Ubuzima bufite iyihe ntego (Umunsi 1) ?

Rick Warren ni umupasiteri w’umunyamerika akaba n’umwanditsi w’ibitabo uzwi ku isi yose

Nshuti zacu dukunda kandi duhora twifuriza ibyiza, mutweremere nkuko dusanzwe dufatanya muri byinshi , dufatanye mu rugendo dutangiye rw’iminsi mirongo ine, dusome iki gitabo cyitwa”UBUZIMA BUFITE INTEGO” cyanditwe na Rick wallen. Dutangiye twibaza intego y’ubuzima kuko ni ikibazo kibazwa n’abatari bake ku isi, kandi hamwe n’Imana ibinyujije mu byanditswe nta gushidikanya tuzasoza twamaze kubona igisubizo twibaza.

Rick Warren ni umupasiteri w’umunyamerika akaba n’umwanditsi w’ibitabo. Ni umuyobozi w’Itorero ryitwa Saddleback Church, akaba ari na we warishinze. Iri torero ribarizwa muri Leta ya California rika riri mu matorero ane akomeye muri Leta zunze ubumwe za Amerika. Ibitabo bya Rick Warren byahinduye ubuzima bwa benshi. Abantu benshi bamuzi ku gitabo cyitwa Ubuzima bufite intego”, ari nacyo tugiye kuzajya tubagezaho umunsi ku munsi, kugeza kirangiye. Gusa hari n’ibindi bitabo byinshi yanditse.

Umunsi wa mbere 1 “Mbere na Mbere Imana”

“Kuko ibintu byose, byose hadasigaye na kimwe, ari byo mu ijuru cyangwa ibyo mu isi, ibiboneka n’ibitaboneka…buri kintu cyaremwe ba we kandi muri we ni ho bibonera ibisobanuro” (Abakolosayi 1:16(Msg)

“Uretse wemeye ko harihon Imana, ubundi kwibaza intego y’ubuzima ntacyo byakugezaho” (Bertrand Russell, umuhakanyi)
Ntubereyeho gukora ibyo wishakiye.

Intego y’ubuzima bwawe isumba kure gushaka gusohoza imigambi yawe, kugira amahoro y’umutima cyangwa kwishimira kubaho. Isumba kure umuryango wawe, umurimo ukora cyangwa ibyifuzo byawe n’ibyo wimirije imbere byose. Niba ushaka kumenya icyatumye uri ku isi, ugomba gutangirira ku Mana. Wavutse kuko yabigambiriye kandi uvuka ngo usohoze imigambi yayo.

Intego y’ubuzima yabereye abantu amayobera kuva imyaka ibihumbi n’ibihumbi. Ariko byose biterwa n’uko iteka dutangira gushakira ahatariho- twiheraho. Tubaza ibibazo bitugurakaho ngo “Ese ndashaka iki? Ese ubuzima bwanjye nzabukoresha iki? Intego zanjye ni izihe ? Ibyifuzo byanjye ni ibihe ? Ejo hazaza nzaba nageze ku ki ? ariko kwirebaho ntabwo bizigera biduhishurira intego y’ubuzima bwacu.
Bibiliya iravugango “Uwiteka niwe uyobora ubuzima bw’ibyo yaremye byose,ubuzima bw’umuntu wese buri mu butware bwe” Yobu 12:10 Nubwo ari ko ibitabo bigurwa na benshi bivuga , na sinema ndetse n’amahugurwa menshi akaba ari ko yigisha, ntabwo uzigera utahura intego y’ubuzima bwawe uyishakira muri wowe. Kenshi twagiye tunabigerageza kuko Atari wowe wiremye, ntushobora kwisobanurira icyo waremewe ! Nguhereje igikoresho gihimbwe vuba utigeze utigeze ubona na rimwe, ntabwo wakwisobanurira icyo cyakorewe kandi nacyo nticyashobora kukubwira icyo cyakorewe. Umuhanzi wacyo cyangwa igitabo igitabo gisobanura imikorere yacyo nibyo bishobora kukubwira icyo cyagenewe gukora.

Ntabwo uzigera uhishurirwa intego y’ubuzima bwawe uyishakamo. Ugomba gutangirira ku Mana , umuremyi wawe. Uriho kuko Imna ishaka ko ubaho. Waremwe n’Imana kandi uremerwa Imana , Igihe cyose uzaba utarasobanukirwa ibyo ngibyo ntabwo ubuzima bwawe buzasobanuka. Mu Mana honyine ni ho tumenyera neza inkomoko yacu, icyo turi cyo, icyo tumaze, intego yacu, agaciro kacu ndetse n’iyo tugana. Izindi nzira zose ntaho zizatugeza.

Abantu benshi bagerageza kwitwaza Imana ngo bagere ku ntego zabo bwite, ariko ibyo ni ugucurika ibintu kandi ntacyo bizabagezaho. Warewe Imana ntabwo Imana ariyo yaremewe abantu, kandi intego y’ubuzima ni ukureka Imana ikagukoresha ngo isohoze imigambi yayo, si wowe ugomba kuyikoresha ngo usohoze imigamb yawe. Bibiliya iravugango “Guhora uhanze amaso kuri wowe ubwawe ni nko gufata inzira itagira aho ikujyana, ariko gutumbira Imana bidukura mu mfunganwa bikadushyira ahagutse, Bizana umudendezo” (Abaroma 8:6)

Nasomye ibitabo byinshi bivuga ku guhishurirwa intego y’ubuzima bwanjye. Byose wabishyira mu murongo umwe w’ibitabo byigisha “Kwirwanaho” kuko byigisha bihereye kuri wowe ubwawe. Bene ibyo bitabo byo kwirwanaho, kabone n’iyo byaba byitwa ibya gikirisito, usanga kenshi bikurikira intambwe zisa zikujyana ku kubona intego y’ubuzima bwawe. Birakubwira ngo “Banza utekereze ibyo ushaka kugeraho byose.Usobanure neza ibyo uha agaciro kuruta ibindi. Wihe intego. Umenye neza ibyo uzi gukora neza. Wihe intego ziri hejuru. Uhaguruke uziharanire ! uzirikane kugira gahunda. Wizere ko ntakizakubuza kugera ku ntego wihaye. Kandi ntuzigere ucogora.

Simpakana ko bene izo izo nama zigeza abantu kuri byinshi. Intego yose wihaye mu buzima ushobora kuyigeraho uramutse uyishyizeho umutima wawe wose. Ariko kugera kuri byinshi no gusohoza intego z’ubuzima bwawe ntabwo ari kimwe ! Ushobora gusohoza intego zose wihaye , ukaba ikirangirire kimenywa na bose mu maso y’isi, nyamara ukaba utarashohoje intego Imana yari ifite ikurema. Ukeneye rero inama zisumba izo zo kwirwanaho. Bibiliya iravugango ngo “Kwirwanaho ntacyo bimaze. Kwitanga nk’igitambo ni yo nzira yonyina, ni yo nzira yanjye, yo kubona ubugingo, ubugingo nyakuri” Matayo 16:25

Iki gitabo ntabwo kiri muri urwo rwego rw’ibitabo byigisha kwirwanisha. Ntabwo ari igitabo kizakwigisha uburyo bwo guhitamo akazi keza, cyangwa uburyo bwo gusohoza inzozi zawe, cyangwa uburyo bwo gutegura ubuzima bwawe. Ntabwo kizakwigisha amayeri yo gutsindagira imirimo myinshi muri gahunda iyo imaze kukubana nyinshi. Ibiri amambu, kizakwigisha uburyo bwo gukora bike mu buzima, wita cyane kuby’ingenzi biruta ibindi. Ni igitabo kiguhugurira kuba icyo Imana yakuremeye kuba cyo.

Wahishurirwa ute rerointego Imana yari ifite ikurema ? ufite uburyo bubiri gusa bwo guhuitamo. Bumwe muri bwo ni ugushaka ugushakisha nk’ukora ubufindo. Icyo ni cyo abantu benshi bahitamo. Baracishiriza, bagafora , bakajya impaka. Iyo abantu bavuga ngo “njye numvaga ko ubuzima ari ukugira gutya cyangwa kuriya” baba bashaka kuvuga ngo “Ibyo ni byo nagerageje gukekeranya ntacyo nsize inyuma”
Imyaka ibihumbi n’ibihumbi abahanga mu gutekereza bagiye impaka ndetse bagerageza gushak ibisobanuro by’ubuzima. Ubuhanga mu gutekereza ni ngombwa kandi bifite umumaro wabyo, ariko yo bigeze mu gutahura intego z’ubuzima, n’abahanga baminuje baba bashakisha.

Dogiteri Hugh Moorhead,Umwarimu w’ubuhanga mu gutekereza muri Kaminuza ya Illinois uy’amajyaruguru yigeze kwandikira abanyabwenge barimo abahanga mu gutekereza , abashakashatsi n’abanditsi arababaza ati “mubona intego y’ubuzima ari iyihe ?” Nyuma aza kwandika mu gitabo ibisubizo bagiye bamuha. Bamwe bari bagerageje gucishiriza uko babyumva, abandi bamwemerera ko ubundi batari barigeze babitekerezaho ariko ko bahimbye igisubizo ubuzima bakabuha intego, abandi bamubwiza ukuri ko nta gisubizo bafite. Benshi muri abo banyabwenge bashyizeho akarusho ko gusaba Moorhead kubandikira abasubiza akababwira niba yarashoboye kubona intego y’ubuzima!

Imana ishimwe ko hari ikindi gisubizo kitari ugushakisha agaciro n’intego y’ubuzima. Igisubizo kinonerwa mu guhishurirwa. Dushobora gushakira mu byo Imana yavuze ku buzima mw’ijambo ryayo. Uburyo bworoshye bwo kumenya umumaro w’ikintu ni ukubaza uwagihanze. Ni nako bime byagombye gugenda ku buzima bwawe: niba ushaka kumenya intego yabwo baza Imana. Ntabwo Imana yadushyize mu rujijo n’umwijima ngo duhore twibaza kandi dushakisha. Imana yahishuye neza intego eshanu z’ubuzima bwacu ikoresheje Bibiliya. Ni cyo gitabo cy’uwaduhanze, gisobanura neza icyo tubereyeho, uko ubuzima bukora, ibyo tugomba kwirinda, n’ibyo tugomba gutekereza biri imbere hazaza .

Bibiliya isobanura neza ibyo bya bitabo byigisha kwirwanaho cyangwa n’ibindi by’abahanga bitashobora kudusobanurira. Bibiliya iravuga ngo “ Ubwiru bw’Imana bugera imbere mu migambi yayo… Ntabwo biduhishurira iby’iki gihe gusa, butubwira n’ibyahise ibyo Imana yashyiriyeho mbere y’ibihe kuzaduhesha ubwiza buruta ubundi” 1Abakorinto 2:7”
Ntabwo Imana ari itangiriro ry’ubuzima bwawe gusa, ni nayo soko yabwo. Kugira ngo ushobore kumenya umugambi w’ubuzima bwawe, ugomba guhndukirira Ijambo ry’Imana, aho gushakisha mu bwenge bw’isi. Ugomba kubaka ubuzima bwawe ku mahame adakuka y’ibihe byose aho kwishingikiriza ku buhanga bw’abanyabwenge, cyangwa kwiteramo ibitekerezo byiza cyangwa inkuru zo kwirema umutima. Bibiliya itubwira neza ngo “Muri krisito ni ho tumenya abo turi bo n’icyo tubereyeho. Kera tutari twumva n’ibya krisito ngo duhabwe ibyiringiro , yari yaratumenye, itugenera kuzabaho mu bwiza, ngo isohoze umugambi ikorera muri buri kintu na buri muntu” Abefeso 1:11

Uyu mu murongo uduhishurira nibura ibintu bitatu ku ntego y’ubuzima bwawe.

1.Umenya neza uwo uri we n’intego y’ubuzima bwawe iyo ufitanye imibanire na kirisitoYesu. Niba udafitanye ubusabane na Krisito, ndaza kugusobanurira uko ushobora gutangira.
2.Imana yari igufite mu bitekerezo byayo mbere y’ukoutangira kuyitekereza. Imigambi yayo ku buzima bwawe yariho mbere yuko ubah, itabanje kukugisha inama ! ushobora kwihitiramo akazi ukora, ukihitiramo uwo muzubakana urugo, ugahitamo uburyo ukoresha igihe cyawe , ndetse n’ibindi byinshi byerekeye imibereho yawe, ariko ntabwo ushobora kwitoraniriza intego y’ubuzima bwawe.
3.Intego y’ubuzima bwawe iri mu rundi rwego rwa gahunda ndende y’ibyaremwe byose, gahunda Imana yashyizeho isi itari yabaho. Ni byo iki gitabo kikubwira.

Umwanditsi w’umurusiya Andrei Bitov yakuriye mu butegetsi bwa gikomunisiti bwahakanaga Imana. Ariko umunsi umwe , ubwon yari yihebye , Imana iramwihishurira . Yanditse ngo “ Ubwo nari maze kugira imyaka makumyabiri n’irindwi, ubwo nari muri gari ya moshi inyura munsi y’ubutaka nafashwe n’ubwihebe burenze urugero ku buryo numvaga ntinye ko ubuzima bwanjye burangiye, nta kwizera ejo hazaza, nta kwizera kumva mfite agaciro. Ngiye kumva , ntazi aho biturutse, numva amagambo anje mu mutwe ngo “ubuzima budafite Imana ntibushobora kugira agaciro”

Uko nagatangaye , ntangira kugenda nsubira muri ayo magambo ampindukiye nk’urwego ruzamura bantu muri gari gari ya moshi rubajyana hanze nyazamukiraho mpita ninjira mu mucyo w’Imana”
Nawe ushobora kuba wumvaga uri mu mwijima mwinshi , utazi intego y’ubuzima bwawe. Ishime unezerwe kuko uri hafi kwinjira mu cyo.

Ingingo yo kuzirikana: Simbereyeho gukora ibyo nishakiye
Umurnko wo gufata mu mutwe: “Byose byaremwe nawe kandi byose ni we byaremewe” Abakolosayi 1:16

Ikibazo cyo gutekerezaho: “Nubwo hari byinshi binkurura hirya no hino, nakora iki ngo mpore niyibutsa ko ubuzima nyakuri ari ukuberaho Imana aho kuberaho kwinezeza?