Ubusobanuro bw’amagambo 7 Yesu yavugiye ku musaraba/Past Desire

Yesu yemeye kuza mu isi aravuka , ariko iyo aza ntiyemere gupfa ntibyari kuba byuzuye. Urupfu rwo kumusaraba nirwo rwuzuje neza icyo Yesu yaje gukora mu isi

Aya ni amagambo Yesu yavugiye ku musaraba:

1. Yesu ku musaraba yatanze imbabazi

Data ubababarire kuko batazi icyo bakora(Luka23:34) .Aya magambo turagerageza tuyahuze n’ubuzima busanzwe bwa buri munsi.umukristo utaragera aho yiga gusaba no gutanga imbabazi aba ataragera ku musaraba neza. Abenshi benshi bakunda kugirirwa imbabazi ariko bo ntibazi kuzisaba iyo bakoze ikosa. Yesu yigisha abigishwa gusenga yarababwiye ngo” Uduharire imyenda yacu ,Nk’uko natwe twahariye abarimo imyenda yacu.”(Mat .6-12).Yesu kandi yabwiye abantu ko ntibatababarira abantu ibyaha byabo na Data atazabababarira.

Ese Imana ikubabariye nk’uko ubabarira abandi wajya mu ijuru?Niba atariko bimeze tangira wige kubabarira n’ubwo baba bataragusaba imbabazi . Bibiliya ntibidusaba ahubwo irabidutegeka kadi itegeko iyo ritubashywe hari ibihano biba biteganyijwe. Mu buzima hari abantu batazigera bagusaba imbabazi. Imbabazi ni ubuntu ariko abantu ntibakunda kuzakira. Igihe Mose yamanikaga inzoka akabwira abantu ngo bayirebe ,banze kuyireba ariko abenshi bishwe n’ubumara bw’inzoka.Na n’uyu munsi umusaraba urahari ariko abantu ntibawureba bishwe n’ibyaha. Ubutumwa bwiza burabwirizwa ,bumva ijambo ry’Imana ariko bahisemo kuguma mu byaha, banze kwakira imbabazi z’Imana.

Ni byiza ko watura ukavugango “mbabarira”, naraguhemukiye, naragutwaye ibyawe,narakugambaniye, n’ibindi . Kugerageza gukora imirimo myiza ntikuraho kuvuga ngo mbabarira kuko gusaba imbabazi n’ibyo bigukuraho igihemu, isura mbi, n’ibyo wahemutse byose.Ni gombwa gusaba imbabazi ku byaha ibyo ari byo byose wakoze, ni byiza gusaba no gutanga imbabazi kugirango umutima wawe ubohoke.

2.Yesu yatanze ijuru

Igisambo cyasabye imbabazi kibonera imbabazi hafi y’umusaraba cyitabanje kujya mu rusengero ngo kihane,kibatizwe ndetse ngo gitange n’amaturo.( Luka23:43)
Ikindi gisambo cyarimbukiye iruhande rw’umusaraba kuko cyatutse Yesu. Pawulo yavuzeko Imana itarobanura abantu ku butoni, ko mu mahanga yose ukora ibyo gukiranuka imwemera.(Ibyakozwe n’intumwa 10:34-35)

Ijuru dushobora kuriburira aho turi:Uzi kuburira ijuru muri korali, mu gipasitoro, mu b’budiyakoni …, umuntu yarageze aho abandi babonera ijuru ariko we akaribura?.Ikizabuza abantu kujya mu ijuru ni ibyaha.Abantu banga kwihana ngo bahinduke, bareke ingeso mbi. Kuba pasitoro, bishop, apostle,n’andi mazina meza yo murusengero, ntazajyana abantu mu ijuru ahubwo abantu bakwiye kwitonda kugirango batazarimbukira aho bakaboneye ijuru.

3.Yesu yatanze umuryango

Yabwiye Mariya ngo mubyeyi ng’uyu umwana wawe, abwira na Yohana ngo ng’uyu mama wawe(Yohana19:26-27).Imana iba mu muryango.Mwibuke ko iba mu butatu kandi ikunda kuba mu muryango.

Mwibuke mu gitabo cy’ itangiriro yaravuze ngo “Tureme umuntu ase natwe”.Yarebye umuntu isanga ntiyabaho wenyine imuremera umuryango muri Edeni. Mu gihe cyo kwa Nowa Imana yarimbuye abantu bose isigaza umuryango w’abantu 8, Aburahamu Imana yamwemereye umuryango, n’igihe cy’I Sodomu Imana yarokoye umuryango wa Loti , na Yesu na we yavukiye mu muryango , abigishwa ba Yesu na bo yabakozemo umuryango aravuga ati” Abo wampaye Data ubahe kuba umwe nk’uko nanjye ndi umwe na we”(Yohana17).Imana ikunda umuryango niyo mpamvu turi abavandimwe muri Kristo Yesu.

Iyo tubona imfubyi n’abapfakazi baririmba mu nzu y’Imana nuko Yesu yatanze umuryango.Iyo abatagira shinge na rugero bacyuza ubukwe bakagera no kubindi byiza nuko Yesu yatanze umuryango.Ni yo mpamvu usanga hari abibagiwe ko ari imfubyi,ari abapfakazi kuko Yesu yatanze umuryango

Umuntu rero utagira icyo afasha abantu ntaba akora icyo yesu yakoze.Mu nzu y’Imana ni ho hagakwiye kuba urukundo rwuzuye,ruranga abana b’Imana .

4. Yesu yakomeje gusenga no kumusaraba

Ubuzima bwe bwose Yesu yahoraga asenga kandi uwo murimo yawukomereje ku musaraba (Matayo 27:46). Yajyaga ku musozi gutanga raporo ku Mana y’uko umunsi wagenze,agasaba n’imbaraga z’umunsi uzakurikiraho, azakoresha akiza abarwayi ,yirukana n’abadayimoni.

Ikigorana muri iyi minsi ni uko abantu bakora umurimo w’Imana mu kamenyero nta mbaraga, n’abasenga ntibabikora by’umwuga ahubwo basengera ibyo kurya ,imibereho myiza ,ibyo kwambara…, ariko hari byinshi byo gusengera. Dukwiye kumenya ko umurimo wo gusenga watangiwe na Yesu ugakomezwa n’abamwizeye. Birakwiyeko abantu barenga gusenga ahubwo bakiyiriza n’ ubusa kuko Yesu yabwiye abigishwa be ko hari abadayimoni bakurwamo no gusenga no kwiyiriza ubusa. Kugirango twuzuze icyo Yesu adushakaho, gusenga bikwiye guhinduka ubuzima bwacu bwa buri munsi.

5.Yesu yavuzeko afite inyota.

Iyo nyota yari iyo gucungura itorero(Yohana19:28). Hashize imyaka 2000 ariko Yesu na n’ubu aracyafite iyo nyota yo kutubona natwe dufite inyota yo kuzamubona dusenga kandi twiyirije ubusa.

Abantu bapfa byinshi by’ubutunzi ariko abageze ku musaraba ibyo babonye byose bashima Imana bakanyurwa na byo bakumva harimo umugisha w’Imana bakumva bafite umutima utekanye.

6.Yesu yaravuze ngo’ birarangiye’

Yesu yarangirije ibibazo byacu ku musaraba.Hari ibintu 4 Yesu yarangirije ku musaraba:
- Yesu yadukijije ibyaha
- Yesu yadukijije indwara(Yesaya 53:4,Yesaya 61)
- Yesu yadukijije intimba n’imibabaro
- Yesu yadukijije imivumo.

Ku musaraba nta ndwara ,nta gahinda , nta mivumo ,nta cyaha nta n’ibikomere adakiza. Iyo umenyeko hari ikitagenda ugomba gusenga kugira ngo ube muri Kristo Yesu wirukane imivumo yose, kuko umuntu iyo ari muri Kristo Yesu ibya kera byose biba bishize akaba icyaremwe bishya.

7.Yesu ku musaraba yaravuze ngo’mu maboko yawe ni ho nshyize ubugingo bwanjye’

“Yesu avuga ijwi rirenga ati” Data, mu maboko yawe ni ho nshyize ubugingo bwanjye”Amaze kuvuga atyo umwuka urahera. (Luka 23:46)
Ubugingo bwacu n’ibyacu tubishyire mu maboko y’Imana, twumveko ibyo twagezeho atari ku bwacu ahubwo ko ariyo kandi tumenye ko Data ari we ufite byose mu maboko ye.

Imana ibahe umugisha!
[email protected] agakiza.org