Niki wakora igihe urimo ideni ?

Kugira ideni ni nk’umwobo abenshi batifuza kugwamo , cyangwa abaririmo bakifuza kuryishyura iyo baramutse babonye uburyo, ariko Bibiliya itubwirako tugomba gukora ibishoboka byose kugirango tuvemo ideni kuko iyo ritishyuwe duhora mu bucakara bwaryo.

Nshuti , ese uziko ideni ari nk’ubucakara? Birashoboka ko bidasa cyangwa utumva ari bwo, ariko igihe cyose urimo ideni, uba wumva udafite umudendezo.
“Umukire ategeka umukene, Kandi uguza aba ari nk’umugaragu w’umugurije.”(Imigani22:7)

Ese waba urimo ideni kandi ukaba ubona bigukomereye kurivamo? Ese wumva utazashobora kubona uburyo waryishyura? Niba ariko bimeze icyo nakubwira ni uko hari ibyiringiro.
Bibiliya itubwirako tugomba kwikiza ideni .“Ikize nk’isirabo iva mu maboko y’umuhigi, Nk’inyoni iva mu kuboko k’umutezi.” (Imigani6:5)

Kugeza ubu turumvako iyo turimo ideni tuba turi imbata/ abacakara. Tuba tumeze nk’abikoreye igitare kiremereye cyane .

Ariko nanone ni ukuri dukwiye kugira icyizere mu izina rya Yesu Kristo. Umwami Yesu yavuze ko yaje kubohora imbohe kugira ngo zibe mu mudendezo.

“Umwuka w’Uwiteka ari muri jye, Ni cyo cyatumye ansīgira, Kugira ngo mbwirize abakene ubutumwa bwiza. Yantumye kumenyesha imbohe ko zibohorwa, N’impumyi ko zihumuka, No kubohora ibisenzegeri, No kumenyesha abantu iby’umwaka Umwami agiriyemo imbabazi.”(Luka4:18-19)

Ubwo Kristo yabohoye imbohe zose, dukwiye natwe kwiringirako tuzabohorwa ku madeni tubereyemo abandi.

Ese ibi bivuzeko tutagomba kwishyura amadeni turimo?

Birumvikana, tugomba gukomeza kwishyura imyenda turimo. Byaba ari ikibazo gutekerezako tudakwiye kwishyura amadeni turimo kuko Kristo yatubohoye, ahubwo yatwigishije gutanga ibitari ibyacu.

“Baramusubiza bati “Ni ibya Kayisari.” Maze arababwira ati “Nuko rero ibya Kayisari mubihe Kayisari, iby’Imana mubihe Imana.”(Matayo22 :21)

Nshuti, kuko Kristo yabohoye abari imbohe, dushobora natwe kugira icyizere cyo kudakomeza kubohwa n’ideni. Dukwiye gukomeza gushaka uko twayivanaho tuyishyura. Igihe tutazishyura amadeni yacu,( cyangwa ngo twibohore kubatugurije) tuzahora turi abacakara baryo. Menya ko muri Kristo dushobora kuboneramo ubuhungiro kandi Imana ikaduha ibyo dukeneye byose harimo no kutwishyurira amadeni yacu yose.

Ideni rikomeza kuba umutwaro igihe cyose ritishyuwe, ni ngombwa kwegera Yesu kuko ashoboye byose harimo no kukwishyurira bityo ukaba uw’umudendezo muri we .
Sophie @Agakiza.org