Menya umumaro wo gutanga kimwe mu icumi

Kimwe mu icumi ni ikintu abantu benshi batinya. Bamwe bavugako gikwiriye kuvaho kuko ngo mugihe Yesu yari ku isi ntakintu yigeze acyigishaho. NubwoYesu ntacyo yakivuzeho cyane mu buryo bweruye ariko nanone ntiyaje kukivaho.

Mu butumwa bwiza uko bwanditswe na Matayo 5:17 Yesu yagize ati:”Mwitekereza ko naje gukuraho amategeko cyangwa ibyahanuwe.Sinaje kubikuraho,ahubwo naje kubisohoza”.Tugendeye kuri ibyo,tugomba kumva neza icyo icyacumi ari cyo n’icyo Imana icyivugaho.

Ese icyacumi ni iki?
Mu gitabo cy’Itangiriro,dusoma ko ari kimwe cy’icumi cya buri kintu,tuba twarahawe n’Imana.Muri make,ni kimwe mu icumi cy’ibyo twungutse,twabonye ndetse n’ibyo twakiriye. (Itangiriro 14:20).

Imana idutegeka ko dukwiye gutanga kimwe mu icumi kugirango inzu yayo ibemo ibyo kurya (Malaki3:10).
Bamwe mu bakristo bakunze kwibaza mu by’ukuri aho icya cumi kijya ndetse n’uko gikoreshwa.ni ibisanzwe kwibaza icyo kibazo,ariko nanone ntibikwiye kuba impamvu yatubuza kugarurira Imana ibyo yaduhaye.

Mu gitabo cy’umuhanuzi Malaki, hatubwira ko tugomba guha Imana ibyayo na yo ikabona kutugomorera imigisha yayo.

Malaki3:8-10 hagira hati:”Mbese umuntu yakwima Imana ibyayo?Ariko mwebwe mwarabinyimye.Nyamara murabaza muti’Twakwimye iki’?Mwanyimye imigabane ya kimwe mu icumi n’amaturo,muvumwa wa muvumo kuko ishyanga ryose uko mungana mwanyimye ibyanjye.Nimuzane imigabane ya kimwe mu icumi ishyitse mubishyire mububiko,inzu yanjye ibemo ibyo kurya Ngaho nimubingeragereshe,ni uko Uwiteka Nyiringabo avuga,murebe ko ntazabagomorera imigomero yo mu ijuru,nkabasukaho umugisha mukabura aho muwukwiza”.

Ese gutanga icya cumi bigira uwuhe mumaro?

Gutanga kimwe mu icumi bigaragaza ko:
1.Tugarutse ku Mana
Abakristu benshi bazi ko Yesu Kristu ari we nzira yonyine igana ku Mana ariko bagomba kumenyako ibyo dutunze byose bituruka ku Mana ikabinyuza mu mwana wayo ari we Yesu Kristo.gutanga kimwe mu icumi rero ni imwe munzira ituma tugarurira ubutunzi bwacu Data wo mu ijuru.Mu gitabo cy’umuhanuzi Malaki kandi hatubwirako tuba twibye Imana mu gihe tutayihaye kubyayo yaduhaye.(Malaki :3 :6-10)
Si ibyo gusa,icya cumi gifasha mu kubonera amafunguro abantu bamara igihe cyabo cyose bigisha ubutumwa bwiza kugira ngo bukomeze kwamamara hose. Gutanga icyacumi si uguha ubutunzi bwacu Kristo ahubwo ni no kubaka umurimo wo mu bwami bwe.
2.Imana idusaba kuyigerageresha icya cumi
Ese muzi ko gutanga icya cumi ari umutego w’Imana ku bantu bayo?Oya .Imana ivuga ko dukwiye kuyigerageresha ibyo dutunze na yo ikabona kuduha ibyo dukeneye.(Malaki3:10).
Imana idusaba kutiringira amafaranga cyangwa ubundi butunzi bwose ahubwo tukiringira ubushobozi bwayo bwo kuduha ibirenze ibyo dukeneye.Imana ntibeshya kandi ntiyivuguruza ku byo yavuze, tugomba kwizera ko duhabwa umugisha iyo dutanze icya cumi.

3.Bidufungurira amahirwe akomeye,tukabona umugisha.

Abakristo benshi birabakomerera gutanga icya cumi kuko byose baba bakibikeneye, Imana nayo izi ko tubikeneye ariko tugomba kumenya ko ariyo yabiduhaye kandi ko kubitanga bizana umugisha mwinshi.

Nk’uko umuntu ashora imari ye akabitsa muri banki akizerako azabona inyungu nyinshi .Icya cumi rero cyo kirenze inyungu ituruka mu kubitsa muri banki, si ukubitsa ahubwo ni ukugarurira Imana ibyo yaduhaye kugirango iduhe ibiruseho.
Imana yaduhaye ubushobozi bwo gushaka ubukungu,tukabona inyungu.Muri izo nyungu rero tugomba gufatamo icya cumi tukacyigarurira Imana,iyo tubigenje gutyo rero nayo iduha byinshi birenze ibyo dukeneye.

Muri iyi minsi y’imperuka kugenzura ibyo icyacumi n’amaturo bikoreshwa, ni kimwe mu mitego satani arigutega abantu b’Imana kugirango badatanga uko Imana ibasaba bityo rero bakaba bahaye rugari inyatsi n’umuvumo mu mirimo y’amaboko yabo. Si inshingano za bakiristo kumenya ibyo icya cumi n’amaturo bikoreshwa kuko hari abantu babishinjwe ari nabo bazabibazwa n’Imana isumbabyose. Satani ntadutege uwo mutego ahubwo turusheho kwinginga Imana itwigishe kubara iminsi yacu uburyo butuma dutunga imitima w’ubwenge. (Zaburi 90 :12)
Bakundwa, dukwiye gushishikarira gutanga icya cumi ,twubaha Imana idukunda kugira ngo kwizere kuronka ubukire,ibyiringiro n’ubugingo buhoraho.

[email protected]