Siga ibyawe ubanze ujye gutabara abataragera aho ugeze. Ev Adda

Siga ibyawe ubanze ujye gutabara abataragera aho ugeze.

Dusome Yosuwa 1:14-15
"Abagore banyu n’abana banyu n’amashyo yanyu bizasigara mu gihugu Mose yabahaye cyo hakuno ya Yorodani, ariko mwebwe ab’intwari mwese mubanzirize bene wanyu kwambuka, mwitwaje intwaro kugira ngo muzabarwanire,
kugeza aho Uwiteka azaruhurira bene wanyu nk’uko namwe yabaruhuye, na bo bagahindura igihugu Uwiteka Imana yanyu yabahaye. Nyuma muzasubire mu gihugu mwahinduye mukibemo, icyo Mose umugaragu w’Uwiteka yabahaye hakuno ya Yorodani iburasirazuba."

Aya magambo ni Yosuwa yayavuze ayabwira aba
1. Rubeni
2. Gadi
3.Igice cy’aba Manase.
Iyi miryango yari imaze gukatirwa amasambu yayo hakuno ya Yorodani (Est) nta kibazo na kimwe bari basigaranye Imana yari yarangije kubaha ubutaka bwabo.

Bari bakwiye kuryama bakabwira bene wabo bati sha mukomeze twe cyavivuwe
Yosuwa ati ntabwo birangiye ahubwo ni mwebwe mujya imbere muherekeze bene wanyu mubafashe kurwana kugeza nabo babonye ubutaka bwabo. Ati musige abagore n’abana banyu nibyo mutunze hano muze dukomeze muzagaruka.

Barabyemeye bati tuzabikora dutyo. Bari abantu b’Imana iyo baba abandi bari kuvuga bati ntabwo twarenga aha n’intambwe imwe. Ariko kuko bari buzuye urukundo rwo gukunda bene se bemeye kujya kubafasha guhindura igihugu bakagifata. Bari bazi ko atari ukugenda batoragura byasabaga kurwana.

Hari imvugo njya numva ngo "uriya yageze iyo ajya". Byukuri ntabwo byari bikwiye ko umuntu yicara ashaka ibye gusa ngo arangize yihugireho gusa na twa duke abonye dore ko ntawugerayo ahora ashakaisha, ntiyibuke ko hari abandi bari ku musozi witwa "kurindira Imana."

Erega iriya miryango yindi yari irindiriye harimo na yorodani yari ikibari imbere kandi badafite ubwato.

Imana niguha ibyibanze byose uzamenye ko uyirimo umwenda wo guherekeza abatarabibona kugeza babibonye. Hmmm ndi kumva Imana.
Imbere yabo haracyari Yorodani ibateye ubwoba, ibyo bakoze ntibyemera. Bafata na biriya bikanga. Ubwose uraryama abe arinde ubajya imbere?
Imana yaguhaye ibyibanze hari icyo igutegerejeho. Nuko uherekeza bene wanyu mu kaga kabari imbere. Wikihugiraho, wikumva ko wowe byakemutse, abandi bategereje Imana kandi bakeneye ababajya imbere.

Mbese ye? Nta muntu uri aho hafi waherekeza ukamufasha kwambuka mpaka afashe gakondo ye nawe ukamugeza ahantu uvuga uti byibuze, hanyuma ugasubira mu gikingi cyawe ko ari icyawe Imana yakwihereye ntawuguhagaze hejuru?
Wikitotomba ngo barakurushya, ngo baba basabiriza. Oya Imana ibahaye gakondo zabo ntibakongera kukurushya. Ahubwo basengere unabaherekeze bashyikire gakondo.

Yesu aguhe umugisha kubwo kumva no kwakira neza ijambo ry’Imana.

Ev. Adda