Uburyo bwakurinda gukomeza kwiyumvamo ibyaha wakoze

Ibyaha ni umutwaro uremereye umuntu adashobora gutwara .Bibiliya itubwirako iyo udahishiriye ibyaha byawe ukabyihana, Imana ibibabarira byose kandi ikabihanagura ntizongere kubyibuka ukundi.

“Nakwemereye ibyaha byanjye, Sinatwikiriye gukiranirwa kwanjye. Naravuze nti “Ndaturira Uwiteka ibicumuro byanjye”, Nawe unkuraho urubanza rw’ibyaha byanjye.(Zaburi32:5)

Abakristo benshi, bakomeza kwikorera imitwaro iremereye y’ibyaha byabo - ndetse bikaba bimaze igihe kirekire ari ibya kera. Kutabyihana ngo duture iyi mitwaro bituma tutabasha gukurira mu mwami Yesu Kristo. Dukwiye kwiga kwiyambura ibyaha byose kugira ngo turusheho kuba ab’umudendezo, gukura no kugendana na Kristo.

Abenshi muri twe ntibaba bashaka no kumva bakwiyibutsa ibyaha bakoze, ariko mugihe bitihanwe biba nk’icyuma duterwa mu mutima. Uburyo bwonyine ibyaha byacu byakurwaho ni ukubyemera no kubyihanira Imbere y’Imana. Imana ntiyongera kubitubaraho iyo tubyihannye byongeye kandi ishaka ko tubyihanira imbere yayo, tutitaye uko byaba bikojeje isoni kose:

“Umunyabyaha nareke ingeso ze, ukiranirwa areke ibyo yibwira agarukire Uwiteka na we aramugirira ibambe, agarukire Imana yacu kuko izamubabarira rwose pe”(Yesaya55:7)

Hari ibyaha biterwa n’agahinda(agahinda ko muburyo bw’isi) , ariko ntakindi kazana uretse urupfu. “Agahinda ko mu buryo bw’Imana gatera kwihana kuticuzwa, na ko kukazana agakiza, ariko agahinda ko mu buryo bw’isi gatera urupfu.”(2Abakorinto7:10)

Nshuti , ibukako ibyaha by’ahahise bikomeza kwitwa ibyaha iyo utabyihannye. Uburyo bwonyine bwagufasha kubabarirwa ni ukubyihanira by’ukuri imbere y’Imana.
Bibiliya itubwirako iyo Imana itubabariye ibyaha byacu ibyibagirwa:
“Ubwanjye ni jye uhanagura ibicumuro byawe nkakubabarira ku bwanjye, kandi ibyaha byawe sinzabyibuka ukundi”(Yesaya43:25). Gukomeza kwiyumvamo ibyaha nyuma y’uko Imana itubabariye ntibiba bikiyiturukaho .

Ntidukwiye gukomeza kugirwa imbata y’ibyaha twakoze, ahubwo dukwiye kubyihana tukaba ab’umudendezo muri Kristo kandi tukibukako abari muri Kristo nta teka bazacirwaho.(Abaroma8:1)

Imana ibahe umugisha!

Sophie @agakiza.org