Ubuhamya bwa Eduardo wakijijwe yari umujura ruharwa.

Eduardo Torress ni umusore wavukiye mu muryangango ukennye cyane, ababyeyi be baje gutandukana, baramuta atangira ubuzima bwo kwibana, yaje gutangira imico mibi yo kwiba imodoka,kunywa ibiyobyabwenge. Kubwe ntiyemeraga ko Imana ibaho ariko nyuma yaje gukizwa.

Mu gihe Eduardo Torress yari akiri muto afite imyaka 10, umuryango we wabaga mu bukene bukabije ku buryo bitari byoroshye kubona ibitunga umuryango wabo ndetse no kubabonera imyambaro, si ibyo gusa ahubwo nta n’ubwo bitaga ku bana babo babiri bari bafite aribo Eduardo na murumuna we wari uruhinja, ntibatinyaga kubasiga mu nzu bonyine. Igihe cyaje kugera ababyeyi be bagirana amakimbirane mu rugo byaje no kubaviramo gutandukana, mama wa Eduardo yagiye gushaka undi mugabo ajyana na murumuna wanjye naho Torress asigara atagira kivuriririra.

Eduardo yanyuze mu bihe bikomeye aho agira ati: “ababyeyi banjye bakimara kunsiga njyenyine, siniyumvishaga ibiri kumbaho. Mu gihe mama yagendaga, yafashe murumuna wanjye aramujyana njyewe aransiga mpinduka intabwa kugeza ubwo abana bo ku ishuri nabo bambonaga nk’umuntu udafite agaciro muri macye udakunzwe kandi wihebye.

Muri ako kaga kose nari ndimo, sogokuru na nyogokuru banjye bangiriye impuhwe bashaka kugira icyo bakora kugirango ngire ubuzima bwiza ariko sinabumviye ubwo bashakaga kunjyana mu rugo rwabo ngo bandere, ahubwo nikomereje ubuzima bwo kwibana. Nabaga mu nzu njyenyine ababyeyi banjye bari baransizemo, iyo nzu yabaga ahantu hayonyine, nta nzu n’imwe y’abaturanyi yari iri hafi aho. Ikintu cyantungaga ni amacunga nasoromaga ku giti cyari mu ishyamba twari duturanye.

Ubwo nari mu kigero cy’imyaka 12, natangiye kwiga kunywa itabi,inzoga ndetse n’ibiyobyabwenge by’ubwoko bwose kugeza ku rwego nahindutse umujura nkajya niba imodoka z’abantu nkaziheza ntibazamenye ko ari njye wazibye. Ariko n’ubwo byari bimeze bityo nakomezaga gutsinda amasomo nkagira amanota meza ku ishuri, ibintu nanjye ntabona uko nsobanura kuko bitumvikana gutsinda amasomo kandi nywa ibiyobyabwenge.

Nyogokuru wanjye yakijijwe mu gihe nari mfite imyaka 13. Yahoraga ampangayikiye ashaka ko nanjye nakizwa, yahoraga ambwira urukundo rw’Imana, ariko njye nkamuhakanya nkamubwira ko iyo Imana iza kubaho, nari kuba mfite umuryango kandi sinari guca mu bikomeye nk’ibi.

Uko iminsi yagendaga ishira niko nazamukaga mu ntera y’ubugizi bwa nabi ku buryo ku myaka 16 y’amavuko, nabashaga kwiba imodoka z’abantu nkaziheza, nkiba abantu amafaranga yabo kugirango mbashe kugura ibiyobyabwenge. Ariko ibyo bibi byose nkabifatanya n’amasomo kandi nkagira amanota meza.

Umunsi umwe nyogokuru na sogokuru bafashe imodoka yabo bajya kundeba kuko bumvaga bahangayikishijwe n’ubuzima bwanjye kandi bifuzaga kunjyana mu rugo rwabo bakanyitaho nk’umwuzukuru wabo, ariko ntibyabahiriye kuko mu gihe bari mu nzira bajya kunshaka bakoze impanuka kuko bari batwawe n’umushoferi wasinze muri iyo mpanuka, sogokuru wanjye yahasize ubuzima. Nkimara kumva ko sogokuru yapfuye numvise ngize agahinda gakomeye mpita mfata umwanzuro wo kujya kubana na nyogokuru kuko yari asigaye wenyine. Yagerageje kunyigisha ijambo ry’Imana ariko sinabyiyumvaga

Nyogokuru wanjye yakomeje kunyinginga ngo tujyane ku rusengero, umunsi umwe naramwemereye turajyana, ngezeyo bagera mu gihe cyo gushima Imana nuko mbona umugore umwe arahagurutse ashima Imana ko yamukijije cancer y’ibere. Naratashye ngeze mu rugo ntangira kumva ko Imana ibaho koko, mukecuru wanjye nawe yakundaga kunsengera nuko nza gusubira ku rusengero barabwiriza birangiye bahamagara abashaka gukizwa mpita mpaguruka niruka baransengera nakira Yesu nk’umwami n’umukiza w’ubugingo bwanjye.

Kugeza ubu mfite imyaka 31, ndi umwe mu babwirizabutumwa muri gereza zitandukanye, nigisha ubutumwa bwiza ku bantu banywa ibiyobyabwenge. Si ibyo gusa ahubwo tujya mu ngo gusura abantu no kubasengera kugira ngo nabo bakizwe bazabashe kugera mu ijuru”.

Source: www.truthsaves.org