UMUSOMYI WA BIBILIYA, kuwa kabiri tariki ya 29/08/2017

UMUSOMYI WA BIBILIYA, ni igitabo gitegurwa n’UMURYANGO W’ABASOMA BIBILIYA MU RWANDA (Ligue Pour la Lecture de la Bible), kigamije gufasha abantu guhura n’Imana buri munsi mu ijambo ryayo. Kuri uyu wa kabiri tariki ya 29/08/2017 turasoma muri Matayo 21.23-32 :

23. Yinjiye mu rusengero, abatambyi bakuru n’abakuru b’ubwo bwoko baza aho ari yigisha, baramubaza bati “Ufite butware ki bugutera gukora ibyo? Ni nde wabuguhaye?”
24. Yesu arabasubiza ati “Nanjye reka mbabaze ijambo rimwe, nimurinsubiza nanjye ndababwira ubutware buntera kubikora.
25. Kubatiza kwa Yohana kwavuye he, ni mu ijuru cyangwa ni mu bantu?” Nuko biburanya mu mitima yabo bati “Nituvuga yuko kwavuye mu ijuru aratubaza ati ‘Ni iki cyababujije kumwemera?’
26. Nituvuga yuko kwavuye mu bantu, dutinya ko abantu batugaya kuko bose bemera ko Yohana yari umuhanuzi.”
27. Ni ko gusubiza Yesu bati “Ntitubizi.” Na we arababwira ati “Nuko rero nanjye simbabwira ubutware buntera gukora ibyo.
28. “Ariko ibi mubitekereza mute? Habayeho umuntu wari ufite abana babiri, asanga umukuru aramubwira ati ‘Mwana wanjye, genda uhingire uruzabibu rwanjye.’
29. Na we aramusubiza ati ‘Ndanze.’ Maze hanyuma arihana aragenda.
30. Se asanga uwa kabiri amubwira atyo, na we aramusubiza ati ‘Ndagiye data’, ariko ntiyajyayo.
31. Muri abo bombi ni nde wakoze icyo se ashaka?” Baramusubiza bati “Ni uwa mbere.” Yesu arababwira ati “Ndababwira ukuri yuko abakoresha b’ikoro n’abamaraya bababanziriza kwinjira mu bwami bw’Imana.
32. Dore Yohana yaje muri mwe agendera mu nzira yo gukiranuka ntimwamwemera, nyamara abakoresha b’ikoro n’abamaraya bo baramwemeye, ariko nubwo mwabibonye mutyo ntimurakihana ngo mumwemere.

Ikibazo kidufasha kurushaho gusobanukirwa:

Mbese mu byo nsomye harimo ijambo RIMBURIRA?

Ubusobanuro bw’umusomyi:

Maze hanyuma arihana aragenda (29): Nyuma yo kunanirwa gusubiza ikibazo Yesu yari abajije abatambyi, yabaciriye umugani ashaka gusobanura icyo kumvira Imana by’ukuri bivuze. Umwana mukuru arashushanya abakoresha b’ikoro n’abamaraya, babanje kugendera mu nzira z’uburiganya n’ubusambanyi batera Imana umugongo. Nyamara ubwo Yohana yavugaga ubutumwa, benshi muri bo barihannye bazibukira imirimo y’umwijima bakoraga. Zirikana ko umuntu wihannye agahindukirira Imana akava mu bibi yakoraga, ibyaha byose yakoze bitakaza agaciro mu maso y’Imana (2Kor.5.17). Umwana wa kabiri arashushanya abanyedini bo mu gihe cya Yesu, bavugaga iby’Imana cyane nyamara imbuto z’imirimo yabo zari mbi. Ibuka ko kumenya iby’Imana bidahagije, icyangombwa ni ugukora ibyo idutegeka. Ntimurakihana ngo mumwemere (32): Izingiro ry’ubutumwa Yohana, Yesu, Petero na Pawulo bavugaga ni ‘ukwihana’ (Mat.3.2,4.17;Ibyak.2.38,17:30). Zirikana ko Kwizera Yesu no Kwihana ibyaha aribyo rufatiro nyarwo rw’ubukristo.

UWIMANA Ange Victor
Tel: (+250)788552883, (+250)725151463
Email: [email protected]