Sobanukirwa byinshi ku bijyanye no kurya ibihumyo.

Muri iyi nyandiko, tugiye kuvuga ku bimera byitwa ibihumyo, ubushakashatsi bugaragaza ko ku isi habaho ubwoko bw’ibihumyo burenga ibihumbi ijana na mirongo ine(140 000), bimwe muri ibyo biba biribwa, ibindi bitaribwa.

Ibihumyo tugiye kuvugaho, ni ibiribwa, biboneka mu ibara ry’umweru, byitwa ‘’Agarricus bisporus’’ mu rurimi rw’icyongereza, turavuga ku ntungamubiri dusanga muribyo, ndetse turanavuga icyo kurya ibihumyo, bimarira umubiri w’ikiremwamuntu.

Ibi bihumyo ni imboga nziza cyane, ziribwa n’abantu kandi zikungahaye ku ntungamubiri zitandukanye, zimwe muri izo ntungamubiri twavugamo nk’ibyubaka umubiri, ibitera imbaraga, ibinyamavuta, ibihumyo kandi ni isoko nziza ya vitamine D na C, imyunyungugu itandukanye nka seleniyumu(Selenium), zinc, calisiyumu, ubutare, potasiyumu, uturemangingo ndodo, ndetse n’ibindi binyabutabire bitandukanye, turibukomeze kurondora hepfo, tuvuga n’icyo bifasha umubiri.

Dore icyo kurya ibihumyo bimarira umubiri w’ikiremwamuntu.

Nkuko twagiye tubivuga kenshi, kurya imbuto n’imboga zo mu bwoko butandukanye, byaba akarusho zikaba zitacishijwe mu nganda, bifasha cyane mu kugabanya ibyago byo kurwara indwara zitandura, muri izo twavugamo nk’indwara zifata umutima, indwara y’igisukari( Diebete), umubyibuho ukabije, ndetse n’impfu zitateganijwe.

Kurya ibihumyo bifasha umubiri muri byinshi ariko bimwe muri ibyo twavugamo:

 Kuringaniza ibiro no kumva udashonje, kuko ibihumyo biba bikungahaye ku turemangingondodo, dufasha umuntu kumva ahaze, bituma ataryagagura, ndetse tukanafasha mu kugabanya ubushake bwo kurya bukabije, kuko iyo wumva ushonje, ukaryagagura , urya ibiryo byinshi, waba udakora imirimo igusaba ingufu nyinshi, ngo umubiri ubashe gukoresha bimwe wawuhaye, aho niho kwiyongera mu biro bituruka.
 Kongerera umubiri ubudahangarwa bw’umubiri, kuko bikungahaye kuribi binyabutabire byitwa antioxidant mu rurimi rw’icyongereza, vitamine C , bityo bikagabanya ibyago byo kurwara indwara zitandukanye, no gufatwa n’ubwandu butandukanye.
 Gufasha umutima kugira ubuzima bwiza, kubera ko ibihumyo biba bikungahaye ku myunyungugu, nka potasiyumu na sodiyumu, iyi myunyungugu ikorana mu kuringaniza umuvuduko w’amaraso no gufasha imijyana n’imigarura kugira ubuzima bwiza.
 Kurinda umubiri kurwara kanseri zitandukanye, kuko ibihumyo bikungahaye ku binyabutabire byitwa antioxidant , ndetse n’umunyungugu witwa selenium,ibi byose bifatanya mu kurinda uturemangingo mfatizo twubatse umubiri, kuba twagira ubuzima bubi, tugakura mu buryo bubi, ari nabyo biba imbarutso yo kuba umuntu yarwara kanseri.
 Gufasha urwungano ngogozi gukora neza, kuko bikungahaye kuri probiotic zifasha urwungano ngogozi kugira ubuzima bwiza, zikanarufasha gukora akazi neza.
 Gufasha amagufwa kugira ubuzima bwiza, kubera umunyungugu witwa kalisiyumu dusanga mu bihumyo,ufasha mu gukorwa no gukomera kw’amagufwa , ndetse bikanayarinda kwangirika nko kuvungagurika n’ibindi.
 Kurinda umubiri kurwara indwara y’igisukari( Diabete), kuko ibihumyo bikungahaye kuturemangingo ndodo, ndetse bikaba bigira n’amazi menshi, aho muri garama100 z’ibihumyo, 92% aba ari amazi, bikaba kandi bitagira urugimbu n’amavuta menshi, ibi byose bifasha imisemburo iringaniza isukari mu mubiri, kuba yakora neza.

Source:www.foodevaluation.com
[email protected]