URUGAMBA RW’I GETSEMANE/ Ev Adda Darlene Kiyange

"Data, nubishaka undenze iki gikombe, ariko bye kuba uko nshaka, ahubwo bibe uko ushaka." Luka 22:42

Iri ni isengesho Umwami Yesu yavuze ari i Gestemani. Aha yaharwaniye urugamba rukomeye. “URUGAMBA RW’I GETSEMANI”.

Umuntu agera i Getsemani ryari?

Ni igihe ugomba kunyura ahantu hakomeye hagusaba kugira ibyo wigomwa, utakaza, ndetse bishoboka ko byanakugiraho ingaruka.
I Getsemane iyo uhageze unanirwa amahitamo kandi bikakubirisha icyuya.

Umutima uba ukunze ariko umubiri ukagira intege nke. Ibyo Imana ishaka ntibikuryohera birakururira cyane, ndetse wumva ari umutwaro ukuremereye.

Ni urugamba rw’amahitamo. Icyiza uba ukizi ariko kugihitamo bikakuremerera.

Urwana no gukurikiza ukuri uko byamera kose. Amahitamo agakomera cyane. Mu mutima haba harimo gutsikamirwa gukomeye kugusunikira gukora ibyo Imana ishaka. Kamere nayo ikaguhakanira ikakwereka ko bitashoboka, ahubwo ko wapfa.

Ariko Imana iba ikeneye ko uba mu kuri naho kwakugirira nabi. “Urugamba rw’i Getsemani.”

Bigusaba imbaraga z’umutima, bigusaba kuba ukunda Yesu n’umutima wawe wose kugira ngo utsinde urwo rugamba. Bigusaba gusenga cyane no kumva ufite ukuntu uri hejuru y’ubushobozi bwa satani.

Kandi Getsemani ntizingana. Hari nini, iziringaniye, hari n’izindi ntoya.

Urugero. Niba ugambiriye mu mutima ko uzampa impano runaka, wenda uti: “Jye nzamugurira isakoshi, urukweto, cyangwa nzamusura muhobere cyane”, urumva ko ari ikintu gito. Ariko iyo nk’ejo ngutsitayeho utarabikora, ako kanya uhita wicara i Getsemani.

Kunkorera ka kantu keza nukuntu ngutsitaje bihinduka urugamba rw’i Getsemani. Icyihuta nugusiba bya bintu byiza wateganyaga kunkorera. Ariko uba ugomba kurwana ku buryo unesha ukankorera bya bintu byiza kandi naragutsitaje. Nibwo uba unesheje.
Bifate ubishyire mu rugo urasanga uyu musozi ujya uwicaraho kenshi, ahubwo iyo utabaye mu bihe byo gusenga uhafatira ibyemezo byo gutsindwa gusa.

Aho hantu rero, Yesu yarahanyuze ndetse aranesha, musabe kunesha nawe uhatambuke gitware amaganya n’imiborogo byumvikanire i kuzimu, iwawe humvikane impundu. Arabitanga cyane. Igitangaje kandi abitangira ubuntu, kandi nta wundi numwe ubitanga utari we, undi wese ibyo yaguha byagutera kwicuza, ariko kunesha gutangwa na Yesu ntigutera kwicuza kabone nubwo habonekamo imibabaro.

Yesu aguhe umugisha cyane urwane intambara nziza uhitemo ibyiza kuruta ibibi.