Turinde Yesu gukomerekera mu nzu iwacu/ Ev. Adda Darlene Kiyange

Kandi bazambaza bati: “Izo nguma zo mu biganza byawe wazikomerekejwe n’iki?” Nawe azabasubiza ati: “Izi nguma nazikomerekeye mu nzu y’inshuti zanjye”. Zekariya 13:16

Yesu agaragaza ko akomerekera mu nzu y’inshuti ze.

Yesu yamaranye igihe kinini n’abantu, ariko igihe kiza kugera arababwira ati: “Sinkibita abagaragu muri inshuti zanjye” Yohana 15:15

Ibyo dukora, ibyo tuvuga, imigambi yo mu mitima yacu, ibyemezo dufata bya hato na hato, akenshi bibonekamo ibidatunganye. Ibyo rero nibyo bikomeretsa Yesu.

Nta muntu utazi neza ko Yesu yabambiwe I Gologota, ariko dore uko yisobanura, ati: “Mu nzu y’inshuti zanjye niho nakomerekeye”

Akenshi rero akomerekera iwacu, tube maso, twirinde muri byose uko yakomeretse byari bihagije twe gukomeza kumukomeretsa.

Uwagize amahirwe yo kubyara azi neza uburyo umwana avuna ahaba mu kumubyara ndetse no kumurera ngo akure, iyo umubyeyi abuze umwana we arahangayika cyane akarira amarira menshi akumva imvune n’imibabaro byose yagize kubw’uwo mwana biragarutse.

Uko ni nako Yesu bimugendera iyo abona dusubira kuba mu buzima bw’icyaha tukaba nk’abapfuye mu buryo bw’umwuka. Ahita yibuka imibabaro yose yagize kugira ngo tube amahoro ariko twe tukayikuraho.

Ese iyo Yesu arebye ubuzima bwawe aranezerwa? Cyangwa ahita yongera gukomereka? Genzura neza inzira zawe, niba utarihana ubikore we kubabaza Yesu.

Niba kandi warasubiye inyuma gerageza ugabanyirize umwami wawe umubabaro ugarukire aho yiteguye kukwakira no kuguha imbabazi nta kindi kiguzi agusabye kereka kumwerera akaba ari we mwami wenyine wimika mu mutima wawe, kuko Yesu ntakwita umugaragu, yumva uri inshuti ye, ngaho gerageza kumurinda gukomerekera iwawe kandi uri inshuti ye!

Imana iduhane umugisha!