Uburyo abakristo bashyigikira icyaha mu izina ry’urukundo

Uyu munsi abakristo benshi bibwira ko bagaragariza urukundo bagenzi babo ariko ntibamenyeko bashyigikira icyaha .Aho kugira umutwaro wo kuzana abanyabyaha hafi y’Imana, ahubwo usanga ibyo bakora barakaza Imana, bagatera abantu gukomeza gukora icyaha.

Ubu ni uburyo abakristo bashyigikira icyaha mu izina ry’urukundo:

1. Bakinisha ingaruka z’icyaha

Abakristo aho kwereka abanyabyaha ingaruka z’icyaha, ahubwo babatera ingabo mu bitugu bityo bagasuzugura ingaruka zizanwa no gukora icyaha mu mibereho yabo. Icyaha cyangiza ubusabane bwacu n’Imana , ubuhamya bwacu, imibereho yacu, kikatwiba imitungo yacu n’ amahoro .

Ntiwaba uri impumyi ku ngaruka y’icyaha nurangiza wiringireko utazagwa mu cyaha. Ukwiye kureba ingaruka z’icyaha warangiza ugafasha abantu kubireka, ukabagarura ku Mana, aho kubashinja ko baguye.

“ kuko uzi gukora neza ntabikore, bimubereye icyaha.(Yakobo4:17)

2. Bibanda gusa ku rukundo Imana ikunda abanyabyaha

Abakristo benshi uyu munsi bagira ishyaka ryo gushishikariza abantu urukundo rw’Imana ariko bataruzi. Bihuta kuvuga ngo “ Imana iragukunda” ntibamenyeko bishobora kuba icyuho cyo gutera abantu gukomeza gukora icyaha.

Iyo ukomeje gushishikariza abantu ko Imana ibakunda n’ubwo ari abanyabyaha,bashobora gutekereza ngo ‘ niba Imana inkunda kandi ndi umunyabyaha , niki cyatuma mbihagarika?
Mu butumwa bwiza hagira hati: “Ijambo ry’umusaraba ku barimbuka ni ubupfu, ariko kuri twebwe abakizwa ni imbaraga z’Imana, kuko byanditswe ngo “Nzarimbura ubwenge bw’abanyabwenge, N’ubuhanga bw’abahanga nzabuhindura ubusa.”(1Abakorinto1:18)

Ntidushobora kwibanda ku rukundo Imana ikunda abantu gusa tutababwirako yanga n’icyaha, ahubwo ukeneye kubwira abantu ko Imana ari iyera, ikiranuka kandi ari intabera.

3. Kwita abantu ‘ abakristo beza no mu gihe bafatiwe mu cyaha.

Igihe tuvuga ngo”umukristo mwiza” ku bantu bakora icyaha, tuba tubatiza umurindi wo kumva ko nta cyaha bakora, kandi ko nta muntu wita ku byaha bakora.

Uku niko abakristo bakomeza gutiza abanyabyaha umurindi wo kutihana :

• Banga kubwira abantu ibyaha byabo ngo bihane

“kuko igihe kizaza batazihanganira inyigisho nzima, ahubwo kuko amatwi yabo azaba abarya yifuza kumva ibibanezeza, bazigwiriza abigisha bahuje n’irari ryabo.”(2Timoteyo4:3)

• Bafatanya n’abatizera Imana

“Ntimwifatanye n’abatizera mudahwanye. Mbese gukiranuka no gukiranirwa byafatanya bite? Cyangwa umucyo n’umwijima byabana bite? Kandi Kristo ahuriye he na Beliyali, cyangwa uwizera n’utizera bafitanye mugabane ki?”(2Abakorinto6:14-15)

•Batinya kuvuga icyo Imana yavugiye mu ijambo ryayo

“Kuko Imana itaduhaye umwuka w’ubwoba, ahubwo yaduhaye uw’imbaraga n’urukundo no kwirinda.”(2 Timoteyo1:7)

Umukristo mwiza akwiye kwereka abantu ko icyaha ari ikizira, ko kitemewe imbere y’Imana , ahubwo akagira ishyaka ryo kuzana abanyabyaha ku Mana.

Sophie @agakiza.org