Ubuzima bufite iyihe ntego (Umunsi 3, agace 2)?


Rick Warren ni umupasiteri w’umunyamerika akaba n’umwanditsi w’ibitabo uzwi ku isi yose

Uyu munsi turakomeza n’isomo rya gatatu agace ka kabiri ariko kanyuma gasoza isomo ry’umunsi wa gatatu. isomo ry’umunsi wa gatatu rifite umutwe witwa « Ni iki kigenga ubuzima bwawe ? »

Twasoje ubushije turikuvuga ku byiza by’imibereho ifite intego, twari twabonye ko hari ibyiza bitanu nyamukuru biva mu kugira ubuzima bufite intego. Uyu musi turakomeza turangiza ibyiza by’imibereho ifite intego.

1.Kumenya intego y’ubuzima bwawe byoroshya imibereho: Byoroshya guhitamo ibyo ukora n’ibyo udakora. Intego y’ubuzima bwawe ihinduka igipimo ukoresha uhitamo ibikorwa witaho n’ibyo utitaho. Iyo ugeze imbere y’igikorwa icyo ari cyo cyose uribaza uti “Ese gukora ibi biramfasha gusohoza imwe mu ntego z’Imana ku buzima bwanjye ?”

Iyo udafite intego y’ubuzima isobanutse, nta nshingiro uba ufite iyo uhitamo, iyo ugena uko uzakoresha igihe cyawe cyangwa ubutunzi bwawe. Uzaba mu kamenyero ko guhitamo bitewe n’ibyo ureba , igitutu abandi bagushyizeho cyangwa uko wumva umeze muri wowe muri ako kanya. Abantu batazi intego z’ubuzima bwabo bagerageza gukora ibintu byinshi icyarimwe bikabazanira guhangayika, umunaniro, umunaniro n’amakimbirane mu mutima.

Ntibishoboka gukora ibintu byose abantu bashaka ko ukora. Ubundi igihe ufite cyagenewe gukora ubushake bw’Imana gusa. Niba ubona udashobora kurangiza ibyo wihaye gukora, jya umenya ko urimo kugerageza gukora ibirenze ibyo Imana yashakaga ko ukora (cyangwa se ukaba ukoresha gihe nabi nk’iyo umara amasaha menshi imbere ya televiziyo). Kubaho ufite intego bituma ugira imibereho yoroshye na gahunda zitakuvuna. Bibiliya ivuga neza ngo “Ubuzima bwo kwifata no kwigaragaza uko utari bwerekana ubukene bw’umutima, nyamara ubuzima bucishije make burimo inyungu nyinshi” Imigani 13:7 Ibyo Bizana amahoro y’umutima “Mwami Imana, ugushikamijeho umutima uzamurinda abe amahoro masa kuko akwiringiye

2.Kumenya intego y’ubuzima bwawe biha icyerekezo imibereho yawe: Bituma imbaraga zawe n’umwete wose ubikoresha mu bifite umumaro. Utangira kugera kuri byinshi kubwo guhitamo gukora bike by’ingirakamaro.
Ubundi muri kamere y’umuntu habamo kurangazwa n’utuntu duto tudafite n’akamaro. Usanga duhora twirika inyuma y’umuyaga . Henry David Thoreau yaravuze ngo abantu abantu babaho mu bwihebe busa n’umutuzo” ariko ab’iki gihe bo babaho mu kwirangaza kutagira icyo kubagezaho” Abantu benshi basa n’icyuma bakoresha bapima umuvuduko w’umuyaga, gihora cyihindukiza cyihuta ariko kitava aho kiri.

Niba udafite intego isobanutse y’ubuzima bwawe, uzahora ubyina muzunga, uhindura imirimo, uhindura inshuti, uhindura amatorero cyangwa ibindi bintu by’inyuma wibeshya ko uko guhndura bizazana gahunda mu mibereho yawe cyangwa ko bizahaza inzara y’umutima urmo ubusa. Uzahora wibwirauti “wenda ubu bwo ni impindura hari igishya bizanzanira” ariko amaherezo uzasanga bidakemuye kibazo cyawe kukoikibazo ufite ni icyo kubura icyerekeze no kutagira intego.
Bibiliya igira ati “Ntimukabesho nka banyamujya iyo bijya b’abapfu badatekereza. Ahubwo mumwanire kumenya icyo umwami wacu ashaka”Abefeso 5:17

Imbaraga zo kugendera inzira imwe zisobanuka neza iyo twitegereje imikorere y’urumuri. Urumuri rusanzwe nta mbaraga rugira ariko iyo urwerekeje umujyo umwe rwunguka imbaraga. Iyo imirasire y’izuba uyerekeje hamwe ukoresheje ikirahure cyitwa lupe (loupe) ishobora gutwika ibipapuro ndetse n’ibyatsi. Hari n’ubuhanga bugezweho bwo gucisha urumuri ahantu hato cyane hakavamo imbaraga zitwa “Lazeri” zishobora gukata ibyuma n’iyo byaba bikomeye.

Nta kintu kigira imbaraga nk’ubuzima bufite icyerekezo, nk’imibereho ifite intego. Abagabo cyangwa abagore bagize icyo bahindura mu mateka y’isi ni abari bafite ubuzima bufite icyerekezo. Urugero ni nk’intumwa Pawulo wakoze nk’uri wenyine agakwiza ubutumwa bwiza mu bwami bw’abaroma bwose. Ibanga rye ryari ubuzima bufite icyerekezo. Yivugiraga neza ati “imbaraga zanjye zose nazerekeje kuri iki kimwe gusa, nibagirwa ibiri inyuma ngatumbira ibiri imbere” Abafilipi 3:13

Niba ushaka ko ubuzima bwawe bugira bugira icyo buhindura ku isi, buhe icyerekezo! Ba urekeyaho gusambira byose. Ba urekeyaho kugerageza gukora byose. Jya ukora bike. Ugabanye imirimo imwe n’imwe, kabone n’iyo yaba igaragara ari myiza, wibande cyane ku byo ubona ari ingirakamaro. Ntuzitiranye gukora byinshi no gusohoza byinshi. Ushobora gukora byinshi ntacyo ugamije , ariko se amaherezobimaze iki ?Pawulo yaravuze ngo “Mureke duhurize umutima kuri iyo ntego, twese abashaka gusingira ibyo Imana yaduteguriye” Abafilipi 3:15

3.Kumenya intego y’ubuzima bwawe byongera imbaraga mu mibereho yawe: Iyo umuntu afite intego bimutera kugira umurava. Nta kintu gishobora kukongeramo intege nko kugira intego isobanutse. Iyo abantu babuze intego ntibashobora gushishikara. Iyo udafite iyo ujya no kubyuka ubwabyo bihinduka umuruho . Akenshi ikitunaniza, kikatumaramo imbaraga, kikatubuza umunezero si akazi kenshi ahubwo ni akazi katagira icyo kagamije.

Bernard shaw yaranditse ngo “dore igitanga umunezero mu buzima , ni ukumva imbaraga zawe urimo kuzikoresha ikintu gifite umumaro, ukumva urimo guhindura ibintu aho kwitwara nk’agapfunyika k’intege nke, wirebeho mu tubazo n’amaganya atavaho, witotombera ko isi itakwitayeho ngo iguhe umunezero.”

4.Kumenya intego y’ubuzima bwawe bigutegurira ubuzima bw’iteka: Abantu benshi bamara ubuzima bwabo ku isi bagerageza gusiga umurage ku isi. Bahora bashaka ikizatuma bahora bibukwa nibava ku isi. Ariko , ku iherezo rya byose ikizagira icyo kimara si icyo abantu bazaba bavuga ku buzima bwawe, ni ibyo Imana izavuga. Icyo kenshi abantu batabona ni uko ibyo twageraho byose, haza abandi bakabirenza, uba ikirangirire mu mikino ejo hakaza undi akakurenza, uramenyekana ejo ukibagirana , kandi n’ibyiza abantu bakuvugaho bigeraho bikamenyerwa. Akiri muri kaminuza, uwitwa James Dobson yari yarihaye intego yo kuzaba uwambere agatwara igikombe mu mukino w’amarushanwa ya tenisi. Intego ye ayigeraho,akajya yumva afite ishema kuko igikombe yatsindiye cyari gitatse ahagaragara mu ishuri. Haciyeho imyaka , umuntu aracyimwoherereza . Bari bagisanze mu iyarara aho bari bataye imyanda barimo kuvugurura inyubako y’ikigo. Hanyuma James arandika ngo “Igihe kiratinda ibyo watsindiye abandi bakabiyorana n’iyarara ryo ku cyavu”

Kuberaho kuzasiga umurage ku isi ni ukureba hafi. Uburyo bwiza bwo gukoresha igihe ni ukwishakira umurage udashira. Ntabwo Imana yagushyiriye ku isi ngo ukorere kwibukwa. Yagushyize ku isi kugirango utegure imibereho y’iteka.

Umunsi umwe uzahagarara imbere y’Imana, ikore igenzura ry’ubuzima bwawe, ikizamini cya nyuma mbere yuko winjira mu bugingo buhoraho. Bibiliya iravugango “Mwibuke ko buri wese muri twe azihagararira imbere y’intebe y’imanza y’Imana…Ni koko, buri wese muri twe azimurikira ibyo yakoze imbere y’Imana” Abaroma 14:10,12. Amahirwe ni uko Imana iri mu ruhande rwacu, kandi ishaka ko twese dutsinda icyo kizamini, ni cyo cyatumye itwereka ibibazo mbere y’uko ikizamini kigera.

Duhereye ku byanditswe muri bibiliya, dushobora kwemeza ko Imana izatubaza ibibazo bibiri by’ingezi:

1.Umwana wanjye Yesu krisito natanze wamukoresheje iki? Ntabwo Imana izakubaza idini wabagamo cyangwa imyizerere mwari mufite. Ikintu kimwe gusa kizagira icyo kimara ni iki ngo “Ese wemeye ibyo Yesu krisito yagukoreye kandi wize kumukunda no kumwizera ? Yesu yarivugiye ubwe ati “Ni jye nzira n’ukuri n’ubugingo. Nta wujya kwa data ntamujyanye “Yohana 15:6

2.Ibyo naguhaye byose wabikoresheje iki ? Mu buzima naguhaye: impano zose, ubuhanga,igihe, imbaraga,inshuti ndetse n’ubutunzi Imana yaguhaye, Ese wabyikoreshereje mu nyungu zawe? Cyangwa wabikoresheje gusohoza imigambi Imana yakuremeye?

Kugutegura ngo utazatsindwa ikizamini cy’ibyo bibazo bibiri ni yo ntego y’iki gitabo. Ikibazo cyambere kizagena aho uzamara ubuzima bw’iteka. Ikibazo cya kabiri kizagena ibyo uzakora mu buzima bw’iteka. Nurangiza gusoma iki gitabo, uzaba ushobora gusubiza biriya bibazo byombi.

Ingingo yo kuzirikana : Imibereho ifite intego ni yo nzira y’amahoro

Umurongo wo gufata mu mutwe “Mwami Imana,ugushikamijeho umutima uzamurinda abe amahoro masa kuko akwiringiye” Yesaya 26:3

Ikibazo cyo gutekerezaho:
Uwabaza umuryango wanjye cyangwa abo tubana bavuga ko ari iki kigenga ubuzima bwanjye? Ese ubundi ni iki nshaka ko kingenga ?

Imana ibakomeze ibahe imbaraga n’ubushishozi.

Twagirango tubibutse ko mu minsi 40 twihaye yo gusoma iki gitabo, turangije umunsi wa gatatu, tuzakomeza ubutaha n’isomo ry’umunsi wa kane. Turabakunda.