Ubwenge bw’inzoka, icyitegererezo ku bakristo.

Inzoka ni imwe mu nyamaswa ziri mu bwoko bw’ibikururanda, igira amacandwe yuzuyemo ubumara, inzoka yuje ubuhanga butangaje: amakenga, kwihisha, komora uruguma no kwiyuburura. umuntu ashobora kuyigiraho byinshi byamufasha mu mibereho ya gikristo.

Inzoka igira amakenga kuko iba hagati y’abanzi tuzi ko igihe yashukaga Eva agacumura, hahise havuka urwangano hagati yayo n’umuntu. Iyo ayitanze kuyibona arayica nayo yamutanga ikamurya. Ikindi kandi inzoka ntijya imenya imiryango yayo kuko iyo imaze gutera amagi irigendera amagi akazituraga hakavamo utuyoka duto natwo buri kamwe kagomba kwimenya kakibeshaho. Aha umukristo yakuramo isomo ryo kugira amakenga kuko ibishashagirana byose si zahabu. Umwanzi Satani ahora amugenza kandi aza mu ishusho y’ikintu cyiza kugirango amwiyoberanyeho amuvane mu gakiza.

Inzoka izi kwihisha ku kigero cyo hejuru kandi yihisha mu byatsi bisa nayo ku buryo kuyibona bitoroshye. Inyigisho umukristo akwiriye gukura ku nzoka ni ukujya yihisha ahasa nawe mbese akisanisha n’abakristo bagenzi be bagafatanya gusenga no guhugurana mu gihe atewe n’amakuba amugose impande zose, bizatuma ibimuhiga bitabasha ku mubona.

Inzoka zifite ubushobozi bwo komorana ibikomere. Iyo zihuye ari ebyiri zakomeretse, imwe ihuha ku gikomere cy’iyakomeretse yarangiza igaciraho amacandwe yayo aba yuzuyemo ubumara twagereranya n’icyomoro. Icyi ni ikigisho gikomeye ku bakristo nabo baba bagomba komorana inguma mu gihe hari mugenzi wabo wakomeretse, mu isi ni ugufata igihe mu ntambara niba umuntu akomerekeye ku rugamba bagenzi be bamufashe ibishoboka byose kugeza akize.

Mu gihe inzoka isumbirijwe igerageza guhisha umutwe. Bishatse kuvuga ko yizinga umutwe ikawutwikira ku buryo niyo bayikubise hangirika ibindi bice bigize umubiri wayo ubuzima bugakomeza. Ikindi kandi iyo itashye ivuye guhiga mbere yo kwinjira mu mwobo ibanza kwihumuriza ngo yumve ko nta kintu kinjiyemo gishobora kuyigirira nabi. Umukristo nawe akwiye kurwana arinda agakiza ke niryo zingiro ry’ubuzima bwe.

Inzoka ifite ubushobozi bwo kwiyuburura. Iyo ishaje itagifite imbaraga zo guhiga, ijya ahantu hayonyine ikiyicisha inzara (ikanga kurya no kunywa) iragenda ikananuka kugeza igihe wa mubiri w’nyuma ushaje ushiraho igahinduka nshyashya igatangira ubuzima bushya. Mu gihe umukristo yumva intege zimushizemo akabona ntacyo agishoboye, ni byiza kwiherera agasenga Imana akayisaba imbaraga kandi iyo abikoze abikunze ahava ahindutse mushya. Mwibuke ko na Yesu yiherereye mu butayu agasenga amasengesho y’iminsi 40 akahakura imbaraga zamufashije kunesha umwanzi satani (Luka 4:2)

Bibiliya ubwayo ihamya ko inzoka igira ubwenge ntagereranywa. Mu butumwa bwiza bwanditswe na Matayo 10: 16, “dore mbatumye muri nk’intama hagati y’amasega, nuko mugire ubwenge nk’inzoka”

Muri macye, tubonye ko inzoka igira ubwenge bwinshi kandi ari inyamswa, twebwe abantu dufite umutima nama kandi Imana yaduhaye inshingano yo gutegeka ibiri mu isi, ni inshingano ya buri mukristo gushakashaka uko twakunguka ubwenge kandi nitubusaba Imana izabuduha tubashe guhangana n’imitego ya satani.