Niki bibiliya iba ivuga ku kuba umutunzi no guhirwa mubyo ukora byose?

Abantu benshi batekerezako hari uburyo bwinshi bwagufasha kugera ku nsinzi, Abandi bagerageza gutsinda ariko bagatsindwa . Bibiliya idusezeranya ibyiza, ikatwereka uburyo wahirwa kuri buri kintu cyose ukora, iyo wubashye ijambo ry’Imana.

“Icyakora ukomere ushikame cyane, kugira ngo witondere amategeko yose umugaragu wanjye Mose yagutegetse. Ntuzayateshuke uciye iburyo cyangwa ibumoso, kugira ngo ubashishwe byose aho uzajya hose. Ibiri muri iki gitabo cy’amategeko ntukarorere kubihamisha akanwa kawe, ahubwo ujye ubitekereza ku manywa na nijoro kugira ngo ubone uko ukurikiza ibyanditswemo byose. Ni ho uzahirwa mu nzira zawe, ukabashishwa byose.”(Yosuwa1:7-8)

Imana Umuremyi wa byose harimo izuba n’ibiri munsi yaryo byose, yabwiye Yosuwa igihe yasimburaga Mose, akaba umuyobozi w’ Abayisirayeli. Yari afite umurimo ukomeye utamworoheye wo kuyobora Abayisirayeli akabageza mu gihugu basezeranijwe. Imana yamuhaye amabwiriza atandukanye. Imubwirako ibyo azakora byose agomba kubaha ijambo ry’Imana.

Muby’ukuri, hari ibintu tugeraho cyangwa tubona igihe twitondeye kandi tukubaha ijambo ry’Imana.

Kubaha ijambo ry’Imana bizana gutsinda aho ujya hose: Kwitondera no kubaha ijambo ry’Imana bizana insinzi ahantu hose ujya. Imana yahaye Yosuwa gutsinda , agatsinda ahantu hose yagezaga ibirenge muri icyo gihugu bari barasezeranijwe.

Kubaha ijambo ry’Imana bizana ubutunzi: Abantu bakunze kugereranya ubutunzi n’amafaranga, ariko mu bisanzwe birenze ibyo. Ubutunzi bisobanuye nanone kurama /kubaho igihe kirekire. Yosuwa yararamye kugera ku myaka 110 .
“Nuko hanyuma y’ibyo, Yosuwa mwene Nuni umugaragu w’Uwiteka aherako arapfa, yari amaze imyaka ijana n’icumi.”(Yosuwa24:29).

Yosuwa ntiyigeze acika intege. Muby’ukuri, yakomeje gukorera Imana imyaka ye yose kugera muzabukuru. “ …….Ubu dore ndashaje ngeze mu za bukuru.” (Yosuwa23:2)

Kubaha ijambo ry’Imana bizana imbaraga : Yosuwa ni umuntu wageze ku nsinzi nk’umuntu. Umuntu we w’imbere yakuranye imbaraga n’ubwo ataburaga guhura n’ingorane zitandukanye. Mugihe cy’ubuyobozi bwe ntiyigize yimura Imana cyangwa ngo asuzugure Imana ya Isirayeli.

Yashoboye kuyobora umuryango mu gukorera Imana. “Abantu baramusubiza bati “Kwimūra Uwiteka ngo dukorere izindi mana biragatsindwa”(Yosuwa24:16)

Muri byose, ibyo Yosuwa yakoraga byose yarahirwaga, kuko yakoraga ibyo Imana imushakaho, kuko yomatanye n’Imana kuva mu itangiriro kugera ku iherezo ry’ubuzima bwe. “Ahubwo muzajye mwomatana n’Uwiteka Imana yanyu nk’uko mwakoze kugeza ubu.”(Yosuwa23:8)

Kubaha ibyo Imana igutegeka nibyo byonyine bihesha ubutunzi kandi bikazana guhirwa muri byose. Dukwiye komatana n’Imana kuko ariho honyine hari ubutunzi butagira akagero kandi butabora.

Sophie @agakiza.org