Mu byiza byaranze igitaramo cya Nshuti Bosco, harimo n’inkomoko y’izina rye

Mu gitaramo “Ibyo Ntunze Live Concert” cyateguwe na Bosco Nshuti, cyabaye kuri iki cyumweru tariki 02 Nzeri 2018 mu mujyi wa Kigali muri Serena Hotel, cyaranzwe n’ibyiza byinshi, harimo ubwitabire butangaje, urusobe rw’indirimbo n’abaririmbyi batandukanye bahimbaza Imana, ijambo ry’Imana ryuje ukuri kudaca ku ruhande na gato, ndetse n’imbamutima z’ababyeyi be, ari nazo zatumye abantu bamenya inkomoko y’izina rye.

Mu byiza byahabereye byakoze ku mutima abatari bake mu bitabieriye iki gitaramo, harimo no gukorwa ku mutima kw’umuyobozi wari uyoboye gahunda MC Dione, bimutera kwibaza uko ababyeyi ba Bosco Nshuti bo bamerewe mu gihe we yumva ibyishimo byamurenze. Niko guhamagara ku ruhimbi ababyeyi ba Bosco Nshuti, ngo batangarize imbaga iteraniye aho uko bumva bamerewe mu gitaramo kimeze neza cyane cyateguwe na Bucura wabo.

BOSCO ARIRIMBA IBYO NTUNZE


MC Dione yakozweho bituma yifuza kumenya uko ababyeyi ba Bosco bamerewe

Ababyeyi nabo rero si ukuhaserukana ijabo, babaye nk’abari babatindiye. Mu ijambo se wa Bosco yavuze yagarutse cyane ku gushimira Imana n’abitabiriye iki gitaramo, aho yagaragaje impungenge yari afitiye umwana we ko ashobora kuzabura abantu bitabira igiterane cye none akaba yatunguwe no kubona abantu baruta ubwinshi imyanya yateganyijwe. Uyu mubyeyi ndetse akomoza gato ku bigwi by’abana be anabahamagara imbere ngo bafatanye gushima Imana. Atarasoza ijambo rye, yakomoje gato ku bigwi bya Bosco mu ncamake ibirambuye abiharira umukecuru nyina wa Bosco.

Mama wa Bosco yakoze cyane ku mitima y’abari aha, aho yafashe umwanya uhagije avuga ibigwi bya Bosco Niyonshuti nk’umwana we wa nyuma. Yavuze uko yakuze yitonda cyane, adakunda gusamara no gusahinda nk’abandi bana, ariko ngo akaba yarakunze kugaragaza impano yo kuririmba no gukunda muzika cyane kuva mu bwana bwe kugeza igihe yatangiriye gutanga ubufasha ku makorari atandukanye, atangira guhanga ize wenyine aho asoreje amashuri ye yisumbuye.

Asatara gucutsa ijambo rye mama wa Bosco yavuze isengesho yasenze ubwo yari atwite Bosco umuntu atabura kuvuga ko ryanyeganyeje imitima y’abari aho, bitewe n’uburemere no kwizera uyu mubyeyi yasenganye.

Yagize ati: “…Bosco ni bucura bwange nkunda, yitwa Niyonshuti Jean Bosco, tujya gutekereza kumwita Niyonshuti byavuye ahantu hakomeye, ni umuhungu wa kabiri mu bahungu banjye mbyara, nasenze Imana mbwira Imana ngo ndashaka umwana w’umuhungu uzaba uwa kabiri kuri Daniel (umuhungu we wa mbere uba hanze y’u Rwanda) ndashimira Imana ko dusenga Imana yumva kandi igasubiza, numvaga mfite kwizera ko Imana mbwiye yumva kandi ko ibasha kumpa icyo nkennye…"


Mama wa Bosco yahishuye inkomoko y’izina NIYONSHUTI

"...navuze ijambo rikomeye mbwira Imana nti ‘MANA NIBA UBONA IYI NDA NTWITE NTAZASYIBYARAMO UMWANA W’UMUHUNGU N’UWO MFITE UMWIJYANIRE!’ Ariko icyo gihe nari mfite kwizera kwinshi pe. Imana ishimwe kuko yansubije. Ubusanzwe tuziko abagabo aribo bita abana amazina, ariko uyu we ni njye wasabye umutware wanjye ko tumwita NIYONSHUTI, kuko nari mbonye koko ko Imana ari yo nshuti yo kwizerwa kuruta izindi zose, urayibwira ikakumva kandi iyo uyisabye iraguha, ndayishimye cyane.”

Ngaho rero aho izina NIYONSHUTI ry’uyu musore ryaturutse, ari naryo ahina muri muzika akitwa Bosco NSHUTI.

Muri rusange, ababyeyi ba Bosco bashimiye Imana ko yamushyizemo impano nziza yo kuyiramya kuva ari umwana kugeza magingo aya, maze bamwifuriza gukurira mu Mana kugeza ashaje.

Bosco Nshuti yashimishije abantu cyane mu ndirimbo nyinshi yaririmbye by’umwihariko mu ndirimbo “Ibyo ntunze” ari na yo yitiriwe iki gitaramo. Muri iki gitaramo kandi Bosco Nshuti yafashijwe n’abandi bahanzi n’amakorali batumye iki gitaramo kigaragaza umwihariko. Muri bo harimo Pappy Clever, Dominic Ashimwe, Alexis Dusabe, Korali Siloam na New Melody.

New Melody Bosco abarizwamo yafatanije nawe gutarama

Korari Siloam nayo yashyigikiye umuririmbyi wayo

Mbere y’uko iki gitaramo kigana ku musozo, Bosco Nshuti nawe yafashe akanya ashimira abantu b’ingeri zose bamufashije gutegura iki gitaramo asezeranya abacyitabiriye bakabura aho bicara ko ubutaha azabajyana aho bazaba bisanzuye.
Muri iki gitaramo abantu batandukanye ndetse n’abahanzi bashyigikiye Bosco Nshuti mu buryo bw’amafaranga by’umwihariko ariko Bosco akaba yanagabiwe inka.
Umubare munini w’abitabiriye iki gitaramo bakozweho cyane ubwo Ev. Jean Paul Nzaramba yigishaga ijambo ry’Imana ndetse habonekamo n’abiyemeza gutangira inzira yo gukizwa. Abandi nabo wabonaga bizihiwe.

Bosco nawe yafashe ijambo ryo gushima

Mu kiganiro Agakiza.org twagiranye n’umwe mu bitabiriye iki gitaramo utifuje gutangazwa kubw’impamvu ze bwite, yatubwiye ko yatunguwe no kumva umuntu umuntui ubwiriza uko yabibonye mu gitaramo kingana kuriya muri iki gihe.

Yagize ati: “Byantunguye, uriya mugabo afite ubushizi bw’amanga butangaje. Ubundi tumenyereye ko muri iki gihe tuza mu bitaramo abantu bakibyinira gusaaa, bakitahira. Banagira ngo bashyizeho ijhambo ry’Imana, bakizanira umuntu wivugira utuntu turyoheye amatwi y’abantu gusaaa n’ubuhanuzi utamenya aho buturuka. Ariko uriya muntu ni Imana ubwayo yamuraritse. Adusobanuriye itandukaniro riri hagati y’idini n’itorero ry’Imana numva ndabyumvishe neza. Ubu ngiye kwitoza gukorera byose mu izina rya Yesu nkuko tubyigishijwe.

KURIKIRA IJAMBO RYIGISHIJWE MURI IKI GITARAMO
Muri rusange imbaga y’abantu babarirwa mu bihumbi bashimishijwe n’iki gitaramo ku buryo batashye bakiri mu mujyo umwe wo kuramya Imana nta kurambirwa.

Dominic Ashimwe nawe yaririmbye muri iki gitaramo

Shimwa Josoue yafashije Bosco gutegura iki gitaramo

Abantu bari benshi cyane

DOMINIC ASHIMWE YASUSURUKIJE IMBAGA MURI IKI GITARAMO

ALEXIS DUSABE NK’INARARIBONYE MU BAHANZI YIBUKIJE ABANTU UMUZIKI WE WO HAMBERE