Pasika itwibutsa iki ?

Kera cyane uyu munsi wa Pasika, Abayisiraheli bawizihizaga buri mwaka bibuka ukuntu Imana yabarokoye uburetwa bwa Egiputa ikabambutsa inyanja itukura ibarokora uburetwa bw’Abanyegiputa. Bityo rero, igihe Mose abakuye mu Egiputa, Pasika bayigize urwibutso rw’ibohorwa ryabo. Akamenyero ko kwizihiza Pasika y’Abayisiraheli katangiriye mu butayu. Iryo jambo Pasika rikavuga: « kwambukiranya, guca hagati, kuva, guhita, guhaguruka». Mu ijoro rya Pasika, ni bwo Uhoraho yagaragarije Abayisiraheli urukundo rukomeye. Yambukiranije igihugu cy’Abanyegiputa, arabahana, nyamara ahita mu Bayisiraheli rwagati arabakiza, arababohora ngo abajyane mu gihugu cy’isezerano; igihugu gitemba amata n’ubuki

“Mujye mubasubiza muti ‘Ni igitambo cya Pasika y’Uwiteka, kuko yanyuze ku mazu y’Abisirayeli bari muri Egiputa agakiza amazu yacu, ubwo yicaga Abanyegiputa.’ ” Abantu barunama bikubita hasi.” ( Kuva12:27).

Pasika ni igihe kiza cy’ubusabane, gusangira no gusangiza abandi ibyishimo dukesha urupfu n’izuka bya Yesu Kristu bituma kuko Yesu ari muzima. Muri Pasika tuzirikana ibyiza Imana igirira umuryango wayo, kandi ko nta handi twamenyera Yesu wazutse atari mu Ijambo rye no mu Imanyura ry’umutsima. Yesu wazutse niwe wenyine Nzira, Ukuri n’Ubugingo. Yesu yasubiye mu ijuru ngo adutegurire aho tuzaba ubuziraherezo.

Mu Isezerano Rishya, Pasika bivuga «ububabare, urupfu n’izuka bya Yesu Kristu». Ntibisobanura gusa kuva mu bucakara ujya mu bwigenge, nanone bisobanura kuva mu bucakara bw’icyaha ujya mu bwigenge bw’umutima, kuva mu rupfu ujya mu buzima, kwiyambura umuntu usaza ukambara umuntu mushya, guhaguruka umuntu akava mu cyaha gishyira urupfu n’umwijima maze akajya mu buzima n’urumuri.
Muri Pasika, Yesu wazutse aradukangura, akaduhagurutsa, akatuvana mu rupfu maze akatumurikira. Muri Pasika rero Kristu yadukijije icyaha n’urupfu, atwunga n’Imana maze adukingurira amarembo y’ubugingo bw’iteka. Ni muri Pasika amayobera y’ugucungurwa kwacu yose ashingiye.

Pasika iduha ubuzima bushya. Ntawakwizihiza Pasika ngo agume uko yari asanzwe cyangwa ngo asubire mu mibereho ishaje. Petero wisubiriye mu burobyi bwe ndetse n’abandi baramukurikira. Nyamara yibagiwe ko Yesu yari yaramubwiye ati:” Ntukiri umurobyi w’amafi ahubwo uzajya uroba abantu”.
Natwe hari igihe tujya dushaka kwisubirira inyuma. Mu ijoro ry’icuraburindi, mu ngorane igihe twibwira ko Yesu atagihari tugashaka gusubira mu bikorwa bya kamere muntu tukibagirwa ko Yesu yaduhamagariye imirimo mishya mu buzima bushya.

Bibiliya itubwirako Petero na bagenzi be baraye ijoro ryose baroba ntibagira icyo bafata, si uko bari abaswa mu burobyi, kandi ko batari bazi aho amafi aba cyangwa se hatari ku mwero wayo, ko incundura zabo zitari nzima cyangwa se baziroshye nabi. Ahubwo ni uko iyo umuntu atari kumwe na Yesu ntacyo aronka. N’iyo akironse ntikimuhaza n’iyo kimuhagije ntikiramba.

Twige gutumbira no kugendana na Yesu wazutse mu byo dukora, ngo tutavaho tuzindukira ubusa nk’igihu cyangwa tukiruka inyuma y’umuyaga.

Tureke gushidikanya Yesu yatsinze satani atsinda ibyago n’urupfu aduhesha ububasha ngo natwe dutsinde. Ubwo atagipfuye nawe ntugipfuye, yatsinze urugamba nawe uzatsinda.

Pasika Nziza

[email protected]