Ubupfubyi bwo mu mwuka (Igice 1)/ Pastor Desire HABYARIMANA

“Sinzabasiga nk’impfubyi, ahubwo nzaza aho muri” Yohana 14:18

Intego tugiye kuvugaho muri uyu mwanya, turi buvuge ukuntu abakirirsito muri iyi minsi bamunzwe n’ubupfubyi bwo mu mwuka. Umuntu yitwa impfubyi mu gihe aba yaravutse nk’abandi akagira ababyeyi, akonswa ndetse akarerwa ariko akaza kugira ibyago byo gupfusha umubyeyi umwe cyangwa bombi. Akenshi ibi byago bituma ubuzima buba bubi cyane ko ibi byago biza bikugwiririye utaziko bikubaho, kandi uwo mwana akenshi aba ataragera igihe cyo kwiyitaho.

Tugarutse inyuma gato,nta muntu n’umwe wakugirira imbabazi nk’uwakugiriye kubise, mu byukuri umubyeyi wawe akwifuriza ibyiza gusa. Njya numva bavuga ngo akabura ntikaboneke ni nyina w’umuntu. Impamvu burya amategeko avugako umuntu ashyingirwa afite imyaka y’ubukure ni ukugirango azabashe kwita kuri za nshingano zo kwita ku bana be, umwana afatwe neza n’umuntu uzi kubyara.

Hanyuma buriya abahanga bazakubwira uko umuntu yitwara kwaba kubi cyangwa kwiza biterwa n’uburere aba yarakuye ku mubyeyi , mu ijambo rimwe ntawutanga icyo atahawe,nubona umuntu ukundana, aha agaciro abandi, wiyubaha, akenshi aba yarabikuye mu muryango. Iyo umuntu yireze ntabashe guhabwa ibikenewe byose mu muryango akenshi hari igihe atagira amahirwe yo kubiha abandi kubera ibyo bamusaba gutanga nawe ntabwo yigeze abihabwa. Ubupfubyi butuma mu mubiri hari uburenganzira bumwe ubura: gukundwa,kubahwa, agaciro no kwitabwaho, kandi amarangamutima arakomereka. Rimwe rimwe hari igihe tutumva umubabaro w’impfubyi, uzi kumva ku ishuri watsinze nta muntu ukubaza indangamanota? Uzi kwishima udafite uwo mwishimana ? uzi kubabara udafite uwo mu babarana ? uzi gushaka gushyingirwa nta muntu uzakuvugira ijambo ? uzi guhura n’ibibazo mu buzima udafite uwo ubisangiza ? kuko wabuze ababyeyi, mu byukuri ikibazo cy’ubupfubyi ni ikibazo kiremereye.

Hanyuma ibi tugiye kubisanisha no kuba munzu y’Imana, tubirebere mu buryo bw’umwuka,turebe iyo umuntu akijijwe turebe uburyo ashobora kuba impfubyi yo mu mwuka. Bwa buzima tubona mu buzima bw’ubupfubyi busanzwe bukazaza no mu buryo bw’umwuka. Ushobora kuba ufite ababyeyi bombi ariko ukaba uri impfubyi mu buryo bwo mu mwuka. Mwibuke ko turi kuganira ku ntego ivugango abantu benshi bishwe n’ubupfubyi bwo mu mwuka. Uzasanga umuntu akizwa, ku cyumweru abantu baraza mu rusengero, abaririmbyi bakaririmba, umubwiriza butumwa akajyaho,twarangiza tugahamagara abashaka kwakira Yesu nk’Umwami n’Umukiza, aho bigikorwa kuko si hose bikorwa. Hanyuma umuntu wakijijwe agakizwa kucyumweru wenda nta n’umuntu azi, aribwo bwa mbere aje mu rwo rusengero, adafite abantu bamukomeza, uwo muntu ashobora kuba impfubyi yo mu mwuka, kuko uwo muntu wakijijwe atazabona umufasha agahita yishakira uburyo abaho, Atari abantu bamwakiriye bamurere, bamubwire ibyo gukizwa uko bigenda, ntabwo wakizerako umwana w’uruhinja yamenya ubwenge bwo kwishakira umubyeyi mwiza uzamufasha mu nzira yo gukiranuka no gukora ubushake bw’Imana.
Uzasanga umuntu uwo mwana yihitiyemo atari umuntu ukomeye mu gakiza uzamwigisha uko basenga, kwihana, gusoma bibiliya,uko umuntu ahinduka ku ngeso,uko umuntu yezwa,uko umuntu ababarira uwamuhemukiye, ibyo bintu byose ntabone ubimwigisha kubera atabonye uwo kumurera.

Yesu yaravuzengo nuko mugende muhindure abantu bo mu mahanga yose abigishwa, mubabatiza mu izina rya Data wa twese n’Umwana n’Umwuka Wera, mubigisha kwitondera ibyo nababwiye byose. Kandi dore ndi kumwe namwe iminsi yose kugeza ku mperuka y’isi.” (Matayo 28:19-20). Aya magambo agaragazako abana ataribo bakaje kudushaka ngo tubarere ahubwo nitwe twari dukwiye gutera intambwe nk’abantu bakuze mu matorero, tukajya gushaka abana tukabarera, tukabakuza, tukabateza intambwe,yasitara tukamubwira ngo komera, yaba agize intege ukamubwirango satani ntaguherane ahubwo izere imbabazi z’Imana. Imana ibasha kukweza, Imana ibasha kukubabarira. Mu by’ukuri iyo umuntu akijijwe ntagire abantu bamubanjirije mu gakiza ashobora kwitabaza,bashobora kumufasha, bashobora kumukomeza, ashobora kugira ikibazo cy’ubupfubyi bwo mu mwuka. Iyo urebye amatorero ya gikirisito abantu bavugako bakijijwe, basenga iyo urebye ibibazo bafite ni ibibazo bijyanye no kwirera, bishobora kugira ingaruka nyinshi zitandukanye bitewe nuko kwirera bigira ingaruka zitari nziza. Imana ifite umugambi wo kukugirira neza, kukubaka, kugukiza no kuguha ubuzima bw’ubukirisito butuma utaba impfubyi mu mwuka.

Yesu yaravuze ngo Sinzabasiga nk’impfubyi, ahubwo nzaza aho muri, Byarigushobokako Yesu agenda, ntiduhabwe umwuka wera ariko yabonyeko ari ngombwa ko duhabwa umwuka wera wo kudufasha kugirango dukore ubushake bw’Imana.

Ingaruka mbi zo kwirera cyangwa kutigishwa
Bibiliya yatubwiyengo mugende muhindure abantu bo mu mahanga yose abigishwa. Iyo habaye kwirera cyangwa se kutigishwa bigira ingaruka mbi, bituma abantu badahabwa uburere bwo mu mwuka.

Ntabwo ushobora kuba intumwa ya Yesu udafite imyitwarire ye kandi imyitwarire ye ayiguha ariko wemeye gutozwa. Muri iki gihe biragoye kubona abakirisito bakomeye mu byo kwizera, bafite agakiza, badapfa kugushwa n’ibibonetse byose. Rimwe na rimwe iyo urebye amafuti akorwa n’abakirisito hamwe n’abashumba babo n’abavugako bakorera Imana urumirwa ariko ku rundi ruhande ugasanga rimwe na rimwe ntibitangaje kuko ari ingaruka zo kubura kirera cyangwa se kubura umubyeyi. Njya ntekereza abantu twakomotseho ni abantu bajugunyiwe intare, ni abantu bakerejwe inkero, batwikishijwe umuriro usomye mu Abaheburayo 11 wahita ubona icyo nshatse kuvuga, aba bantu bari afite agakiza gakomeye katagushwa n’ibibonetse byose. Ibaze twe muri iyi minsi dufite agakiza kagushwa n’amagambo gusa, umuntu baramuvuga akagwa, yarwara ntibamusure akagwa, yahura n’utubazo dusanzwe akaba araguye, ni ikibazo abantu barakijijwe yego ariko ntibagira ababyeyi bo mu mwuka babasha kubarera no kubakomeza kugeza igihe bashobora kuba batinyutse. Hari indirimbo ya 207 ivuga ngo Uwaba atinyutse ibyago byose naze akurikire umwami Yesu, ntacyamurekesha iyo nzira yahisemo yo kujya mu ijuru.
Mu gakiza iyo umuntu avutse ntarerwe ahabwe iby’ibanze bizagorana gukomerera mu gakiza. Uzasanga umukirisito wavutse bwa kabiri umaze ugihe kitari gito mu itorero mbese afite n’imirimo mu itorero ari umudiyakoni, apotre,umushumba,bishop ukibaza ukuntu ahora atsindwa n’ubusambanyi buri gihe akihana icyo cyaha uyu munsi ejo akagaruka ngo nongeye, uzasanga umuntu ari umuririmbyi muri Korari abimazemo igihe ariko ku rundi ruhande ntiwamuntandukanya n’abandi bantu kuko yibera mu gufana.

Njya mbona urukundo abantu bakunda umupira, mu byukuri gukunda umupira ntabwo ari icyaha ariko kugeza igihe umupira uwusimbuza Imana, ugasa n’umuntu uramya umupira,ukagera igihe udashobora guterana n’abandi kubera urukundo rw’umupira. Abakirisito badakomeye mu gakiza aho kugirango baramye Imana usanga hari ibindi bintu bimitse bitari Imana. Bibiliya yavuzengo Sinzabasiga nk’impfubyi, ahubwo nzaza aho muri. Iyo bavuze nzaza aho muri, nuko yaraziko dukeneye umufasha byatuma dukomera mu gakiza.

Reka nkubaze akabazo koroheje: Ninde papa wawe wo mu mwuka ? ukizwa ninde wakwakiriye ? ninde wakwigishije uko bakizwa ? ninde wakwigishije uko batera intambwe ? ninde wakwigishije uko bahinduka ? ninde wagufashije mu nzira ijya mu ijuru ?

Hano nagirango mbabwire, hari ibindi bigaragara nk’ingaruka , bigaragaza ubwana bwo mugakiza no kudakura no kutabona umubyeyi ukurera : Abantu birema ibice, baratandukana bya hato na hato, hari n’abarwanira mu nsengero bapfa amaturo,gukoresha nabi umutungo w’itorero, icyubahiro,kutubahana, abandi uzasanga baba mu buhanuzi bw’ibinyoma,abandi bigisha inyigisho zituzuye kugirango babone indamu,uzasanga abakirisito bagwa bya hato na hato, uzasanga ingo zitandukana harimo n’iz’abakirisito,urubyiriko rufite uburere budahagije kuko babuze umuntu ubakomeza mu gakiza, hari igihe abantu bimura Imana ahubwo bakimika amategeko akakaye y’imihango y’amatorero adafite aho yanditse muri Bibiliya. Izi ni ingaruka zo kutagira umubyeyi wo mu mwuka. (16:09)

Tuzakomeza ubutaha n’igice cya kabiri

Uwiteka Imana ibakomeze kandi ibakore ku maso

[email protected]