Niyonzima Paulin avuga ko kwigisha inyigisho ziyobya abantu nabyo ari iyicarubozo

Niyonzima Paulin ni umubwirizabutumwa wo mu itorero ry’abadiventisite b’umunsi wa Karindwi ku Muhima

Umubwirizabutumwa Niyonzima Paulin wo mu itorero ry’Abadiventisite b’umunsi wa Karindwi yagaragaje ko abigisha b’ibinyoma buzuye hirya no hino muri iyi minsi ari abicanyi kabuhariwe kuko bakomeje kwigisha inyigisho zizarimbuza ubugingo bw’abayoboka inyigisho zabo, ababayobotse na bo ngo bamenye ko barimo kwiyahura.

Ibi Niyonzima Paulin yabitangarije mu kiganiro “Ubutumwa bw’abamarayika batatu” aho yibandaga ku itegeko rya gatandatu mu mategeko y’Imana ribwira abantu riti “Ntukice” nk’uko biri mu gitabo cyo Kuva 20:13.
Muri iki kigisho, Niyonzima Paulin afatanyije na mugenzi we Habagusenga Damascene bagaragaje ko itegeko ribuzanya kwica ritareba gusa kwica umuntu mu buryo bw’umubiri ahubwo ngo no kwigisha inyigisho ziyobya na byo ni ubwicanyi burusha ubwo kwica umubiri kuko izo nyigishao zica abantu urubozo zihereye mu mitima kandi ngo ubugingo bw’umuntu buba mu mutima.
Ku rundi ruhande, ngo abatatira ukuri kw’ijambo ry’Imana bakayoboka inyigisho ziyobya kandi bazi ukuri na bo ngo baba biyahuye.
Paulin ati: “Abigisha b’ibinyoma buzuyeho muri iyi minsi y’imperuka baba barimo kwica abantu, ibyo bakora ni ukurimbura ubugingo bw’abantu, birenze no kwica umubiri gusa. Iyo umuntu arimo kuzana amahame anyuranyije n’ijambo ry’Imana uwo muntu aba ari umwicanyi….No mu gihe abantu bava mu kuri kw’ijambo ry’Imana bagahindukirira ibinyoma na bo baba biyahuye.”

Damascene mu gusobanura iyi ngingo yitanzeho urugero agira ati: “Natwe nko mu gihe twakwigisha hano turimo kubabeshya natwe twaba turi abicanyi.”
Urugero rugaragaza uburyo inyigisho ziyobya zica abantu ngo ni uburyo Satani yayobeje Adamu na Eva akababwira ko nibarya ku giti Imana yababujije batazapfa kandi Imana yarabibwiriye ko nibakiryaho bazapfa.
Icyo gihe ngo Satani yari abaye umwicanyi kandi Adamu na Eva na bo bariyahuye kuko bayobotse inyigisho ya Satani kandi bazi ukuri kw’Imana.
Kuba Adamu na Eva baravuye ku mahame y’Imana bikabazanira urupfu ni na ko uva mu mahame y’Imana muri iyi minsi bizamuzanira urupfu rw’iteka kandi uwo muntu ngo azaba yiyahuye.


Habagusenga Damascene na we asengera mu badiventisite b’umunsi wa Karindwi ku itorero rya Muhima

Ibi binajyana no kwiyahura mu buryo bugaragara, kunywa ibisindisha bikageza aho umubiri ugubwa nabi, gukoresha umubiri agahato kugeza aho ubuzima bw’umuntu buhazaharira, kurya ibyangiza umubiri. Abakora ibyo byose na bo ngo baba bishe itegeko rya gatandatu kuko baba bishe ubuzima bwabo (baba biyahuye).
Aba babwirizabutumwa bibukije abantu ko Yesu yasobanuye muri Matayo 5:21-22, ko no kurakarira umuntu cyangwa kumutuka bihwanye no kumwica.
Ikigaragaza ko kurakarira umuntu bifitanye isano no kumwica, ngo nuko akenshi usanga kwica umuntu bibanzirizwa no kumurakarira. Nukuvuga ko mbere yo kwica umuntu ku buryo bw’umubiri, umwicanyi aba yarabanje kumwica igihe yatangiraga kumurakarira.


Habagusenga Damascene na Niyonzima Paulin baranenga abigisha bicisha abantu ibinyoma bakanaburira abakirisito bakomeje kwiyahuza inyigisho ziyobya