Ubupfubyi bwo mu mwuka / Pastor Desire Habyarimana

“Sinzabasiga nk’impfubyi, ahubwo nzaza aho muri” Yohana 14:18

Hano Yesu yavugaga ku kohereza umwuka Wera ariko nahisemo ko tuganira ku bupfubyi bwo mu mwuka, kuba umukristo ariko usa nk’ufite ubupfubyi. Impfubyi ni umuntu uba warapfushije umwe mu babyeyi be cyangwa bose barapfuye. Bimwe mu bintu bibi bibaho bibabaza no kuba impfubyi bibamo.

Hari ubuzima umuntu abamo atigeze ateganya n’abantu batateganyaga kubera ko yabaye impfubyi. Kugirango umuntyu agire indangagaciro nzima, abashe kuzavamo umubyeyi mwiza nuko aba agomba kuba afite ababyeyi yigiraho .Nureba akenshi uzasanga abana benshi bagira imyitware isa cyangwa ijya gusa nuko ababyeyi babareze bitwaraga.

Iyo umuntu yabaye impfubyi ntaba afite numwe yigiraho, umubyeyi ni kimwe mu bigize igice cy’ubuzima ntawundi muntu wagukunda, wakugirira imbabazi nk’umubyeyi wagutwise amezi icyenda. Iyo umuntu abaye impfubyi rero abura urukundo rwa mama, abura igitsure cya papa, abura uwo yigiraho ,aba yaratakaje igice cy’ubuzima.

Yesu yari azi neza icyo ubupfubyi buvuze, Yozefu yapfuye Yesu afite imyaka cumi n’icyenda asigara arera bene wabo nabo batamwemera, ababwira ko atazabasiga nk’impfubyi .Yesu yabaga azi neza icyo avuze. Iyo umuntu yabaye impfubyi aba asa n’uwatakaje igice kimwe cy’ubuzima bwe. Hari abantu bavuka mu mu mwuka ariko bakaba impfubyi , wenda yumvise ubutumwa kuri radiyo, yumvise umuvugabutumwa mu muhanda cyangwa mu modoka, yumvise indirimbo cyangwa yagiye mu giterane adasanzwe ari umukristo, yagiye mu rusengero rimwe akumva ijambo ry’Imana umutima we ugakorwaho akibukako ari umunyabyaha akakira Yesu nk’umwami n’umukiza ariko ntazagire umuntu umurera, ntazagire umuntu umwitaho, ntihazagire umuntu yigiraho akazaba nk’impfubyi, akazagira ubupfubyi bwo mu mwuka.

Kugirango umuntu abe umukristo ukuze kandi ukomeye ni uko agomba kugira ababyeyi yigiraho bashobora kumufasha gutera intambwe zose za ngobwa mu buzima kugirango avemo umukristo mwiza. Hano Yesu yarababwiye ngo sinzabasiga nk’impfubyi nzagaruka aho muri .Urebye ubuzima Yesu yabanyemo n’intumwa kubasiga bonyine byari kuba ari ikibazo gikomeye ariko yabasigiye mwuka wera nk’ingwate kugirango abemeze ko n’ ijuru rihari koko.

Muri ya myaka itatu yamaraye nabo yabwirizaga i Yerusalemu honyine ariko ubu ushobora kumwumva hose icyarimwe ushobora kumwumva mu ijambo , ukamwumva mu ndirimbo, ukamwumva usenga si ukubana nawe muri ubwo buryo gusa ahubwo yaravuze ngo umuntu nankunda njyewe na Data n’Umwuka wera nzaza duture muri we. Iyo uri umukirisito ukijijwe neza Imana iba muri wowe umutima wawe uhinduka ubuturo bw’Imana. Hari abantu bakizwa ariko ntibagire umugisha wo gutera intambwe zatuma Imana iza igatura muri bo.

Umuntu uko arembye arembanye intege nke: Umuntu usanzwe wakamere yibeshya kukigero cya 70% mu ijambo rimwe umuntu agizwe no kwibeshya, mu isengesho rya Data wa twese, Yesu yarababwiyengo nimusenga mujye muvuga ngo ntuduhane mu bitwoshya. Fata kwibeshya 70% noneho ushyireho amoshya ya satani ubwo urumva umuntu asigara ari iki ? Niyo mpamvu gukora amakosa ku muntu wese biroroshye ariko iyo ufite umwuka wera w’Imana ukaba ufite nabakubwira ngo nyura hano, iyi si uko imeze, kubera iki twubaha abantu bakuru kabone nubwo baba batarize ni uko aba afite ubunararibonye bw’ubuzima(experience), aho uba unyura nk’urubyiruko we aba yarahanyuze kera rimwe agatsinda ahandi agakora amakosa ,akamenyako iyo nzira itanyurwamo. Iyo akubona ufite amaraso ashyushye arakubwira ati aho hantu nigeze kuhanyura akagusangiza ubuzima ,ubunararibonye bwe bugatuma utagira amakosa menshi.

Umuntu aremanywe intege nke, niyo mpamvu bibiliya ivugango babiri baruta umwe, iyo umwe aguye undi aramubyutsa, iyo baryamanye ashobora kumumara imbeho. Hari igihe umuntu akonja mu mwuka kubw’ibigeragezo yanyuzemo mugenzi we akamukomeza kugirango urugendo rukomeze. Kuva mu isezerano rya kera kugera mu rishya ntabwo Imana yigeze ikora ikosa ryo gutuma umuntu umwe.

Nyuma ya Mose Imana yashyizeho Yosuwa kugirango Mose amutoze, Imana ihamagara Eliya yahise imuzanira Elisa kugirango amufashe, Nyuma ya Yesu hari intumwa, Imana yahamagaye Pawulo ihita izana na Timoteyo hanyuma Pawulo akavugako ari se wa Timoteyo mu mwuka, akaba ari umuntu umufasha mu nzira ijya mu ijuru. Iyo utagize umuntu wigiraho, ukwigisha gusenga, umuntu ugufasha uba waguye.

Hari ibintu ubona bibabaje usanga umuntu akijijwe uyu munsi agahita asenga amasengesho y’iminsi itatu ,icyumweru, iminsi murongo ine, mbese agakomereza aho mwari mugejeje, ntazi uko bihana , ntazi uko batura, ntazi uko bahinduka ku ngeso za kamere.

Ingaruka z’abantu bireze mu mwuka

Intambara no gucika ibice mu matorero .Iyo urebye usanga bikorwa n’abakirisito badakuze, ese hari abasirikare barwana hagati yabo bahuje igihugu n’akazi? Mu ikipe buri muntu aba azi aho atsinda n’umwanya agomba kuba ariho ariko ugasanga abatazi icyo gukora ni abayita abakozi b’Imana.

Usanga umuntu ahimba indirimbo yacurangwa rimwe agahita yigira umusitari akambara poketi(pocket down) ukurikiranye uwo muntu usanga yarireze ntiyabonye undi muririmbyi umuruta ngo amwigishe. Umuntu aba akivuga ngo lii gusa ubwo ndavuga kubavuga indimi ngo yabaye umuhanuzi kandi ntiyamenye n’akandi gakurikiyeho akiyita umuvugabutumwa mpuzamahanga atazi uko babwiriza, agatera Haleluya Maganabiri mu rusengero. Hari ibintu ubona murusengero ukabona ibibazo bafite ni iby’abana bireze aho usanga bavugango niba utaroga tera haleluya ugahita uyitera nyamara hashobora no kuza uwabikenyereyeho nawe akayitera.

Uko wifata mu kigeragezo niko kwerekana intambwe y’ubukure ugezeho, uko wifata wageragejwe ni wowe w’ukuri, indi minsi uba ubeshya utari mu kigeragezo. Mu rusengero abantu bose aba ari abatagatifu ntawamenyako ugira intege nke ariko uko wifata ku isoko aho ukorera, uko wifata umukozi wo murugo yashiririje ibiryo, uko wifata abantu bakwanze, uko wifata abantu bakurenganyije, uko wifata umugabo yakwanze,uko wifata wahombye nibyo bigaragaza uwo uriwe . Nibyo bigaragaza ubukure bwawe bwo mu mwuka.

Aho umuntu yabasha kwipima akibaza ngo ni ikihe kigero cyo mu mwuka ngezeho ? Niba utaremeye uburere bwo mu mwuka ugende uhinduka buhoro ingaruka zabyo uzazibona. Icyo twakagombye kwita umurimo w’Imana ni igikorwa Imana ikoze mu mutima wawe, iyo iguteje intambwe yo guhinduka kuri kamere wakagomye gushima Imana kuko ibyo aribyo bizakwinjiza mu bwami bw’Imana. N’ubundi imirimo dukora ni myiza , Bibiliya iravugango hahirwa abantu bapfira mu mwami , imirimo ikazaza ibaherekeje .Hazabanza wowe mu mazina yawe ijuru nirikwemera, imirimo yawe izaza iguherekeje .Kuba uri pasteri, kuba uri umuririmbyi, kuba uri umuvugabutumwa bizaza nyuma nabyo bizanyuzwa mu muriro ibizavamo ari bizima nibyo uzahemberwa.

Ibibazo byinshi biba mu matorero biterwa nuko abantu bayabonekamo hari ababaye impfubyi mu mwuka. Ikindi kintu kibabaje ni ukuba impfubyi kabiri :Ni ukuvuga kuba udafite ababyeyi ikindi kandi uri umpfubyi mu mwuka ari nabyo bibabaje kuko iyo uri imfubyi ibyo utabonye mu mubiri mu mwuka iyo wakiriye Yesu ugakizwa ushobora kubikugarurira kuko tujya tubona mu rusengero impfubyi zishyingirwa, abantu bagira ibirori bitabwaho.

Iyo urebye amatorero menshi yubakiye kubikomere. Umuntu hari ubwo abona yabonye umwanya w’imbere mu itorero abantu bakamukomera mu mashyi ahita yumva yacamo igice agashinga itorero, hanyuma undi nawe akazamwigomekaho agashinga itorero ibi bigaruka kuri cya kibazo cy’ubupfubyi kuko usanga abenshi baba barireze mu buryo bw’umwuka. Mwumve neza gushinga itorero si bibi ni byiza ariko ukwiye kugenda ufite umugisha wa kibyeyi ukagenda mu buryo bwiza nk’uko umubyeyi ashyingira umwana we abona ageze kukigero gishyitse, ni nako ugiye gushinga itoreoo byakagenze. Nta kundi itorero rizagera ku mpera y’isi ni uko abantu bazagenda babyara abandi. Ikibazo ni uburyo wagiye niba waragiye wigometse nawe bazakwigomekaho, imbuto umuntu abiba nizo azasarura, iyo umuntu asarura aho yabibye ntakwiye kubabara.Muri kristo Yesu harimo byose bikwiriye.

Umuntu agomba kuba afite itorero abarizwamo kandi uko byagenda kose afite umuntu yisanzuraho. Uwo wakwaturira intege nke zawe, umuntu wabaza ngo uyu murungo wa bibiliya wanditse he ? akagufasha gutera intambwe zose za ngombwa. Imana irabafite numusengera umusaba Imana izamuguha, Umwuka wera ni umufasha ukwiriye utuyobora mu kuri kose no gukiranuka kose.

[email protected]