Niki twakwigira ku gitangaza cya mbere Yesu yakoze?

“Ku munsi wa gatatu hacyujijwe ubukwe i Kana y’i Galilaya, kandi na nyina wa Yesu yari ahari. Yesu bamutorana n’abigishwa be ngo batahe ubwo bukwe.”(Yohana2:1-2)

Yohana2:1-2 hatwereka igitangaza cya mbere Umwami Yesu yakoze igihe yari mu butumwa bwe ku isi. Kimwe n’ibindi bitangaza byinshi bigaragara muri bibiliya yakoze, biratwigisha ibintu byinshi n’uburyo ari ingenzi dukwiye gutumira Yesu mu mibereho yacu ya buri munsi.

Aha hari ibintu twakwigira ku gitangaza cya mbere Yesu yakoze, ‘guhindura amazi divayi mu bukwe bwabereye i Kana y’i Galilaya’. Reka tubiganireho turebe n’uburyo twabyifashisha mu mibereho yacu ya buri munsi:

Yesu yari yatumiwe

“Yesu bamutorana n’abigishwa be ngo batahe ubwo bukwe.”(Yohana2:2)

Ikintu cy’ingenzi hano ni uko Yesu yari yatumiwe. Igitangaza cyambere yakoze, yagikoze kuko yari yatumiwe kuza mu mibereho y’abantu .

Nshuti , niba dukeneye igitangaza cyivuye ku Mana, dukeneye kuyihamagara. Dukeneye kuyitumira. Ntidushobora kwiringira ko idukorera igitangaza dushaka niba tutabashije kuyiha icyumba mu buzima bwacu.

Yabwiwe ikibazo cyari gihari

Nyuma yo gutumira Yesu Kristo mu mibereho yacu ya buri munsi, dukwiye kumubwira ibyo dukeneye byose.

“Nuko vino ishize, nyina wa Yesu aramubwira ati “Nta vino bafite.”(Yohana2:3)
Igitangaza cyakozwe mu gihe ntakintu cyari gisigaye. Ni inshuro zingana iki abakristo bitotomba bavugako Imana itatanze ibyo dukeneye cyangwa twifuza? Ese mbere na mbere tuba twigize tuyibwira ibyo dukeneye ? Cyangwa twiringirako iduha ibyo dukeneye tutayibisabye? Muri Yakobo haragira hati: “ …… ntacyo muhabwa kuko mudasaba”(Yakobo4:2)

Umwami Yesu yadusezeranije ko icyo tuzasaba mu izina rye tuzagihabwa:
“Ni ukuri, ni ukuri, ndababwira yuko unyizera, imirimo nkora na we azayikora ndetse azakora n’iyiruta, kuko njya kwa Data. Kandi icyo muzasaba cyose mu izina ryanjye, nzagikorera kugira ngo Data yubahirizwe mu Mwana we. Nimugira icyo musaba cyose mu izina ryanjye nzagikora.”(Yohana14:12-14)

Yesu yakoze ibiruta cyane ibyo bari bakoze

Ku musozo w’iyi nkuru, Yohana akomeza atubwira uburyo amazi Yesu yahinduye vino yaruse iyo umukwe yari yateguye. Nyuma yo gusogongera kuri iyo vino ya Yesu umusangwa mukuru yabwiye umukwe ati:

“…….Abandi bose babanza vino nziza, abantu bamara guhaga bakabona kuzana izitaryoshye, ariko wowe ho washyinguye inziza aba ari zo uherutsa.”(Yohana2:10)
Umusangwa mukuru yaratangaye cyane. Umukwe na we ntiyamenye ibyabaye. Ariko twese tuziko Yesu yahinduye amazi divayi.

Nshuti, Yesu ashoboye gukora byinshi biruta cyane ibyo twakora. Niba dushaka guharanira kubaho ubuzima bwejejwe, dukwiye kumutumiramu mibereho yacu kugirango adufashe kubaho nk’uko Imana ibishaka.

Sophie @agakiza.org