuva 2.10), ni ko nawe uyu munsi Imana itajya iguhisha kure y’ibiguhiga: abantu bo bahisha ahiherereye, ariko Imana yo ihisha ku karubanda!
Ni yo mpamvu ushobora gusanga uburyo ubayeho uyu munsi ari bwo Imana iguhishemo bitewe n’ibiguhiga ibyo ari byo, kuko inzira zayo atari nk’izacu (Yesaya 55.8):

Igihe Petero yari arindiwe mu nzu y’imbohe ngo buke yicwe, yari aboheshejwe iminyururu ibiri, asinziriye hagati y’abasirikare babiri; ni bwo marayika yaje amukomanga mu mbavu, atwara ibitekerezo by’abo barinzi, aramusohokana, inzugi zikajya zikingura (Ibyakozwe n’intumwa 12.6).Iyo rero wageze mu rwihisho rw’Isumbabyose, nta kintu na kimwe kibasha kukwitambika imbere ngo kikubuze gutambuka (Zaburi 23).

Yona na we igihe yari mu ngando ye ategereje kureba ibyago byari kuba i Nineve niba banze kwihana, Imana yamumereje uruyuzi rumubera igicucu, ariko igihe kigeze haza inanda irarurya ruraraba izuba rimugeraho (Yona 4.7):
Imana rero ijya inemera ko izuba rikwica, ariko ku ruhande rwawe ujye uba maso, kuko akazi ufite cyangwa ubuzima bwiza ufite uyu munsi bushobora kuba ari uruyuzi Uwiteka yakumereje;nuko rero ujye ururindisha amasengesho menshi, kuko inanda ishobora kuza ikarurya rukuma bidaturutse k’Uwiteka ahubwo bitewe no kudamarara kwawe, bigatuma uhura n’ingorane (Gutegeka kwa kabiri 28.15): ariko niwigumira mu rwihisho rw’isumbabyose nta cyo uzaba!

[email protected]