Ni iki twakura kuri Ezra nk’isomo mu buzima bwa Gikristo?

Ezira ni uwa kabiri muri batatu b’ingenzi bayoboye Abayuda mu itahuka ryabo bava mu bunyage i Babuloni bajya kubaka Yerusalemu. Zerubabeli yongeye kubaka urusengero (Ezira 3:8), Nehemiya yubaka inkike z’umurwa (Nehem 1 ,2) hanyuma Ezira agarura ibintu byo gusenga no kuramya Imana. Ezira yari umwanditsi akaba n’umutambyi woherejwe n’umwami w’ubuperesi Aritazeruzi kuyobora igice cy’Abayuda bari bavuye mu bunyage batashye i Yerusalemu (Ezira 7:8, 12).

Ezira yahuye n’ikibazo gikomeye cy’Abayuda bari barashatse abanyamahangakazi bakanabyarana, hanyuma abategeka kusenda abo bagore. Igice kinini cy’igitabo cya Ezira kibanda ku rugamba rwariho rw’abayobozi b’Abayuda bashakanye n’abagore bo mu mahanga yari abatuyemo (Ezira 9:2).

Ezira yongeye kugarura kwizihiza iminsi mikuru itandukanye kandi anafasha mu kweza urusengero no gusana inkike z’i Yerusalemu. Ezira 7:10 hagaragaza ishusho y’uko bitaga ku mategeko y’Imana. Intego ya Ezira yari iyo kwigisha amategeko y’Imana, kandi kuba umutambyi n’umwanditsi byamufashije kuba umuyobozi w’ikitegererezo no gusohoza umugambi yari afite.

Igitabo cya Ezira gitangirira aho icya 2 cy’ibyo ku ngoma kirangirira, hamwe na Kuro, Umwami w’Ubuperesi, atanga itegeko ryemerera abayuda bo mu bwami bwe gusubira i Yerusalemu nyuma y’imyaka 70 bari mu bunyage. Imana irahambaye kuburyo ishobora gukoresha n’umwami w’umunyamahanga, utanayubaha kugira ngo arengere ubwoko bwayo. Yakoresheje Aritazeruzi, undi mwami w’Ubuperesi, gufasha no guha ibyangombwa Ezira byari kumufasha kwigisha abantu be amategeko y’Imana. Uyu mwami kandi niwe wafashije Nehemiya kujya gusana inkike z’i Yerusalemu.

Umurimo wa Ezra warimo kwigisha ijambo ry’Imana, kugarura imitima y’abantu ku Mana, kugarura amateraniro n’ububyutse i Yerusalemu. Uku kongera kugarura ubusabane hagati y’Imana n’ubwoko bwayo bigaragaza ishusho Imana ishaka mu bantu buri munsi. Nyuma yo gusenyuka kw’inkike za Yerusalemu ndetse na nyuma y’uko abayuda barongoye abanyamahangakazi bakanabyarana bikabatandukanya n’Uwiteka, Ezira na Nehemiya bongeye gushishikariza abayuda ko kubana n’Imana aribyo shingiro rya byose kandi ko ijambo ry’Imana ari ryo muyobozi w’ubuzima bwa buri munsi.

Ezira yavuye mu bunyage i Babuloni ateganya ko asanga abantu bakorera Imana neza, ariko yasanze bitandukanye cyane. Byaramutunguye biranamubabaza cyane. Byamubabaje umutima, ariko yari yiringiye Uwiteka. Yasabye Imana ko ariyo yahindura ibintu ndetse anigaya ko ntacyo yarabashije kugira icyo yabikoraho. Yifuzaga ko abantu bamenya uburemere ijambo ry’Imana rifite. Igitabo cya Ezira na Nehemiya byari ibyo gusohoza ijambo ry’Imana.

Nta kintu cyagombye gusimbura Imana kandi kuyubaha ni itegeko. Uwiteka abereye maso abana be kandi niwe ubarinda, yibuka amasezerano yagiranye nabo kandi abatera umwete mu byo bamukorera (Ezira 5:1). Nubwo umugambi w’Imana ujya usa n’ukomwa mu nkokora, urugero nko kongera kubaka Yerusalemu, ariko Imana ijya igaruka mu gihe cyayo umugambi wayo ugakomeza.

Imana iba mu buzima bwacu nkuko yabanaga na Ezira kandi nka Ezira dushobora gukoreshwa ibitashobokaga. Ezira yakoze ibitashobokaga, kubera ukuboko k’Uwiteka kwabimukoreshaga (Ezira 7:9). Buri mukristo ni urusengero (1 kor 6:19) umwuka wera aturamo. Inzitizi Ezira yahuye nazo mu gihe cye, ni abantu bari bafite imitima mibi. Ibiturwanya nk’abakristo uno munsi ni ikibi ubwacyo, aricyo Satan waje kuturimbura no kurimbura urusengero rw’Imana (Yoh 10:10).

Intego zacu zagombye kuba zifite agaciro mu maso y’Imana. Iyo Imana iri mu ruhande rwawe kandi igashyigikira intego yawe, amarira y’uyu munsi ashobora kuvamo ibyishimo ejo ndetse n’insinzi, nk’uko umubabaro Ezira yari afite kubw’Abayuda wahindutsemo ibyishimo byo kubaka Yerusalemu ndetse no kugarura ubusabane hagati yabo n’Imana.

[email protected]