Muri iyi si yuzuye abigisha b’ibinyoma, ni gute wamenya uw’ukuri?

“Bakundwa, ntimwizere imyuka yose ahubwo mugerageze imyuka ko yavuye ku Mana, kuko abahanuzi b’ibinyoma benshi badutse bakaza mu isi.”(1Yohana4:1)

Turi mu isi , aho kutagira ukuri no kwica amategeko bikomeje kwiyongera, ariko abakristo bakeneye kugira amakenga kugirango birinde inyigisho ziyobya zibagusha bakava mu murongo w’ibyizerwa. Iyi myigishirize akenshi yigishwa n’abantu biyita ko bakurikiye Yesu.

Yesu ubwe yatanze imiburo:

• Baziyita izina rya Kristo: “kuko benshi bazaza biyita izina ryanjye bati ‘Ni jye Kristo’, bazayobya benshi.”(Matayo24:5)

•Abayobye bazayobya n’abandi :“Kandi abantu babi n’abiyita uko batari bazarushaho kuba babi, bayobya bakayobywa.”( 2 Timoteyo3:13)

•Bazaza bigize intumwa za Kristo : “Bene abo ni intumwa z’ibinyoma, ni abakozi bariganya bigira nk’intumwa za Kristo. Kandi ibyo si igitangaza, kuko na Satani ubwe yihindura nka marayika w’umucyo. Nuko rero ubwo bimeze bityo, ntibyaba igitangaza kugira ngo abakozi be na bo bigire nk’abakozi bagabura ibyo gukiranuka: iherezo ryabo rizahwana n’imirimo yabo.”(2Abakorinto11:13-15)

•Bazaba bafite ishusho yo kwera ariko bahakana imbaraga zako: “kuko abantu bazaba bikunda, bakunda impiya, birarīra, bibona, batukana, batumvira ababyeyi babo, indashima, batari abera, badakunda n’ababo, batūzura, babeshyerana, batirinda, bagira urugomo, badakunda ibyiza, bagambana, ibyigenge, bikakaza, bakunda ibibanezeza aho gukunda Imana, bafite ishusho yo kwera ariko bahakana imbaraga zako. Abameze batyo ujye ubatera umugongo.” ( 2 Timoteyo 3:2-5)

Nshuti , si iterabwoba ahubwo ni ukubaburira mukamenyako mukwiye kwitondera abo mwumva. Si buri muntu uza asa nk’umuntu wo gukiranuka aba avuye ku Mana koko.

Ibi ni bimwe mu bintu ukwiye kwitaho mu kugenzura abigisha b’ukuri:

1.Bigisha ukuri k’ ubutumwa bwa Yesu Kristo

Abigisha ba Yesu b’ukuri bigisha ubutumwa bw’ukuri, bakigisha Yesu Kristo waje mu mubiri, agapfa ndetse akazuka.
Yesu ubwe yagize ati :
“Iki abe ari cyo kibamenyesha Umwuka w’Imana: Umwuka wose uvuga ko Yesu Kristo yaje afite umubiri ni wo wavuye ku Mana, ariko umwuka wose utavuga Yesu utyo ntiwavuye ku Mana, ahubwo ni umwuka wa Antikristo, uwo mwumvise ko uzaza kandi none umaze kugera mu isi.”(1Yohana4:2-3)

Ntidukwiye gutega amatwi abanyuranya n’ubutumwa bwiza, ntidukwiye kwita uko bigisha biryoheye amatwi cyangwa buryo ki bagaragara neza: “Ariko nihagira ubabwiriza ubutumwa butari ubwo twababwirije, ari twe cyangwa ndetse marayika uvuye mu ijuru, avumwe.”(Abagatiya1:8)

2.Baba bafite imyitwarire nk’iya Kristo

Dukeneye kugenzura imyitwarire y’abayobozi babwiriza ubutumwa. Bashobora kubwiriza amagambo yateguwe neza kandi yumvikana neza ariko niba imyitwarire yabo idasa n’iya Kristo dukwiye kutabakurikira.

Umwami Yesu yagize ati: “Mwirinde abahanuzi b’ibinyoma baza aho muri basa n’intama, ariko imbere ari amasega aryana. Muzabamenyera ku mbuto zabo. Mbese hari abasoroma imizabibu ku mugenge, cyangwa imbuto z’umutini ku gitovu?”(Matayo7:15-16)

3. Bubaha ijambo ry’Imana

Ijambo ry’Imana ni rwo rufatiro rwonyine dukwiye kumva no kubaha. Dukwiye gushaka abigisha babaho imibereho ijyanye n’ijambo ry’Imana. Umwami Yesu ubwe yavuzeko nawe ubwe akora ibyo se ashaka. Ese wowe urinde wo gukora ibyo wishakiye?

“Yesu arabasubiza ati “Ni ukuri, ni ukuri, ndababwira yuko ari nta cyo Umwana abasha gukora ubwe atabonye Se agikora, kuko ibyo Se akora byose n’Umwana ari byo akora… Nta cyo mbasha gukora ubwanjye, ahubwo uko numvise ni ko nca amateka, kandi ayo nca ni ay’ukuri kuko ntakurikiza ibyo nkunda ubwanjye, ahubwo nkurikiza ibyo uwantumye akunda. (Yohana5:19,30)

4. Ntibakunda ubutunzi cyane

Ntidukwiye kwizera Imana kuko dutekerezako hari icyo izaduha ( amafaranga kuri konti akazi n’ibindi). Aha siho dukwiye gushyira icyizere cyacu. Dukwiye gushaka Imana kuko idukunda kandi ari nziza ihaza imitima yacu, ubwenge n’Umwuka. Igihembo cy’ibyiringiro byacu kiri ku Mana kuko tuziko igihe dufite Imana tuba dufite buri kintu ariko niba nta Mana dufite ntacyo tuba dufite.

Maze Yesu abwira abigishwa be ati “Umuntu nashaka kunkurikira yiyange, yikorere umusaraba we ankurikire, kuko ushaka kurengera ubugingo bwe azabubura, ariko utita ku bugingo bwe ku bwanjye, azabubona. Kandi umuntu byamumarira iki gutunga ibintu byose byo mu isi, niyakwa ubugingo bwe ? Cyangwa umuntu yatanga iki gucungura ubugingo bwe?”(Matayo16:24-26)

[email protected]