Ni iki wakora mugihe umwana wawe yatinze kuvuga

Mbese ufite umwana waba utaramenya kuvuga kandi ubona yakagombye kubaabizi? Mbese ufite ubwoba ko bishobora kuzahwaniramo ntazanabimenye? Humura. Reka tubyite ko ari ugutinda kuvuga turebe n’icyo ushobora kubikoraho.

Iby’ingenzi ukwiye kubanza kumenya kuri iki kibazo:

• Mbese gutinda kuvuga ni iki?
• Ni ryari wavugako umwana yatinze kuvuga?
• Ni ibiki bihuriweho kugirango ube wavugako umwana yatinze kuvuga?
• Ni iki gitera abana bamwe kuvuga nyuma ugereranyije n’abandi?
• Mbese umwana wanjye yatinze kuvuga kuko ahura n’indimi nyinshi zitandukanye
akabura urwo afata n’urwo areka?
• Ni ryari ngomba kureba muganga ubisobanukiwe?
• Ni iki nafasha umwana watinze kuvuga?

Gutinda kuvuga

Uhora wibaza niba umwana wawe yaratinze kuvuga ubikeneyeho amakuru ahagije ngo usobanukirwe byinshi kuribyo. Uyumunsi turagerageza gusubiza ibibazo hafi ya byose ujya wibaza kuri ino ngingo. Mbere ya byose ugomba kumenya ibyo yumva mubyo uvuga cyangwa mubyo umusobanurira.

Urugero rw’ibyo yumva, ni igihe ushobora kumubwira uti genda wambare ikote, ingofero na furari (Ntumusobanurire ko hari aho mugiye kujya) hanyuma ukareba ko abizana.

Gusobanukirwa n’ibyo abasha kuvuga, utitaye ku buryo abisobanura cyangwa abivuga neza ariko ukita kumagambo ndetse n’uburyo agerageza kuyashyira mu nteruro

Leslie Rescorla umushakashatsi kuri iyi ngingo yerekanye ko hariho impamvu zitandukanye zishobora gutuma umwana atinda kuvuga.

Urugero, bitewe n’uko wenda ntan’icyo abasha kumva n’ibindi bimenyetso bitandukanye harimo n’indwara twita otisime (autism) n’izindi ariko uyu munsi sizo tuvuga turareba kuri wawundi watinze kuvuga ariko bitarimo ubundi burwayi turebe n’icyo twamukorera.

Ni ryari umwana uvuga ko yatinze kuvuga?

Ubusanzwe tuvugako umwana yatinze kuvuga iyo ari hagati y’amezi 18 na 35, mugihe yumva neza icyo umubwiye ariko akagira imbogamizi zo kubasha kugira icyo we avuga. Ni ukuvuga ngo mugihe ntamagambo ahagije aramenya cyangwa se ngo abashe kugenda agerageza kuyahuza kuburyo bibyara interuro.

Ibyo kandi bijyana n’uburyo agenda, uburyo yumva ibyo umubwira, uburyo akina. Nk’uko ubushakashatsi bwabigaragaje, hari igihe umwana abiterwa nuko yatinze nanone kumva neza no gusobanukirwa ibyo yumva.

Niba umwana wawe afite amezi 24 nibura ntabe yabasha gukoresha amagambo nibura 50, twamutekereza nk’uwatinze pe! Undi mushakashatsi Elisabeth Pena yavuze ko hagati y’amezi18 na 20, nibura umwana wawe ashobora gukoresha amagambo 10 nibura mu rurimi rumwe, tutavuze ayandi yo muzindi ndimi zitandukanye. Ni ukuvuga ko ashobora no kuvuga arenzeho.

Amagambo yambere umwana avuga agomba guhera nibura ku mezi umunani kugera kuri 15 biterwa nawe uko umufasha. Ubundi rero buri kwezi nibura agomba kumenya cyangwa kunguka ijambo rishya.

Hagati y’amezi 17-20 amagambo ariyongera vubavuba kuburyo nawe umurera bigutungura hafi buri munsi amenya kuvuga ijambo rishya kuburyo muri ayomezi aba azi nibura amagambo 50.

Nibura abana 15% bafite imyaka 2 bakunda kugira kino kibazo cyo kwisobanura mu rurimi abenshi usanga bagenda babimenyera ku ishuri buhoro buhoro, ariko nk’uko twabivuze akenshi abantu bavuga indimi zirenze rumwe mu rugo abana babo bakunda guhura n’ikikibazo bakabura urwo bafata n’urwo bareka hakaba n’igihe bazivanga ntube Wabasha gusobanukirwa ngo ni iki muby’ukuri umwana avuze.
Dore rero ibyo ushobora gukorera uwo mwana wahuye n’ikibazo cyo gutinda kuvuga

1. Mushakire ubufasha

Hariho abantu babifitiye ubumenyi mubijyanye n’indimi, ntukemere kugira ururimi narumwe usubiza inyuma kuri we indimi nyinshi nubwo harubwo bibagora birafasha cyane ko aba afashwa n’uwabyigiye kandi uzi neza uburyo ari bumufashe kuburyo bitamugora.

2. Muhuze na muganga wabyigiye

Kugira ngo urebe neza niba ntakibazo kubijyanye n’imyumvire kuko nabyo birashoboka hari ubwo wenda bwaba ari ubundi burwayi rero nk’umubyeyi ugomba kubanza ukamenya neza niba koko ari ugutinda kuvuga bisanzwe cyangwa nyine ari bumwe muri bwa burwayi twavuze haruguru.

3. Mushyirireho nibura iminota 30 kumunsi

Niba ubona umwana wawe afite ikibazo mushakire nibura iminota 30 ihoraho burimunsi kandi mumasaha asa, yaba wowe cyangwa undi muntu ubonekera igihe babe bari kumwe bavugana imbonankubone ntabindi bintu ahugiyemo. Muri iyiminota
30, Uzaba unareba ibimushishikaje, ibyo arebaho cyane, uburyo akina n’ibyo akinisha.

Kuvuga k’umwana kandi kuzaturuka kubyo umubwira ibyo uha amazina. Urugero, niba afashe ingofero ugahita uyimubwira unayimwereka gutyo gutyo. Niba ari gukina umupira ugahita umubwira umupira nabyo akabifata! Hari ababyeyi bamwe nabamwe bakunda kubwira abana ibintu nabi niba ari umupira bo bakigisha abana ko ari “piya” cyangwa “pira” sibyo!

Niba ari igikoma bakababwira ko ari “koma” nabyo sibyo ni byiza ko uvuga ijambo uko riri we akarivuga uburyo ashoboye ariko burya mu mutwe we ibyo wamubwiye biba birimo nuko hari amagambo aba atarabasha guhita ahuza.

4. Komeza umuvugishe bihoraho

Ntuhangayike ibi ni ibintu birangira vuba bitewe n’umuhate umushyiraho, ikindi cyiza ni ukumuganiriza ukora ibimenyetso.
Niba uvuze umutwe ukawukoraho, niba uvuze oya ukabihakana nyine wenda uzunguza umutwe n’intoki ze kuburyo nawe ubutaha azajya abikora.

5. Murebane mu gitabo kirimo amashusho

Ibitabo akenshi bifasha abana kuko ibishushanyo biba birimo bifasha abana, hariho ibitabo byabugenewe by’abana bibamo amafoto atandukanye, rero iyo murebana gutyo mugenda mureba umubwira amazina yabyo, umutungira agatoki kuri buri kintu nabyo biramufungura akagenda atinyuka kuvuga buhoro buhoro wisanga umwana abimenye neza.

Gukurikirana abana mu mikurire ya buri munsi bifasha kumenya ibitagenda neza hakiri kare, ukaba wabikosora hakiri kare kuruta uko wabimenya igihe cyararenze aha ho biranagorana kubikemura.

[email protected]

Source: International Journal of Language and Communication Disorders