No mugihe bigoye ukwiye gutunga Kristo

“Nyamara ibyari indamu yanjye nabitekereje ko ari igihombo ku bwa Kristo, ndetse n’ibintu byose mbitekereza ko ari igihombo ku bw’ubutunzi butagira akagero, ari bwo kumenya Kristo Yesu. Ku bw’uwo nahombye ibyanjye byose, ndetse mbitekereza ko ari amase kugira ngo ndonke Kristo”(Abafilipi3:7-8)

Rimwe na rimwe hari igihe tugera mu bihe tukumva ubuzima n’ubutumwa bw’ubwami bw’Imana busa nk’aho budukomereye, bikagaragarako twera imbuto nke. Tugacika intege, tukumva twakabireka, tukumva turi twenyine .

Pawulo ntiyigeze yinubira ubuzima yaciyemo. Yagiye mu nzu y’imbohe ariko ntiyahwemye kwiringira Imana ahubwo ikiruta ibyo byose yishimiraga ibigeragezo yacagamo ndetse akabishimira Imana.

Kristo azi icyo ari cyo gutabwa, no kuba wenyine. Pawulo adushishikariza kwishimira mu mwami, ari byo kumva no kwishimira mu mwami Yesu : Uku niko kuramya nyakuri. Imibereho yacu yose ikwiye kurangwa n’ibyishimo n’ibyiringiro n’ amashimwe, tutitaye ku bihe bikomeye twaba turimo.

Intumwa pawulo yaravuze ati: “Nyamara ibyari indamu yanjye nabitekereje ko ari igihombo ku bwa Kristo, ndetse n’ibintu byose mbitekereza ko ari igihombo ku bw’ubutunzi butagira akagero, ari bwo kumenya Kristo Yesu. Ku bw’uwo nahombye ibyanjye byose, ndetse mbitekereza ko ari amase kugira ngo ndonke Kristo”(Abafilipi3:7-8)

Ntakintu na kimwe hano ku isi gikwiye kugereranwa n’ubutunzi buri mu kumenya Kristo nk’umwami wacu. Nta nshuti, inzu nziza, amafaranga cyangwa ubundi butunzi, imishinga duteganya gukora….. bishobora kuruta kumenya Kristo.

Niba twishimira mu Mwami tukamuhozaho amaso, tuzareka kwiyiringira ahubwo twiringire Imana. Tuzazinukwa kwiringira ibinyoma. Nitwihana tugashaka Imana, tukarizwa n’uko yatwongerera imbaraga mu ntege nke zacu, tuzabona ubushobozi bwo guhagarara mu kwizera twemye. Tuzakomeza gushyigikirana no guterana imbaraga umwe ku wundi kubwo gushaka ubutumwa bwiza. Tuzashobora no kwihanganira imibabaro kubwo gushaka Kristo.

Nitwishimira mu mwami, tuzagira ubushobozi bwo kujya mu bice nk’aho Yesu yagiye dushake abazimiye , abatawe, abakomeretse, abatagira aho baba, ababuze ibyiringiro, abakene ku mubiri no mu mwuka.

Nidushyira ubuzima bwacu muri Yesu, tuzashobora kumenya iwacu h’ukuri ko ari mu ijuru kandi ko umunsi umwe tuzabayo kandi tuvuge nka Pawulo ko kubaho ari Kristo no gupfa bikaba inyungu.

Sophie @agakiza.org