Niki twakura kuri Filipo n’ Umunyetiyopiya w’inkone wakirijwe mu butayu?

“Bukeye marayika w’Umwami Imana abwira Filipo ati “Haguruka ugane ikusi, ugere mu nzira imanuka iva i Yerusalemu ikajya i Gaza, ya yindi ica mu butayu.” Arahaguruka aragenda. Nuko haza Umunyetiyopiya w’inkone, umutware n’umunyabyuma w’ibintu byose bya Kandake, umugabekazi w’Abanyetiyopiya.
Yari yaragiye i Yerusalemu gusenga. Yasubiragayo yicaye mu igare rye, asoma igitabo cy’umuhanuzi Yesaya. Umwuka abwira Filipo ati “Sanga ririya gare ujyane na ryo.”(Ibyakoz 8:26-29)

Inkuru ya Filipo n’ Umunyetiyopiya w’inkone tuyisoma mu Ibyakozwe n’Intumwa 8. Iraduha amasomo arebana n’imibereho y’umukristo cyane cyane ku kubaha Imana no gukora ibyo ishaka. Uru ni urugero rugaragara muri bibiliya aho Imana ubwayo itanga amabwiriza ku bantu bayo, ikabatuma aho ishaka.

Aha hari iby’ingenzi dukwiye kwigira kuri Filipo n’uyu muny’Etiyopiya w’inkone:

Icyo dukwiye kuzirikana hano nuko Filipo atatekerezaga ko yajya mu butayu kubwiriza. Atibaza ari bande bari mu butayu yajya kwigisha? Ni byo hashobora kuba nta muntu uhari, ariko Imana yo yari ibizi neza itegeka Filipo kujyayo kuko Umunyetiyopiya w’inkone yari ahaciye.

Filipo ntagushidikanya cyangwa ngo agishe Imana impaka, yakoze ibyo abwiwe maze ajya kureba icyo Imana yari imusabye ari cyo umugambi Wayo wo gukiza abantu baturuka mu bindi bice by’isi.

Nitwihutira kubaha Umwuka w’ Imana igihe aduhaye amabwiriza,(nk’uko biri mu byanditswe), ikiba kigambiriwe ni ugukiza abandi bantu binyuze mukubabwiriza ubutumwa bwiza.
“Filipo arirukanka yumva asoma igitabo cy’umuhanuzi Yesaya, aramubaza ati “Ibyo usoma ibyo urabyumva?” Undi ati “Nabibasha nte ntabonye ubinsobanurira?” Yinginga Filipo ngo yurire bicarane.”(Ibyakoz 8:30-31)

Abenshi muri twe bashobora gutekerezako iyo umuntu asoma bibiliya, ahita ayisobanukirwa , akaba arakijijwe, ko gusoma bibiliya biba bihagije, ariko sibyo. Iriya nkone, yari umutware n’ umunyabyuma w’ibintu byose by’umugabekazi w’Abanyetiyopiya, birashoboka ko yari azi ibintu byinshi. Ashobora kuba yari umuntu ujijutse kuko niwe wari ushinzwe ibintu byose(umutungo w’umugabekazi), ariko ubwenge bwe ntibwari buhagije kuburyo asobanukirwa ibyanditswe.

Ariko ijambo rye ngo ‘Nabibasha nte ntabonye ubinsobanurira’? Bikwiye gutuma dutekereza. Ese tujya tubwira abantu ukuri kwerekeye Kristo? Uyu munsi hari benshi bazi imirongo yo muri bibiliya ariko batazi icyo ishatse kuvuga. Bumva ko kuba umuntu afite bibiliya, azi imirongo mike, yumva ijambo ry’Imana bihagije ariko ntibisobanuyeko bazi ukuri kurimo.

“Ibyo yasomaga mu byanditswe byari ibi ngo:

“Yajyanywe nk’intama bajyana mu ibagiro, Kandi nk’uko umwana w’intama ucecekera imbere y’uwukemura ubwoya, Ni ko atabumbuye akanwa ke. Ubwo yacishwaga bugufi, Urubanza rwari rumukwiriye barumukuyeho. Umuryango we uzamenyekana ute? Ko ubugingo bwe bukuwe mu isi?”
Iyo nkone ibaza Filipo iti “Ndakwinginga mbwira, ayo magambo umuhanuzi yayavuze kuri nde? Yayivuzeho cyangwa yayavuze ku wundi?” Filipo aterura amagambo, ahera kuri ibyo byanditswe amubwira ubutumwa bwiza bwa Yesu.”(I byakoz 8:32-35)

Dukeneye gushaka ukuri ko mu byanditswe , maze tugafasha n’abandi kukumenya. Igihe twigisha ubutumwa bwiza abantu , tugomba kwibuka ko Kristo ariwe butumwa dukwiye kubwiriza.

Insengero nyinshi z’uyu munsi bakoresha uburyo bwose bushoboka mu kuzana abantu mu nsengero. Birababaje ko ‘aba bahindutse’ baba batazi ububi bw’icyaha, ukuri ku kugaruka kwa Kristo, uko yababaye, urupfu n’izuka bye n’akamaro ko kwihana,Bakumva ko ubukristo ari ukumenya ko Imana isanzwe ikunda abanyabyaha , idahana icyaha, isubiza amasengesho yose, ariko sibyo.

Tugomba kubwira abantu ubutumwa bw’ingenzi twahawe bwa Yesu Kristo, ubuzima bwe butigeze icyaha, urupfu rubabaje, n’izuka rye kuko ari byo bizatuma bakizwa kakaza aho ari.

Sophie @Agakiza.org