Ubuhamya bwa Penina wari indaya iteye ubwoba

Nitwa NYINAWUMUGISHA Penina mvuka mu kinigi mu karere ka musanze ndi umumama w’abana 2, navutse nsanga ababyeyi banjye barakirijwe mu badiventiste ariko njyewe nkura nakuze nabi nkura ndi ikirara kimwe kibi cyane, ubu nabaye icyamamare mu byaha byinshi bitandukanye nta cyaha kibaho ntigeze nkora

Naje guhabwa mission n’abarozi ntumwa n’umugore kujya kumwibira umusaraba mu irimbi, ibyo sinari mbimenyereye kuko ibyo nari nsanganywe zari inzaratsi gusa ubwo nahawe mission ku munsi wa mbere, ubwo uwo mugore yarambwiye ngo ngende nijoro nambaye ubusa , ubwo hari saa saba z’ijoro ndagenda umusaraba ndawuzana nywushyira wa mugore ampa ibihumbi 20000 ndataha

Nari umurozi wazingaga abakobwa bagahama iwabo, nkarara mpiga udusimba twitwa udusamunyiga nkatubona nkafata amaraso yatwo nkajya kugurisha nkatunga amafaranga menshi cyane ubundi nkikorera ibyaha gusa gusa nkaroga, nkatanga inzaratsi, naribaga nkasambana, nari umwesikoro nkahindura telephone isabune, natwaraga abagabo b’abandi, nakoze byinshi sinabivuga ngo mbirangize pe

Nta muntu wigeze aza kumbwiriza kuko Imana yari yarabonye ko ntawanshobora, ahubwo Imana yaranyifatiye ubwayo insanga mu nzozi iranyigisha nkanguka njya gusenga ngezeyo biremera ndasenga numva imitwaro myinshi imvuyeho

Nkimara gukizwa rero nahuye n’ibigeragezo byinshi abagabo nabonaga bampa ibihumbi 5000 bakansaba kumpa ibihumbi 50000, inzara yaranyishe ndaseba cyane abantu bandyanira inzara namaze iminsi irindwi ntarya kandi mbere nari umugore wihaye

Mama yari afite ikibazo kuko muri karitsiye abantu bamuryaniraga inzara bakavuga ngo dore nyina wa ya ndaya, kari agahinda gakomeye cyane kuri we

Sinavuga ngo ndangize ariko ndashima Imana yangiriye neza ikankiza ibyaha bitandukanye, ndibuka ko umugabo nashakaga wese nabanaga na we kuko naragendaga nkajugunya inzaratsi mu idirishya cyangwa munsi y’urugi ubwo umwiryane ugahita utaha muri urwo rugo ubundi umugabo agataha iwanjye

Ndashima Imana yangiriye neza ikankiza indwara ya SIDA navuye ku biro 75 ngera ku biro 30 ariko ndashima kristo wangiriye neza ikankiza indwara ya SIDA nari meze nabi icyo gihe nari naravuye aho nabaga kubera akato njya gutura aho abantu batanzi ndatesekara cyane nkajya kota izuba rikarinda rirenga ntawe mfite uhanyanura

Ariko Imana yo mu ijuru yangiriye neza irandokora nishimwe, nawe ufite ibibazo, ibigeragezo ndetse n’intambara nyinshi uhange amaso Imana kuko iyandokoye nawe yakugirira neza ikagutabara

[email protected]