Ni ibiki byihariye Bibiliya ivuga ku Muhanuzi Daniyeli , N’ isomo abakirisito bamwigiraho ?

Buri wese azi Daniyeli ko yajugunywe mu rwobo rw’intare zari zimaze igihe zitagaburirwa. Gusa hari ibintu byinshi cyane bitazwi kuri Daniyeli, bifitiye isomo abantu. Bibiliya igaragaza ishusho ye uko yakoraga , uko yari umukiranutsi, uko yari umunyabwenge w’intwari bikaba byaratumye arokora ubuzima bw’abantu batari bakeya.

Reka twifashishe Bibiliya, kugirango dukore urutonde bwa bimwe mu byaranze Daniyeli, tubashe kumumenya neza.

1. Daniyeli yakomokaga mu muryango w’umwami Dawidi

Daniyeli yakomokaga mu muryango wa Dawidi wayoboye Isirayeli mu myaka ibinyejana byinshi byatambutse. (2 Abami 11:1–3). Gusa mu mwaka 605 mbere ya Yesu ingoma ya Dawidi yarimo ibibazo byinshi ,byari igihe cy’umwijima kuko abamukurikiyeho batubashye Imana.

Umwami Nebukadinezari yagose Yerusaremu, atwara ibintu byose by’agaciro byo mu nzu y’Imana, abijyana I Babuloni. Si ibyo byonyine yatwaye ahubwo yanyaze n’abana bo mu muryango w’Umwami kugirango bamukorere(Dan 1:3) kandi Daniyeli nawe yari umwe muri abo bana (Dan 1:6), ibi byabaye Daniyeli akiri ingimbi.

Nubwo Daniyeli yaturukaga mu muryango ukomeye kandi nawe yari umuhanga ariko yabikoresheje ahesha Imana ikuzo. Uziko bitandukanye cyane no muri iyi minsi kuko usanga abantu benshi bakoresha imbaraga n’icyubahiro bahawe n’Imana bakabihonyoza abato kuribo. Twige guhesha Imana icyubahiro nka Daniyeli.

2. Daniyeli yari umunyaburanga

Ntabwo ari buri wese wo mu muryango w’umwami wagiye Babuloni: Hagiyeyo gusa abari bafite uburanga kuko biri mu byo Nebukadinezari yagenderagaho ajya guhitamo mu bigaragara n’amaso (Dan1:4), Ku bwiza Daniyeli yarabahize.

Uziko bitangaje kuba abantu basigaye bashaka ubwiza bagamije kwikururira ababakunda, ndetse hari ababigira iturufu bagasenya ingo z’abubatse. Abantu bahindura ingendo,imyambaro kandi bisiga amavuta ahenze abahindura uko bataremwe, bagamije kwiremera igikundiro. Kwibukeko Imana data wa twese itarobanura abantu ku butoni mu mahanga yose uyubaha niwe yubaha(Ibyakozw 10:354). Uziko Samweli ajya gukoranya umwami mu muryango wo kwa Yesayi yashatse kureba ku buranga Imana ikamuhakanira(1samweli16:7 ), ikamubwirako yo yitegereza umutima gusa. Imana ikeneye ko dukora isuku y’umutima kugirango duse neza mu maso y’Imana, duse nayo kuko iyo umubyeyi abyaye umwana udasa nawe ntibimunyura.

3. Daniyeli yari umuhanga n’umunyabwenge

Abo bari kumwe bamaze imyaka itatu bigishwa umuco n’ururimi rw’I Babuloni ariko Daniyeli na begenzi barushaga abo biganye ubwenge inshuro icumi kandi hamwe n’abarozi (Dan 1:20)

Ubwenge bwa Daniyeli bwatumye amenyekana arakundwa cyane mu gihe cye. Kuko ubwo umuhungu wa Nebukadinezari yabonaga ibiteye ubwoba,Umwamikazi yamurangiye Daniyeli ko ariwe uzamufasha gusobanukirwa ibyo yari yarose, amubwirako afite ubwenge no kwitegereza n’ubuhanga(Dan5:11)

Daniyeli agenda agaragara mu bindi bitabo bya Bibiliya kubera ubuhanga n’ubumenyi,Ezekiyeli yaramwirase(Ezekiyeli28:3),

Kugera uyu munsi Daniyeli ni ikitegererezo, kandi no mu gitabo cy’Abaheburayo yibandwaho cyane mu by’ubwenge kurusha uko bavuga Salomo.

Uziko bitangaje kuba hari abantu bajya gushaka imbaraga z’abakonikoni kandi bashaka kuzikoresha mu nzu y’Imana ngo abantu babemere ariko tubonye Imana ubwayo ariyo itanga ubwenge bwo kwitegereza no kumenya. Uziko Imana igirira umuntu ibambe ikamuha ku mpano zayo, ntazajye azikoresha ayihesha icyubahiro ! cyangwa yagira gato amenya akabyiyemera nk’uwabyishyiriyeho, yaba abaye umuhanzi akivuga ibigwi ukagirango yaba yarafatanyije na Dawidi gucuranga ubwo yacurangaga imyuka mibi ikava muri Sawuli.

Impano yose watunga y’Imana ukazayikoresha mu nyungu zawe, ntaho bitaniye no kwiba ibyo wacungishijwe, nta kabuza urabiryozwa kuko uba unyereza umutungo utari uwawe.

4. Daniyeli yari afite umwihariko wo gusobanura inzozi

Muri Bibiliya harimo inzozi nyinshi cyane , zimwe muri izo ni amabwiriza yoroshye avuye ku Mana. Izindi ni inzozi zigoye cyane kuzumva no kuzisobanura.

Igihe umuntu ahuye n’urusobe w’inzozi, hari inzira zimwe, izo nzozi zishobora gusobanurwamo:

1. Kuba byisobanura muburyo bworoshye
2. Kubona umuntu agusobanurira mu nzozi
3. Gushaka umuntu ubisonukiwe akagusobanurira

Daniyeli ibyo byose byari bimurimo uko ari bitatu, Yagiraga ubwenge bwo kumenya ibyerekanywa byose no gusobanura inzozi(Dan 1:17) kandi yariwe muntu wenyine washoboraga gusobanura inzozi ziteye ubwoba Nebukadinezari yarose hamwe n’umuhungu we Beshezari (Dan 2:27,30, 4:4-9, 5:15-17). Daniyeli nawe ntabwo yashoboraga gusobanura inzozi zose kuko nawe hari izo yarose ziramunanira akoresha buriya buryo bwa kabiri (Da 7:15–16).

5. Gukiranuka kwa Daniyeli kwaramenyekanye

Daniyeli yahisemo kutiyandurisha ibyo kurya by’umwami ubwo yageraga i Babuloni(Dan 1:8) . Daniyeli yakomeje gusenga no bihe bitamworoheye ubwo bashakaga ku mutegera ku Mana ye (Da 6:13), yakomeje gukiranuka bituma Imana ihererwa ikuzo mu kwihangana kwe.

Ibyiringiro yarafite byamwongereye kubahwa, mu gitabo cya Ezekiyeli 14, Imana ikoresha Daniyeli, Nowa na Yobu nk’ingero z’abagabo bakiranukiye Imana kukigero cyo hejuru? ( Ezekiel 14:12–23.)

6.Bibiliya igaragaza Daniyeli nta kizinga afite

 Aburahamu yakoze ikosa ku muja we Hagari
 Mose yacumuriye ku rutare
 Dawidi yasambanyije umugore wabandi, yica na Uriya abandi bakiranutsi babiri ni Nowa na Yobu mubo Bibiliya ivuga ariko Nowa yambaye ubusa amaze gusinda(Itang 9:21) na Yobu yaratuye kubera uburyo yavuze Imana (Yobu 38:2; 42:1–6), ariko Daniyeli nta kibi Bibiliya imuvugaho gusa Daniyeli yari umwiringirwa nta mafuti cyangwa ibicumuro byamugaragaragaho(Dan 6:4-5)

7. Daniyeli yari umukuru w’abanyabwenge bose b’I Babuloni

Daniyeli amaze gusobanura inzozi za Nebukadinezari , yagizwe umutware w’abanyabwenge (Dan 2:48,4:9, 5:11). Kubera kubana n’Imana ibyananiye abakoninikoni n’abapfumu Daniyeli yarabishoboye .

Kubana n’Imana ni byiza cyane kuko bihesha umuntu gutunga amakuru yizewe kandi avuye ku Mana, akabasha kugirira abantu b’Imana umumaro.

8.Daniyeli yabaye umuyobozi ku ngoma z’abami bane ba Babuloni

1. Ku Ngoma ya Nebukadinezari, Daniyeli yasobanuye inzozi (Dan2:48)
2. Ku Ngoma ya Belushezari, Daniyeli yasomye ibyari byanditswe ku nsika (Dan5:29)
3. Ku Ngoma ya Dariyo, Daniyeli yatonnye ku mwami kurusha abandi batware bose (Dan 6:1–3)

4. Ku Ngoma ya Kuro , Daniyeli yaguwe neza (Dan 1:21; 6:28)

9. Daniyeli yahimbwe Beluteshazari

Izina Daniyeli risobanurako Imana ariyo mucamanza ariko Abibaburoni bise Daniyeli Beluteshazari, kuko Bel yari ikigirwamana cyabo , Bahise bamurindisha Beli (Dan 4:8).

Daniyeli yabanye n’Imana mu bihe bitandukanye kandi arayubahisha. Ntiyahindutse Yazamuwe mu ntera icyubahiro cy’Imana kuri we kirazamuka. Yabaye mu bihe by’ingorane ntiyacika intege, Ubwiza bw’Imana bubana nawe kugeza apfuye ashaje.

Nkwirije kuzomatana n’Imana, nta gihombo bitera

Ismael @agakiza.org