Ng’ibi bimwe mu biranga Anti-Kristo (Igice cya 3)

Usomye mu gitabo cy’umubwiriza hatubwira ko nta kintu gishyashya kiriho munsi y’ijuru kuko ibiriho byose byahozeho na kera kandi ko ibyo tuzabona byabanje kubaho kera.

Uko bwije n’ uko bukeye intambara hagati y’ikibi n’ikiza irushaho kwiyongera. Intambara iri hagati ya satani n’Imana. Nk’uko mu bizi iyi ntambara yatangiriye mu ijuru ubwo satani yashakaga kwikuza ngo akureho ubutegetsi bw’Imana (Ibyahishuwe 12:7) .
Intambara ntiyarangiriye aho kuko satani yakomeje kurwanya Imana binyuze mu Bantu b’Imana. Murabiziko satani yanyuze muri Eva kugirango we na Adamu barenge ku itegeko Imana yari yabahaye. Hano dushobora kureba neza amayeri Satani akoresha kugirango agoreke ijambo ry’Imana (Itangiriro 2:16) .Hano Imana yariyababwiye neza ko nibaramuka bariye kuri kiriya giti ntakabuza bazapfa . Ariko reka twumve ikiganiro inzoka yagiranye na Eva. Itangiriro 3:3-6, satani yakomeje guhendahenda Adamu na Eva barenga kubyanditswe n’Imana. Satani ntabwo yarekeye aho kuko yakomeje no mu gihe cya Nowa n’icya Roti, yakomeje gushukashuka abantu ngo bakore ibyaha birengagize itegeko ry’Imana.

Kuki satani ashukashuka abantu ngo barusheho kwirengagiza ibyanditswe by’Imana?

Igisubizo nuko satani ashaka abamusenga kandi n’Imana nayo ishaka abayisenga. satani uburyo bwose wamusengamo ntacyo bimutwaye waba ubizi cyangwa utabizi icyo satani ashaka nuko umusenga. Igisubizo ni icyawe kugirango uhitemo uwo ukwiye gusenga.

Gusa igikwiriye nuko twese twasenga ya Mana ya Daniyeli , Meshake, Abedenego na shadarake, Imana yabanye na Aburahamu na Isaka na Yakobo. Imana nayo yatweretse uburyo dukwiye kuyisengamo.

Satani ni indyadya ku rwego rwo hejuru kugirango tumusenge anyura aho umuntu atapfa kubitahura usanga aca mu madini n’abayayoboye baguye kugirango barwanye Imana baciye mu kugoreka ibyanditswe byera. Muribuka ubwo Yesu yavukaga ,satani yaciye mu butegetsi bw’ Abaroma kugirango abone uburyo bwo kwica Yesu kristo. Ntabwo dushobora kubona satani ubwe yaje ahubwo tubona ibikorwa bihabanye no gushaka kw’Imana, akabikoresha abantu.

Ese uyu munsi satani yaba akora ute? Yaba akoresha amadini ? Yaba akoresha ibihugu bimwe na bimwe ?

Mureke twifashishe ubuhanuzi kugirango turebere hamwe uburyarya n’uburyo satani akoresha ngo arwanye itorero ry’Imana. Mu buhanuzi harimo ibanga ryo kumenya ibyo abandi badashobora kumenya. Twifashishije amagambo aboneka muri 2 Petero 1:20-21 hatubwirako nta jambo na rimwe mu byanditswe n’Imana rishobora gusobanurwa uko umuntu we abitekereza, ijambo ry’Imana risobanurwa na Bibiliya yonyine cyangwa n’abantu b’Imana bayobowe na mwuka wera. Gusa usanga amadini menshi ahisha ukuri kugirango adatakaza abayoboke.

Imana itubwirako nta kintu na kimwe kizaba itabanje kukimenyasha abantu bayo (Amosi 3:7), Ibyashishuwe 1: 3, Yohana 16:4 .Yesu yabwiye abigishwa be ati : “dore ndabibabwiye bitari byaba kugirango nibiba mujye mwibukako nabibabwiye.” Abantu benshi ntibazi amabanga ari muri Bibiliya ni yo mpamvu tudashobora kumenya ibiri kuba uyu munsi.

Ibyahishuwe 12:17..... uyu mugore uvugwa ninde ? Abana be bavugwa ni bande ? Mureke twifashishe Bibiliya tubone igisubizo . Umugore uvugwa hano ni itorero ry’Imana cyangwa se umugeni wa Kristo. Abefeso 5:25 hatubwirako abagabo dukwiye gukunda abagore nk’uko kristo yakunze itorero akaryitangira. Hano umuntu ahita yumvako itorero rigereranywa n’umugore na ho Kristo akagereranywa n’umugabo. Dusomye mu 2 Abakorinto 11 aya magambo aratwereka neza ko umugore agereranywa n’itorero rya Kristo.

Bibiliya itubwirako ntakizaba Imana itakimenyesheje intore zayo ziyitakira ku manywa na nijoro. Aya niyo mahirwe abantu b’Imana bafite yo kuzagendana n’ijwi ribayobora mu bihe nk’ibi bigoye by’Umwijima, bigoye kwigobotora udakorana n’Imana bya bugufi.

Ufite ugutwi niyumve ibyo umwuka abwira amatorero. Unesha nzamuha kurya ku mbuto z’igiti cy’ubugingo kiri muri Paradizo y’Imana.

Ismael [email protected]