Ni ubuhe butumwa itorero rya Perugamo bwagenewe, mu nzandiko zandikiwe amatorero 7 yo muri Aziya

“Wandikire marayika w’Itorero ry’i Perugamo uti “Ufite inkota ityaye ifite ubugi impande zombi aravuga aya magambo ati 13‘Nzi aho uba ko ari ho intebe y’ubwami bwa Satani iri, nyamara ugakomeza izina ryanjye ntiwihakane kunyizera, ndetse no mu minsi ya Antipa umugabo wakiranukiraga kumpamya, wiciwe iwanyu aho Satani aba. 14 Ariko rero mfite bike nkugaya, kuko iwanyu ufite abakomeza inyigisho za Balāmu, wigishije Balaki gushyira igisitaza imbere y’Abisirayeli kugira ngo barye intonōrano kandi basambane. 15Nawe ni ko umeze, ufite abakomeza inyigisho z’Abanikolayiti nka bo. 16Nuko wihane kuko nutihana nzaza aho uri vuba, ndwanye abo mbatikure inkota yo mu kanwa kanjye.’ 17 “Ufite ugutwi niyumve ibyo Umwuka abwira amatorero. “Unesha nzamuha kuri manu yahishwe, muhe n’ibuye ryera ryanditsweho izina rishya ritazwi n’umuntu wese keretse urihabwa. (Ibyahishuwe 2:12)

Perugamo wari umurwa w’abami n’ibigirwamana. Muri uyu mujyi harimo igicaniro k’ikigirwamana cyitwaga zewusi iyi mana yari umucunguzi w’uyu mujyi. Ikigirwamana cya kabiri cyari I Perugamo cyitwaga atena iyi mana yafatanyanga na zewusi gutanga intsinzi. imana ya gatatu yari ikimasa yitwaga diyonizosi akaba yari imana y’umuryango wa cyami, nyuma yizi mana hazaga imana ya kane akaba cyarubahagwa cyane kurusha izindi zose, akaba yaritwaga esikarape bakaba barayisengaga nk’imana ikiza indwara. Ikaba yari mu ishusho y’inzoka izengurutse igiti, iki kimenyetse k’inzoka kikaba gikoreshwa mu buvuzi.Iyi nzoka bishobokeko ariyo tujya tubona ku byapa biranga by’amafarumasi.

Tugarutse ku byanditse byera ku muronko twatangije iyi nkuru, wa 12 haragira hati “Wandikire marayika w’Itorero ry’i Perugamo uti “Ufite inkota ityaye ifite ubugi impande zombi aravuga aya magambo” ‘Nzi aho uba ko ari ho intebe y’ubwami bwa Satani iri, nyamara ugakomeza izina ryanjye ntiwihakane kunyizera, ndetse no mu minsi ya Antipa umugabo wakiranukiraga kumpamya, wiciwe iwanyu aho Satani aba. Intebe y’ubwami bwa satani ishushanya ubuyobozi bwariho icyo gihe aribwo intebe y’ubwami bw’abaroma, ubu butegetsi bwaribwarimakaje umuco wo gusenga ibigirwamana muri uyu mujyi. Perugamo yarinahurije hamwe ubutegetsi bwa leta nubw’idini kandi muri uyu mujyi akarengane kari kemewe n’amategeko cyane cyane abantu bavugaga izina rya Yesu. Iri zina rya Yesu mu nkiko za baroma basabaga abantu kuryihakana, maze uwitwa ANTIPA ahabonera kwitanga gukomeye,Izina ANTIPA risobanura uri mu mwanya wa se cyangwa uhagarariye se, warigereranya na Yesu wari mu mwanya wa se.

Umukirisito uhowe Yesu cyangwa ubabajwe kubw’izina rye, aba ababaranye nawe kandi aba ari muri we. Umurongo wa cumi na kane uragira uti “Ariko rero mfite bike nkugaya, kuko iwanyu ufite abakomeza inyigisho za Balāmu, wigishije Balaki gushyira igisitaza imbere y’Abisirayeli kugira ngo barye intonōrano kandi basambane” Kenshi na kenshi Guverinoma zo ku isi zijya zifata umwanya zikishimira ibyo zagezeho ariko Yesu we ntajya areba ibintu byose abishime uko bingana akunda gufata ikintu ukwacyo. Umunsi umwe yigeze kubwira umusore w’umugire warumaze kumugaragarizako yitondeye amategeko, Yesu amubwirako asigaje ikintu kimwe gusa.

Itorero ry’I Perugamo ryagaragazaga iterambere mu by’inzira y’ubukirisito ariko hari utuntu tumwe na tumwe tutari tumeze neza, hari itsinda rimwe ryakomezaga izina rya Yesu hakaba nirindi tsinda ryakomezaga inyigisho za Balamu. Ese Balamu yari muntu ki ? Iyo dusomye igitabon cyo Kubara 25, dusomamo igitekerezo cy’umnuhanuzi Balamu wahawe ruswa n’umwami w’abamowabu Balaki kugirago ajye kuvuma ubwoko bw’Isirayeli, ubwoko bw’Imana. Uyu Balamu yatumwe abisirayeli bishora mu busambanyi nab’Abamowabukazi abandi batangira gusenga ibigirwamana byabo bakarya n’inyama zaterekereshejwe ibyo bigirwamana arizo zitwa intonorano. Ni muri ubwo buryo izina Balamu ryahawe abantu bataga umuronko bakigisha abantu inyigisho zipfuye n’ingeso z’abapagani.

Umurongo wa cumi na gatanu ukomeza ugaya Perugamo ati ” Nawe ni ko umeze, ufite abakomeza inyigisho z’Abanikolayiti nka bo.” Abanikorayiti kari agatsiko ka mbere kashinzwe n’uwitwa Nikola, aba rero kimwe n’abameze nka balamu bigishaga abantu b’Imana kwifatikanya nab’isi cyangwa n’abapagani muri byose. Ibi byaje gutuma abakiristu bamwe bava mu byizerwa ndetse batangira kwihakana izina rya yesu. Ibi byatumye bahabwa umuburo babwirwango “Nuko wihane kuko nutihana nzaza aho uri vuba, ndwanye abo mbatikure inkota yo mu kanwa kanjye.” Hano itorero rikiranuka ririkubwirwango ryihane mu gihe abanikorayiti barikubwirwa gutikurwa inkota. Kuba abanikorayiti barabashije gushinga imizi muri ririya torero ni uko, abanyetorero batigeze bahaguruka ngo barwanye abanikorayiti, ibi bitandukanye n’ibyo muri Efeso kuko barwanyije inyigisho mbi bakazishobora. Perugamo yo yari yararetse ibi n’ibyiza bibana mu itorero nyamara itorero ryiza ntirikwiye gutinya kurwanya ikibi aho kiva kikagera, ntirikwiye gutinya kwita icyaha izina ryacyo iyo ritabikoze,ijambo ry’Imana riravuga mu gitabo cya Ezekiyeli 3:18 “Nimbwira umunyabyaha nti ‘Gupfa ko uzapfa’ nawe ntumuburire, cyangwa ngo uvugane n’umunyabyaha umwihanangiriza kuva mu nzira ye mbi ngo ukize ubugingo bwe, uwo munyabyaha azapfira mu byaha bye, ariko ni wowe nzabaza amaraso ye. “

Ibi ni ukubera kutihanangiriza abanyabyaha ngo bave mu nzira zabo mbi, itorero rya Perugamo ryagaragaye nk’iryifatanyije nab’isi,niyo mpamvu ryasabwaga kwihana vuba kuko inkota ya kristo yari kubafata kimwe.
Uru rwandiko rusoza rugira ruti “Ufite ugutwi niyumve ibyo Umwuka abwira amatorero. “Unesha nzamuha kuri manu yahishwe, muhe n’ibuye ryera ryanditsweho izina rishya ritazwi n’umuntu wese keretse urihabwa.” Aha hari impano ebyiri zidasobanutse zizahabwa uzanesha iya mbere ni manu yahishwe indi ni izina rishya .

Intumwa Yohana wanditse iki gitabo yarasobanukiwe niby’iyi manu kuko mu ivanjiri yanditse 6:30-35,tuhabona inkuru y’ukuntu abantu bigeze kubaza Yesu ati” urakora kimenyetso ki ? tukirebe tukwizere! Basogokuruza bacu bariraga mu butayu nkuko byanditswe ngo yabaye kurya umutsima uvuye mu ijuru. Icyo gihe Yesu yababwiyeko umutsima uvuye mu ijuru ari uha abari mu isi ubugingo ndetse icyo gihe yababwiyeko ariwe mutsima w’ubugingo. Gukurikira Yesu ni ukugira uruhari ku mubiri we n’amaraso ye , ni ukunyura mu mibabaro ye, ibyo nibyo Antipa n’abandi b’I Perugamo bakomeje izina rya Yesu bakoze. Abo rero nibo bashobora guhabwa izina rishya rizwi nabo gusa kuko ariryo rigaragaza ubumwe bafitanye na Yesu.

Mu burasirazuba bwo hagati guhabwa izina rishya byabaga bishaka kwerekana ikiranga uwo muntu cyangwa ibihe by’ingenzi byaranze ubuzima bwe. Twafata urugero ku izina rya Mose risobanura uwakuwe mu mazi, tukabona irya Aburahamu witwaga Aburamu, Izina rye rikaba risobanura sekuru wa mahanga menshi kubw’isezerano, twabona n’irindi zina rya Isirayeli wari Yakobo wakiranye n’Imana. Ku mukirisito rero nta rindi zina rikwiye ku muranga uretse izina ry’uwo bunze ubumwe kandi bafite icyerekezo kimwe ariwe Yesu. Iri zina niryo zina rimwe rukumbi tubona mu gitabo cy’ibyahishuwe, iri zina rifite ubusobanuro bw’imbitse buzwi na Yesu gusa niko ibyahishuwe 19:12 hatubwira , irizina niryo rizandikwa kubanesheje.
Ibuye ryera tubona mu rwandiko rihwanye n’ibuye ryakundaga gukoreshwa mu gihe cya kera iyo babaga barimo baca imanza, iri buye ryerekanagako umuntu yabaye umwere cyangwa se yatsindishirijwe. Ibuye ryera ririho izina rishya bishatse kuvugako, Imana itsindishiriza abo isi irenganya ikoreshe izina ryabaye intandaro yakarengane kose ari ryo zina rya Yesu.

Mu gihe itorero rya Efeso ryaranzwe no kurwanya abigisha b’ibinyoma , Irya Perugamo ryo ryaranzwe no kwemera ubufatanye .

IsmaelAgakiza.org