Ni ubuhe buzima Imana ishaka ko tubaho?

Bibiliya itubwirako muri Kristo hari ubuzima bwuzuye, bwiza budutegereje.Ni ubuzima Imana yateguye neza, niba dushaka kubaho ubuzima Imana ishaka, tugomba gukurikiza amabwiriza ye y’uko dukwiye kubaho.

Ese urifuza kubaho ubuzima Imana yaguteguriye?Niba ubishaka, Aha hari ibintu 3 by’ingenzi byagufasha kubaho ubuzima Imana ishaka:

Guha ibyacu byose Umwami Yesu Kristo

Umwami Yesu yavuzeko yaziye kugira ngo abantu babone ubugingo kandi bwinshi. “Umujura ntazanwa n’ikindi keretse kwiba no kwica no kurimbura, ariko jyeweho nazanywe no kugira ngo zibone ubugingo, ndetse ngo zibone bwinshi.”(Yohana10:10)
Iyi niyo nzira yonyine yo kubona ubwo buzima binyuze mu kwihana ibyaha, tukabiha Yesu, akaba byose mu buzima bwacu. Abefeso 1:3 hatubwirako muri Kristo, twaherewemo imigisha yose n’ubugingo nk’uko yabidusezeranije.
“Imana y’Umwami wacu Yesu Kristo, ari yo na Se ishimwe, kuko yaduhereye muri Kristo imigisha yose y’umwuka yo mu ijuru.”( Abefeso 1:3).Icyo dukwiye gukora kugirango twakire iyi migisha,ni uguha byose Yesu Kristo.

Kubaha Umwami Yesu

Imana ishaka ko tubaho ubuzima bwo kubaha Yesu Kristo.Niba dushaka kubona ubugingo yadusezeranije, tugomba kubaha amategeko ye. Ubuzima Imana yasezeranije, si buriya bwo kugira amafaranaga menshi.Ukuri ni uko amafaranga ari ikintu dukwiye gushyira ku ruhande niba dushaka kugera kuri Kristo. Ubwe yagize ati:
“Nta wucyeza Abami babiri kuko yakwanga umwe agakunda undi, cyangwa yaguma kuri umwe agasuzugura undi. Ntimubasha gukorera Imana n’ubutunzi.”(Matayo 6:24)
Dukwiye kandi kwiga kwiyanga niba turi mu rugendo rwo gukurikira Yesu Kristo. “Maze Yesu abwira abigishwa be ati “Umuntu nashaka kunkurikira yiyange, yikorere umusaraba we ankurikire, kuko ushaka kurengera ubugingo bwe azabubura, ariko utita ku bugingo bwe ku bwanjye, azabubona.”(Matayo16:24-25)

Gukurikira Yesu Kristo bisaba ko twubaha ijambo rye, bikemeza ko twamuhaye byose kandi ko tumukunda. “Nimunkunda muzitondera amategeko yanjye.”(Yohana 14:15) Nitumwubaha, tuzaba twizeye kuba mu bushake bw’Imana no guhirwa muri byose .
“Ibiri muri iki gitabo cy’amategeko ntukarorere kubihamisha akanwa kawe, ahubwo ujye ubitekereza ku manywa na nijoro kugira ngo ubone uko ukurikiza ibyanditswemo byose. Ni ho uzahirwa mu nzira zawe, ukabashishwa byose.”(Yosuwa 1:8)

Kugirana ubusabane n’Umwuka Wera

Ubuzima Imana ishaka ko tubamo ni ubuzima bwo kuba mu bushobozi bw’Umwuka wera butari ubw’umubiri. Kubw’ibyo, dukwiye kugirana ubusabane n’Umwuka wera w’Imana. Umwuka wera uba mu bantu bose bizera Kristo, bahaye byose Imana:
“Ni we namwe mwiringiye mumaze kumva ijambo ry’ukuri, ari ryo butumwa bwiza bw’agakiza kanyu, kandi mumaze kwizera ni we wabashyizeho ikimenyetso, ari cyo Mwuka Wera mwasezeranijwe, uwo twahawe ho ingwate yo kuzaragwa wa murage kugeza ubwo abo Imana yaronse izabacungura. Ubwiza bwayo bushimwe.”(Abefeso1:13-14)

Hari umudendezo ku bantu bose babana n’Umwuka wera w’Imana, nk’uko yawutanze binyuze muri Kristo Yesu nyuma y’urupfu rwe no kuzuka.
“Kuko itegeko ry’Umwuka w’ubugingo bwo muri Kristo Yesu ryambātuye ububata bw’itegeko ry’ibyaha n’urupfu, kuko ibyo amategeko yananiwe gukora ku bw’intege nke za kamere yacu, Imana yabishohoje ubwo yatumaga Umwana wayo afite ishusho ya kamere y’ibyaha kuba igitambo cy’ibyaha, icira ibyaha bya kamere ho iteka, kugira ngo gukiranuka kw’amategeko gusohozwe muri twe, abadakurikiza ibya kamere y’umubiri, ahubwo bakurikiza iby’Umwuka. Abakurikiza ibya kamere y’umubiri bita ku by’umubiri, naho abakurikiza iby’Umwuka bakita ku by’Umwuka. Umutima wa kamere utera urupfu, ariko umutima w’Umwuka uzana ubugingo n’amahoro.(Abaroma8:2-6)

Ubuzima Imana ishaka ko tubamo ni ubuzima bwibanda ku bwiza n’urukundo rwe,ubuzima butuma dusa nka Kristo. Bityo, nk’ abana b’Imana, dukwiye kubaho ubuzima bushimisha Imana. Tukabaho mu kwizera niba dukurikiye Yesu Kristo.

Sophie @ agakiza.org