Ntugace abandi intege, ahubwo ukomeze abananiwe/Ev. Maman Furaha

Bukeye Yonatani mwene Sawuli arahaguruka asanga Dawidi mu ishyamba, amukomeza ku Mana. Aramubwira ati"Witinya kuko ukuboko kwa data Sawuli kutazagushyikira, kandi uzaba umwami wa Isirayeli. Jye ubwanjye nzaba uwa kabiri kuri wowe, kandi data Sawuli na we arabizi". 1Samweli 23:16.

Mbabwira ukuboko kw’Imana yanjye uburyo kwangiriye neza, mbabwira n’amagambo umwami yambwiye. Baravuga bati "Nimuhaguruke twubake."
Nuko biyungamo bagira imbaraga zo gukora uwo murimo mwiza. Nehemiya 2:18

Nk’uko amadahano y’imibavu anezeza umutima, Ni ko umuntu aryoherwa n’inama ivuye mu mutima w’incuti ye. Imigani 27:9

Uko icyuma gityaza ikindi, Ni ko umuntu akaza mugenzi we. Imigani 27:17

Mukomeze amaboko atentebutse, mukomeze amavi asukuma. Mubwire abafite imitima itinya muti "Mukomere ntimutinye, dore Imana yanyu izazana guhora, ari ko kwitura kw’Imana izaza ibakize. Yesaya 35:3 .

Nifuje ko twaganira kuri aya magambo atugira inama yo gukomeza amavi asukuma mu yandi magambo ni ukubwira abantu bari bacitse intege bataye ibyiringiro ko dufite Imana bakongera bakiyungamo imbaraga.

Bukeye Yonatani mwene Sawuli arahaguruka asanga Dawidi mu ishyamba, amukomeza ku Mana. 1Samweli 23:16:

Muri iri jambo twasomye ni igihe Dawidi yari arimo guhigwa n’umwami Sawuli amurenganya, Dawidi yarahunze aba mu bihome byo mu butayu, mu buvumo, mu mashyamba,........ Nta gushidikanya hari aho Dawidi yageraga agakuka umutima akumva arihebye

Aha rero twabonyemo intwari yitwa Yonatani, wemeye akirengagiza ingaruka zose zamubaho agahaguruka akajya mw’ishyamba gushaka Dawidi kugira ngo amuhumurize yongere amubwire ko Imana iri kumwe nawe kandi ko ntagushidikanya azaba umwami. Mbega ijambo ryiza yamubwiye.

Ijambo ryizihiye rivuzwe mu gihe gikwiriye, Ni nk’amatunda y’izahabu ku mbehe y’ifeza. Imigani 25:11.

Iryo jambo ni nkiri Yonatani yabwiye Dawidi
Icyaduha natwe bagenzi bacu bakatubonamo ibihumuriza, ntitwihutire kubabwira ko ibintu byabacikiyeho kabaye ishyano ryabagwiriye.

Amagambo twasomye mu gitabo cya Nehemiya 2 :18, avuga ku gihe Abisirayeli bari mu bunyage baza kumva inkuru ko iwabo i Yerusalemu hasenyutse ndetse habaye amatongo, muri ibi bice 2 hatubwira Nehemiya wafashe iya mbere mu kujya kureba uko byifashe iyo iwabo, arangije ntiyarekera aho ahubwo yegeranya bene wabo arababwira ati nimuze twubake inkike z’i Yerusalemu, ababwira ukuboko kw’Imana nuko biyungamo imbaraga

Haleluyaaaa biyungamo imbaraga kubera ko Nehemiya abibukije imbaraga no gukomera kw’Imana, aha Nehemiya yakomeje amavi yasukumaga.

Muzi ko byemeye kubwo kubana n’Imana baragiye barubaka banarwana ndetse n’ibicantege byari bihari ba Sanibalati na ba Tobiya na Geshemu, ariko Imana ishimwe ko ibyo bitabakanze ahubwo byarangiye bashoje mu mahoro.

Bene data bakundwa nifuje ko natwe mu gihe nk’iki twaba ab’umumaro, muri iyi minsi abantu bararira ibibazo ni byinshiiiiiiiii, abadafite Yesu bo bazi ko ibintu byabacikiyeho kabaye ndetse n’abamufite hari igihe bibagirwa bakumva bibagiwe ibintu byabacikiyeho.

Nzanywe no kubabwira ngo twebweho DUKOMEZE AMAVI ASUKUMA

Kandi Umwami Yesu aravuga ati"Simoni, Simoni, dore Satani yabasabye kugira ngo abagosore nk’amasaka, ariko weho ndakwingingiye ngo kwizera kwawe kudacogora. Nawe numara guhinduka ukomeze bagenzi bawe. Luka 22:31.

Ngicyo icyo Imana idushakaho Dukomere niturangiza gukomera
DUKOMEZE N’ABANDI.

Mubwire abafite imitima itinya muti "Mukomere ntimutinye, dore Imana yanyu izazana guhora, ari ko kwitura kw’Imana, izaza ibakize, ntizaceceka ." Yesaya 35:4 .

Tubwire abafite imitima imenetse be gutinya. Reka dufatire urugero rwiza kuri ba Nehemiya, Yonatani, Yosuwa na Kalebu, twe kuba nka ba batasi 10 bazanye inkuru z’inshamigongo.ahubwo tube ab’umumaro muribagenzi bacu
Twongeye tubwire abantu ko uko Imana yacu yari iri ejo n’uyumunsi ariko ikiri kandi ari ko izahora ntijya ihinduka ahubwo ibasha gutabara abayo

Mbifurije kuba ab’umumaro bakomeza abandi mu bihe bikomeye!