Reka Imana ikurwanire urugamba.

Mu isi dufashe igihe muntambara, duhura n’ibirushya byinshi, bimwe biza biturutse ku mibanire yacu na bagenzi bacu, ibindi bikaza bitunguranye. Ibyo byose iyo bitugezeho buri wese arwana intambara yo kwivana muri ako kaga ari naho agaragariza ubuhanga bwe ukaba wamenya ngo yarwanye neza cyangwa nabi.

Turebere hamwe inkuru ya Abigayile na Dawidi (1 Samweli 25). Iyi nkuru iratangira ivuga ku rupfu rw’Umuhanuzi Samweli. Dawidi n’abantu be (Abisirayeli) bari bababajwe no kubura umuhanuzi ukomeye . Dawidi n’Abisirayeli bagombaga kugira amakenga kuko umwami Sawuli yari agiye kuva ku ngoma kandi Imana yari yarabwiye Samweli ko Dawidi ariwe uzasimbura Sawuli ku ngoma. Kubera iyo mpamvu, Sawuli yahigaga Dawidi ngo amwice.

Dawidi n’abantu be bafashe urugendo bagera i Karumeri hari umugabo witwaga Nabali. Nabali nta mpuhwe yagiraga kugira nabi yari yarabigize umushinga (1 Samweli 25:23). Dawidi yatumye abagaragu be kwa Nabali ngo bamubaze niba yabaha ibyo kurya kuko bari bashonje, bageze kwa Nabali bamubwiye uko Dawidi yabatumye, Nabali mu bupfapfa bwe arabibima. Abagaragu bagarutse kwa Dawidi bamubwira uko byagenze, Dawidi arababwira ati mwambare intwaro dutere Nabali tumurimburane n’ibyo mu rugo bye byose.

Nyamara, Abigayili umugore wa Nabali yari umunyaburanga kandi yari umunyabwenge. Akimara kubwirwa amakuru y’ibyo Nabali yakoze, yahise afata ibyo kurya ashyira Dawidi n’abagaragu be ndetse asaba imbabazi Dawidi kumafuti umugabo we yakoze.

Nuko Dawidi abwira Abigayili ati “ubwenge bwawe bushimwe kandi nawe ushimwe,kuko uyu munsi undinze kugibwaho n’urubanza rw’amaraso, kuba arijye wihorera ubwanjye” (1sam25:33) Mu byukuri dawidi yarishimye ashima n’Imana ko atakoze icyaha cyo kwihorera.

Iri ni isomo rikomeye, biratworohera kubabara iyo badukoreye ibibi. Uko umwaka ushize tubona ingero z’abantu baca umubano ndetse bagashyamirana hagati yabo. Ariko twebwe abana b’Imana twakagombye gukora nka Dawidi we yaremeye Imana imurwanira urugamba. Si ngombwa rero kwihorera kuko ibibi bizajya ku mitwe y’ababikora.

Bamwe baribaza baribwira bati “twahuye n’ibibazo byinshi ariko Imana ntiyaturwaniriye” Mariko (4:35) atubwira inkuru y’abigishwa batwewe n’umuraba mu Nyanja ya Galileya mu gihe Yesu yari asinziriye. Abigishwa barasakuje bati “Ntubyitayeho kandi ubona tugiye gupfa ” (Mariko 4:38) nuko Yesu arabyuka acyaha umuraba inyanja iratuza (Mark 4:39–40). Abigishwa be babibonye baratangara bati burya n’inyanja ziramwumvira.

Imana ifite ubushobozi bwo kurwana urugamba rwacu. Biroroshye kuri twe gutekereza ko twakwirwaniririra, ariko imbaraga nyakuri ntizizigaragarira mu bwenge bwacu, mu ntwaro cyangwa imbaraga z’umubiri, imbaraga nyakuri ni ukwemerere Imana ikakuyobora kiko niyo ifite icyo yakora ku baturwanya twe tutakwishoboza.Iyo wirwaniriye, ubasha gukora bicye. Ariko iyo weguriye Imana abakurwanya n’ ibikugoye, uzareba ibikomeye Uwiteka azagukorera.
[email protected]