Ubuyobe bwo mu minsi y’imperuka.

IBYAHISHUWE 19.11
Mbona ijuru rikinguye kandi ngiye kubona mbona ifarashi y’umweru. Uhetswe na yo yitwa Uwo kwizerwa, kandi Uw’ukuri. Ni we uca imanza zitabera akarwana intambara zikwiriye.

Mu Ibyahishuwe dusangamo amafarashi abiri y’umweru yenda gusa ariko atandukanye: ifarashi ya mbere uwari uyicayeho ni Kristo, kuko ni we uca imanza zitabera kandi akarwana intambara zikwiriye;

Ariko uwari wicaye ku yindi Farashi yari afite umuheto kandi ahabwa ikamba; uwo ni we Anti-Kristo wamanutse ngo ayobye benshi ( Ibyahishuwe 6.1-2),uyu rero akorera mu bahanuzi b’ibinyoma, ni yo mpamvu udasengana umwete ngo ashake Imana ye, arushaho gusoma no kwiga ijambo ry’Imana ngo arisobanukirwe, azayoba.

Ijambo ry’Imana rirakuburira rigira riti:

Mwirinde abahanuzi b’ibinyoma baza aho muri basa n’intama, ariko imbere ari amasega aryana, bibiliya ivuga ko tuzabamenyera ku mbuto zabo... (Matayo 7.15-16),ukwiriye rero kujya ufata umwanya wawe ugasenga ku giti cyawe, kuko niba ushaka guhora usengerwa gusa, uzayoba, ikindi ni uko Imana izi ibyo buri wese yibwira, niwicisha bugufi, ukayiha igihe cyawe ugasenga, izakugirira neza (Imigani8.17),Kuko ubuyobe bwinshi buturuka ku kutabasha kwihanganira ibigeragezo, bitewe no kudasobanukirwa n’impamvu yabyo, umuntu akirukira mu bahanuzi b’ibinyoma.

Ubusanzwe hariho inzira eshatu(3), zitandukanye ibigeragezo binyuramo:

1.Ibyo umuntu yikururira bitewe n’ibyaha runaka yaguyemo (Yesaya 59.2)
2. Ibyo Satani ateza umuntu agamije kumuca intege kugira ngo amukure mu nzira y’agakiza (1Petero 5.8)
3. Ibigeragezo by’Imana bigereranywa n’ishuri rihesha umuntu kuzamurwa mu ntera mu kwizera iyo abyitwayemo neza, igihe cyagera hakabaho gutabarwa na yo (Yakobo 1.2).

Nuko rero, nawe uhereye uyu munsi usenge Imana ushyizeho umwete (Yakobo 5.16), uyegere igusobanurire ibyawe aho kujya gushaka abahanuzi bo kukuyobya;
Ikindi kandi, mu bibaho byose ujye uhora ushima Imana (1Tesalonike 5.18), kuko nubwo hari ibyo ubona ko itaragukorera, ibyo yakoze bigutere kuyizera,
maze bikongerere imbaraga ubashe kuguma mu mwanya igushakamo, igihe nikigera izongera ikore n’ibindi kuko Uwiteka Imana yacu ihora ari iyo kwizerwa (1Tesalonike 5.24).
[email protected]