Nakora iki mu gihe natakaje ubushake bwo kurya?

Muri iyi nyandiko, tugiye kuvuga ku kibazo cyo gutakaza ubushake bwo kurya, turagaragaza impamvu zishobora gutera icyo kibazo, ingorane n’ingaruka gishobora gutera ndetse turanagaragaza uburyo bwo guhangana n’iki kibazo.

Gutakaza ubushake bwo kurya bibaho, bitewe n’impamvu runaka, bikagaragazwa n’imyitwarire idasanzwe mu bijyanye no gufata amafunguro, muri iyo twavugamo nko: kumva udashonje bikamara igihe kirekire, kugabanura ingano y’ibiryo umuntu yari asanzwe arya no kumva uhaze cyane nyuma yo kurya ibiryo bike.

Ibi iyo bibayeho ku muntu igihe kirekire, bishobora gutera ingorane mu buzima, nko kutabona intungamubiri umubiri ukeneye, gutakaza ibiro mu buryo bukabije kandi mu gihe gito, guhorana umunaniro ndetse no gucika intege bigarukirana.
Impamvu zishobora gutera umuntu gutakaza ubushake bwo kurya.
Ubusanzwe ikibazo cyo kutagira ubushake bwo kurya, kigaragara ku bantu bafite uburwayi bukomeye nk’indwara zidakira, nka kanseri, Virusi itera SIDA, indwara zifata ibihaha, izifata umutima, impyiko n’umwijima, ariko hano twagerageje kubatangariza ibindi bintu bishobora gutera umuntu gutakaza ubushake bwo kurya igihe kirekire.

 Ibiryo:iburyo uburyo byateguwe, uko bisa, uko biryoshye, bishobora gutuma umuntu atakaza ubushake bwo kurya.
 Imiti: hariho imiti ishobora gutera umuntu gutakaza ubushake bwo kurya.
 Gutwita, nabyo bishobora kuba imbarutso yo kugabanuka k’ubushake bwo kurya kuri bamwe.
 Kurwara ibisebe mu kanywa cyangwa mu muhogo, bishobora gutera umuntu gutakaza ubushake bwo kurya kubwo gutinya ububabare ari bugire mu gihe cyo kurya.
 Virusi na bagiteri nazo zishobora gutera ikibazo cyo gutakaza ubushake bwo kurya, mu gihe zageze mu mubiri w’umuntu, akagira ubwandu runaka(Infection).
Ingorane n’ingaruka zo gutakaza ubushake bwo kurya

Iyo gutakaza ubushake bwo kurya, bidakumiriwe hakiri kare, mbese bikamara igihe kirekire, bishobora gutera ibibazo n’ingorane bitandukanye mu mubiri, muri ibyo twavugamo nko:

 Gutakaza ibiro byinshi mu gihe gito, ibi bishobora gutera izindi ngorane mu mubiri.
 Kugira agahinda gakabije( Depression)
 Kurwara indwara zikomeye, zitandukanye, nk’izifata ibice bitandukanye by’urwungano ngogozi, umutima, Anemia, imirire mibi ikabije(Severe malnutrition), n’ibindi.
 Kugabanuka k’ubushobozi bw’ubwirinzi kamere bw’umubiri, ibi bikaba byatera, kurwara indwara nyinshi cyane cyane iziterwa na virusi na bagiteri.

Dore uko wahangana niki kibazo

Mu gihe ugize iki kibazo cyangwa se, ukaba ufite umwana ukiri muto ukabona ntashaka kurya kandi mu buryo buhoraho, uburyo burusha ubundi kuba bwiza mu gukosora iki kibazo, ni ukugerageza kumenyerana n’ibiribwa, ubitegura,ubiteka, ubigaburira abandi, kuburyo umuhumuro wabyo ndetse n’uko bisa bigukurura, bityo umubiri ukihutisha imikorere y’imisemburo yongera ubushake bwo kurya,naho ku mwana muto we, kuko aba ataramenya guteka, ushobora kumufasha umwiyegereza mu gihe uri gutegura amafunguro, agahumurirwa nabyo, ndetse no mu mikino, mukaba mwakwifashisha ibiribwa nk’ imbuto, iyo ahumurirwa nabyo, anareba uko bisa,ibi bifasha gukora vuba kw’ imisemburo itera umuntu gusonza.

Ibindi wakora kugira ngo wongere ubushake bwo kurya, harimo:

• Kurya ibiryo bike, ariko ukabirya inshuro nyinshi
• Kwirinda ibiryo birimo amavuta mu gihe ufite iki kibazo kuko biba byashobora gutera umuntu kugira iseseme, kandi iseseme igabanya ubushake bwo kurya.
• Kugerageza kurya uri kumwe n’abandi bantu muganira, mwisanzuranaho, ibi nabyo, bigufasha kumva uryohewe ndetse ukaba wanakumbura ko ibyo bihe bigaruka, bityo ikibazo cyo kutagira ubushake bwo kurya kikaba cyashira.

• Gukoresha isahani nini mu gihe ugiye kurya, ndetse ugashyiraho ibiryo byinshi nabyo bishobora kugufasha mu kukongerera ubushake bwo kurya.
• Kurya imbuto n’imboga nabyo biri mubifasha mu kongerera umuntu ubushake bwo kurya, bitewe n’intungamubiri ziba zikungahayemo.
Mu gihe ukoresheje ubu buryo bwose bikanga, ni byiza kwihutira kwa muganga, hakarebwa inkomoko y’ikibazo, cyane ko twabonye ko gutakaza ubushake bwo kurya, bishobora kubaho byatewe n’indwara ikomeye, bityo ikaba ariyo, yavurwa mbere.

Source: www. liferaftgroup.org
[email protected]