Ubuhamya bwa David, wamaze igihe kirekire muri koma bitewe n’uko yasuzuguye umuhamagaro w’Imana.

David ni umugabo wakundaga gusenga, ariko yasuzuguye umuhamagaro w’Imana wo kubwiriza ubutumwa ahitamo kuba umukanishi uhagarariye abandi, ntibyamuhiriye yaje gukora impanuka ajya muri koma, yabaye nka Yona Imana yohereje i Nineve akabyanga agahitamo guhungira i Tarshish.

Si byiza gusuzugura Imana, mu gihe Yona yahungaga Imana yateje umuraba mu nyanja kugeza igihe bamukuye mu bwato bakamujugunya mu nyanja urufi rwahise rumumira bimubera inzira yo guhita yumvira Imana. Ibi bifitanye isano n’ubuhamya bwa David nk’uko abyivugira mu magambo ye:

Umunsi umwe nisanze ndyamye mu cyumba kidasanzwe. Si ibyo gusa ahubwo sinabashaga kwinyeganyeza, imikaya (muscles) yabashaga gukora ni amaso yonyine. Nashatse kurira cyane nsakuza, mbona kuvuga birananiye, nitegereje mbona imiheha ibiri icometse ku mubiri wanjye umwe ushinzwe kungaburira undi ushinzwe kunyongerera umwuka mwiza wo guhumeka (oxygene).

Nagerageje kureba hirya no hino ngo menye aho ndi haranyobera. Nabonaga hameze nko ku bitaro kuko nabonaga banyuranamo bihuta, nkomeza kwitegereza mbona ku musego hari ifoto y’umugore wanjye (yari mwiza cyane.)

Umuforomokazi yaje aho ndi aratangara ati: “ni byiza wakangutse! Bumbura amaso nurangiza usinzirize niba koko unyumva”. Ndabikora maze arishima arambaza ati: “urashaka ko nguhamagarira umugore wawe?” ndamwikiriza aranezerwa abona ko nagaruye ubuzima.

Nyuma y’isaha, numvise ijwi ry’umugore wanjye mu matwi yanjye rigira riti: “David, uranzi? Kanura kandi usinzirize niba unzi, nabyo ndabikora. Arambaza ati dufite abana bangahe? Musubiza ko ari batanu, arambwira ati: nashakaga kumenya ko wibuka Jeffrey umwana wacu wa gatandatu wavutse mu gihe cyegeranye cyane nicy’impanuka yawe.

Nuko ndamubaza nti: “iyihe mpanuka? Ni ibiki byambayeho?” ati: “tega amatwi ngusobanurire uko byakugendekeye”.

Mu mpera z’ukwezi kwa Nyakanga mu mwaka wa 1997, warabyutse mu gitondo ujya ku kazi utwaye moto yawe y’umukara wari umaze igito gito uguze, mu gihe wari uri mu nzira utaha, watekereje guca kwa nyogokuru wawe ngo ubanze umusuhuze kandi wereke barumuna bawe ko wungutse hanyuma ubone kuza mu rugo, moto wakoze impanuka moto yarakugushije nuko twahise tukuzana kwa muganga wavunitse amaboko, amaguru ndetse umutwe urangirika biteye ubwoba n’ubwenge burayoba ukurizamo kujya muri koma wari umazemo hafi umwaka wose.

Mu gihe David yari amaze kumva ibyamubayeho byose, uburyo ingingo ze zangiritse, nibwo satani yamugendereye mu gihe cya nimugoroba ari mu cyumba wenyine (kwa muganga) Satani yaramusanze yumva ijwi rimugira inama yo kwiyahura ako kanya ngo areke gukomeza kubabazwa n’umubiri. Nawe ntiyatindiganije yahise afata za sonde ziri ku mubiri we zishinzwe kumugaburira no kumuha umwuka arazica. Akimara kuzica kubw’amahirwe umuforomo aba arinjiye abonye ibyo David amaze gukora ahita ahuruza abandi baganga byihuse baraza bongera kubisubiza kuri gahunda.

Abaganga bamaze kugenda David yasigaye wenyine aratekereza cyane, agiye kumva yumva icyumba cyuzuye ubwiza bw’Imana. Yumvise ijwi riti: “kuki wagerageje kwiyica?” nuko David akorwa n’isoni yibuka icyaha yagambiriye gukora. Ijwi ryongera kumubwira riti: “iyo uza kwiyica ntiwari kuzabona ubugingo buhoraho kuko wari kuzajya muriro nk’abandi bicanyi bose kuva uyu munsi umenye ko ntakinanira Imana. Menya ko ndi kumwe nawe kandi Umwuka Wera zahorana nawe ibihe byose”

Kuva icyo gihe,David Imana yaramukijije ndetse imuremamo umutima mushya ikimwaro cyose yari afite kirashira atangira kuvuga ubutumwa nk’uko Imana yabimuhamagariye.

Mu gusoza ubuhamya bwe, David aragira abantu inama kutagira urwitwazo na rumwe ku murimo w’Imana kuko niyo ifite ububasha bwose kubyo yaremye.

Source: truthsaves.com